Galayshanz 4:1-31
4 Now dis da weh Ah di tel unu: wahn pikni hoo wahn inherit evriting no beta dan wahn slayv, eevn doa da hihn oan evriting.
2 Kaaz ih pa set wahn day fi mek ih inherit evriting, ahn peepl wahn haftu tek kayr a hihn an ih hows til da day kohn.
3 Ahn wee yoostu bee jos laik dat wen wi da-mi chiljren tu. Wi yoostu tink ahn bihayv laik di werl.
4 Bot wen di rait taim kom, Gaad sen ih Son. Hihn mi baan az wahn hyooman an ih mi fala di Laa
5 soh dat hihn kuda mi pay di prais fi free di peepl weh mi deh anda di Laa. Da onli soh Gaad kuda mi adap wi az ih chiljren.
6 Now bikaaz unu da Gaad chiljren, hihn put ih hoali spirit eena wi haat. Ahn da hoali spirit da di saym hoali spirit weh ih giv ih Son, ahn da saym spirit mek wi krai owt ahn seh: “Aba,* Faada!”
7 Soh unu da noh slayv nohmoh, kaaz unu da Gaad chiljren. An if unu da Gaad chiljren, den hihn wahn giv unu wahn inheritans tu.
8 Bot wen unu neva noa Gaad, unu yoostu bee slayv tu sohn faals gaad.
9 Bot now dat unu noa Gaad, er eevn beta yet, now dat Gaad noa unu, da how komz unu waahn goh bak tu di wotlis tingz a di werl weh noh ga no powa ahn slayv fi dehn agen?
10 Unu di selibrayt sertn dayz ahn monts ahn difrent seezn ahn yaaz laik dehn speshal.
11 Ah frayd dat aala di werk weh Ah du fi chrai help unu da-mi loan ways a taim.
12 Mi bradaz ahn sistaz, Ai yoostu bee laik unu bifoa, bot now Ah chaynj. Soh now Ah di bayg unu fi bee laik mee. Eena di paas, unu neva chreet mi bad.
13 Bot unu noa dat Ah mi geh fi preech di gud nyooz tu unu di fers taim bikaaz Ah mi sik.
14 An eevn doa mai siknis mi mek it haad pahn unu, unu stil mi chreet mi wid rispek an unu neva disgos mi.* Bot unu welkom mi laik wahn aynjel a Gaad, er laik Ai da-mi Krais Jeezas.
15 Weh hapm tu di hapinis weh unu yoostu feel? Kaaz Ai ku tel unu fi shoar, bak den unu mi redi fi eevn tek owt unu aiy ahn gi mi, if dat wuda mi help mi.
16 Soh wat? Ai da unu enimi now bikaaz Ah tel unu di chroot?
17 Ada peepl di du aal weh dehn kud fi win unu oava, bot noh fi di rait reezn. Aal weh dehn waahn du da ton unu weh fahn mee, soh dat unu ku bee eega fi fala dehn.
18 Pahn di ada han, ih aalwayz gud fi mek sombadi du aal weh ih kud fi win unu oava, az lang az da fi di rait reezn. Ahn dat noh onli fi hapm wen Ai dehdeh wid unu.
19 Mi dyaa chiljren, Ah di feel payn aal oava agen bikaaz a unu, ahn da payn da laik di payn weh wahn ma feel wen ih di ga baybi. An Ah wahn kantinyu fi feel da payn til unu geh fi bee laik Krais.
20 Ah wish Ah kuda dehdeh wid unu soh dat Ah wudn song soh rof, kaaz Ah noh andastan weh di hapm tu unu.
21 Tel mi, unu weh waahn fala di Laa, unu noh noa weh di Laa seh?
22 Tek fi egzampl weh di Skripchaz seh. Ih seh dat Aybraham mi ga too son, wan wid wahn slayv gyal, ahn wan wid wahn laydi weh free.
23 Di son a di slayv gyal mi baan jos laik eni ada pikni, bot di son a di laydi weh free mi baan bikaaz a di pramis weh Gaad mek.
24 Now dehndeh tingz ga wahn simbolik meenin. Kaaz di too laydi stan fi too kovenant weh Gaad mek wid peepl; wan a dehn hihn mi mek pahn Mongt Sainai, an aala di peepl weh deh anda da kovenant da slayv. Ahn Haygar stan fi da kovenant deh.
25 Now Haygar stan fi Sainai, weh da wahn mongtin da Araybya. Ahn shee stan fi Jeroosalem tudeh, kaaz Jeroosalem an aala ih chiljren* da slayv.
26 Pahn di ada han, di ada laydi, Saara, stan fi Jeroosalem weh deh da hevn. Ahn shee da wahn free uman ahn shee da laik wi ma.
27 Di Skripchaz seh: “Yoo uman weh kyaahn ga baybi, bee hapi. Showt ahn krai owt wid jai eevn doa yu noh feel di payn fi ga baybi. Kaaz di uman weh geh abandan wahn ga moa chiljren dan di uman weh ga ih hozban.”
28 Now mi bradaz ahn sistaz, unu da chiljren weh baan bikaaz a di pramis weh Gaad mek, ahn da mi di saym fi Aizak.
29 Ahn joorin da taim, di wan weh mi baan jos laik eni ada pikni staat tu persikyoot di wan weh mi baan bikaaz a di powa a di hoali spirit. Ahn di saym ting di hapm tudeh.
30 Bot weh di skripcha seh? Ih seh: “Jraiv owt di slayv gyal an ih son, kaaz di son a di slayv gyal noh wahn geh eni paat a di inheritans weh di son a di laydi weh free wahn get.”
31 Soh den, mi bradaz ahn sistaz, wee da noh chiljren a di slayv gyal, bot wee da chiljren a di laydi weh free.
Futnoat
^ Dis da wahn Heebroo er Aramayik werd weh meen “Faada.” Da wahn rispekful werd weh chiljren yooz wen dehn taak tu dehn pa.
^ Er “neva spit aata mi.”
^ Eena dis vers, “chiljren” stan fi di peepl weh liv eena da siti.
