Galayshanz 6:1-18
6 Mi bradaz ahn sistaz, if sombadi di goh di rang way bifoa ih eevn riyalaiz it, unu weh da machoar Kristyanz* fi help ahn get bak pahn di rait chrak, ahn du it wid wahn jentl spirit. Bot bee kyaaful, kaaz maybi eevn unu mait bee temtid fi du di saym ting.
2 Kip aan di bak wan anada hevi berdn. Wen unu du dat, unu wahn di obay di laa a di Krais.
3 Kaaz if enibadi tink dat dehn da sohnting wen reeli dehn da notn, dehn di fool op dehn oanself.
4 Bot eech persn fi chek weh ih du, kaaz den ih wahn ga reezn fi feel gud bowt ihself, an ih noh fi kompyaa ihself wid nobadi els.
5 Kaaz eech persn wahn bak ih oan load.*
6 Pahn tap a dat, if sombadi di teech unu di werd a Gaad, den unu mos shayr evri gud ting wid di wan weh di teech unu.
7 Noh fool unuself:* Nobadi kyaahn fool Gaad. Kaaz wateva wahn persn plaant, dat da weh ih wahn reep.
8 Soh if wahn persn plaant akaadn tu weh ih sinful badi waahn, den ih wahn reep dischrokshan sayka ih sinful badi. Bot if wahn persn plaant akaadn tu weh di hoali spirit waahn, den ih wahn reep evalastin laif fahn di spirit.
9 Soh noh mek wi giv op di du weh rait, kaaz wen di rait taim kom, wi wahn geh weh wi dizerv if wi noh taiyad owt.*
10 Soh den, az lang az wi ga di chaans fi help eech ada, mek wi du gud fi evribadi, bot espeshali fi aala wi bradaz ahn sistaz weh ga di saym fayt az wee.
11 Ah di rait dis leta tu unu wid mi oan han, ahn luk how big Ah rait di werd dehn.
12 Aala dehn wan weh waahn luk gud fronta ada peepl di chrai foas unu fi geh serkomsaiz. Dehn onli di du dat fi mek peepl noh persikyoot dehn sayka di taacha stayk* a di Krais.
13 Kaaz eevn dehn wan weh geh serkomsaiz noh obay di hoal Laa, bot dehn waahn unu geh serkomsaiz soh dat dehn ku boas tu adaz bowt weh unu du tu unuself.
14 Bot az fi mee, Ah noh waahn boas bowt notn eksep bowt wi Laad Jeezas Krais hoo mi ded pahn di taacha stayk.* Fi mee, fi hihn det kandem di werl tu det, bot akaadn tu di werl, da mee geh kandem tu det sayka hihn.
15 Kaaz ih noh impoatant weda er nat wahn persn serkomsaiz. Bot weh reeli impoatant da fi mek wi bee wahn nyoo kriyayshan.
16 Ah pray dat Gaad gi pees tu aala di peepl weh liv akaadn tu weh Ah jos seh, hoo da di Izrel a Gaad, ahn dat ih shoa dehn mersi.
17 Fahn now aan, noh mek nobadi mek chrobl fi mi, kaaz Ah ga sohn maak pahn mi badi weh shoa dat Ai da wahn slayv a Jeezas.
18 Mi bradaz ahn sistaz, Ah pray dat di Laad Jeezas Krais bles unu wid fi hihn grayt kainis* bikaaz a di wilin atichood weh unu shoa. Aymen.
Futnoat
^ Lit., “da spirichwal peepl.”
^ Er “wahn need fi tek kayr a ih oan rispansabiliti.”
^ Dis ku aalso bee “Noh mek nobadi fool unu.”
^ Er “noh giv op.”
^ Si di Glasari, “Taacha stayk.”
^ Si di Glasari, “Taacha stayk.”
^ Si di Glasari, “Grayt kainis.”
