Galayshanz 1:1-24
1 Dis leta da fahn mee, Paal, wahn apasl. Jeezas Krais, lang wid Gaad di Faada hoo rayz Krais op fahn di ded, pik mi fi bee wahn apasl. Da neva no man pik mi.
2 Mee an aala di bradaz weh deh wid mi di rait dis leta tu di kangrigayshan dehn da Galaysha.
3 Wi pray dat Gaad wi Faada ahn di Laad Jeezas Krais shoa unu grayt kainis* ahn giv unu pees.
4 Krais mi sakrifais ihself fi fi wee sin dehn soh dat ih ku reskyu wi fahn dis wikid werl* akaadn tu di wil a wi Gaad ahn Faada.
5 Aal gloari bilangz tu Gaad fareva an eva. Aymen.
6 Ah sopraiz dat unu soh hori fi ton weh fahn di Wan weh kaal unu wid di grayt kainis a Krais, an unu ton tu wahn nada kaina gud nyooz.
7 Bot no ada gud nyooz deh. Stilyet, som peepl di kaaz chrobl fi unu, ahn dehn waahn twis di gud nyooz bowt di Krais.
8 Bot eevn if eni wan a wi er wahn aynjel fahn hevn wuda taak tu unu bowt eni gud nyooz weh difrent fahn di gud nyooz weh wi mi fers tel unu, den da persn dizerv fi geh kandem.
9 Wi mi seh dis bifoa, bot now Ah di seh it agen: Hooeva di tel unu eni gud nyooz weh difrent fahn di gud nyooz weh unu don aksep dizerv fi geh kandem.
10 Unu tink Ah di chrai kanvins peepl er Gaad? Da peepl Ah di chrai pleez? If Ah stil di chrai pleez peepl, den Ai da noh wahn slayv a Krais.
11 Mi bradaz ahn sistaz, Ah waahn unu noa dat di gud nyooz weh Ah tel unu neva kohn fahn no man;
12 bikaaz Ah neva get di gud nyooz fahn no man, an Ah neva laan it fahn no man, bot da Jeezas Krais mi shoa it tu mi.
13 Af koars, unu hyaa how Ah yoostu goh aan wen Ah mi deh eena di Jooish rilijan. Ah yoostu goh owta mi way fi persikyoot di kangrigayshan a Gaad, an Ah mi kaaz lata damij.
14 Ah mi werk haada eena di Jooish rilijan dan lata Jooz rong mai oan ayj, an Ah mi fala di chradishan a mi ansesta dehn wid aala mi haat.
15 Bot Gaad, hoo bring mi eena dis werl ahn kaal mi bikaaz a ih grayt kainis, mi hapi
16 fi yooz mi fi tel di gud nyooz tu peepl fahn di nayshanz soh dat dehn kuda noa ih Son. Wen hihn mi pik mi fi du dat, Ah neva aks nobadi* weh fi du.
17 An Ah neva gaan da Jeroosalem fi taak tu dehn wan weh da-mi apasl bifoa mee needa, bot Ah gaan da Araybya, ahn den Ah gaahn bak da Damaskos.
18 Den chree yaaz layta, Ah gaan da Jeroosalem fi vizit Seefas,* an Ah mi stay wid ahn fi 15 dayz.
19 Bot Ah neva si non a di ada apasl dehn. Ah onli mi si Jaymz, di Laad breda.
20 Ah di tel unu fronta Gaad dat di tingz weh Ah di rait tu unu da noh lai.
21 Afta dat Ah gaan da Siriya ahn Silaisya.
22 Bot di Kristyan kangrigayshan dehn da Judeeya neva noa da hoo mee.
23 Dehn onli yoostu hyaa peepl seh: “Dis man yoostu persikyoot wi, bot now ih di tel di gud nyooz bowt di saym fayt weh ih yoostu chrai dischrai.”
24 Soh dehn staat tu gi Gaad gloari bikaaz a mee.
Futnoat
^ Si di Glasari, “Grayt kainis.”
^ Er “sistem a tingz.” Si di Glasari, “Sistem a tingz.”
^ Lit., “flesh ahn blod.”
^ Seefas da wahn nada naym fi Peeta.
