Heebrooz 1:1-14
1 Fahn way bak, Gaad mi taak tu wi ansesta dehn lata taimz chroo di prafit dehn, an eena lata difrent wayz.
2 Bot now, joorin dis taim,* Gaad taak tu wi chroo ih Son, di wan weh hihn chooz fi inherit evriting, ahn di wan weh Gaad yooz fi mek di ting dehn eena hevn ahn pahn di ert.*
3 Hihn shoa wi di gloari a Gaad, ahn hihn ga di saym wayz laik Gaad. Ahn chroo ih powaful werd hihn hoal evriting tugeda. An afta ih kleen wi fahn wi sin dehn, ih sidong da hevn pahn di rait han said a di Moas Hai.
4 Soh hihn geh fi bee haiya dan di aynjel dehn, an eevn di naym weh hihn inherit faar grayta dan aala fi dehn naym.
5 Fi egzampl, tel mi, tu wich wan a di aynjel dehn Gaad mi seh: “Yoo da mi son; tudeh Ai kohn fi bee yu faada”? Aalso, bowt wich wan a dehn ih mi seh: “Ai wahn bee ih faada, ahn hihn wahn bee mi son”?
6 Bot wen Gaad sen ih fersbaan Son intu di werl agen, ih seh: “Aala Gaad aynjel dehn fi bow dong tu ahn.”
7 Ahn dis da weh Gaad seh bowt ih aynjel dehn tu: “Hihn sen ih aynjel dehn az spirits, an ih servant dehn* laik wahn faiya weh di blayz.”
8 Bot dis da weh Gaad seh bowt ih Son; ih seh: “Gaad da di wan weh gi yu di atariti fi rool fareva an eva,* ahn yu Kingdom wahn rool wid jostis.
9 Yu lov raichosnis ahn yu hayt wikidnis. Dat da wai Gaad anoint yu wid ail ahn gi yu moa jai dan aala di ada king dehn.”*
10 Gaad aalso seh: “Fahn di biginin, Oa Laad, yu mi lay dong di fongdayshan a di ert, ahn yu mek di hevn dehn wid yu oan too han.
11 Di ert ahn di hevn dehn wahn stap egzis, bot yoo wahn liv fareva. Di ert ahn di hevn wahn wayr owt jos laik kloaz.
12 Ahn yu wahn rap dehn op jos laik wen sombadi rap op wahn lang roab, ahn yu wahn chaynj dehn jos laik wen sombadi chaynj kloaz. Bot yoo wahn neva chaynj, ahn yu wahn neva ded.”
13 Bot hihn neva tel non a ih aynjel dehn: “Sidong pahn mi rait han said til Ah put yu enimi dehn anda yu fut laik wahn futstool.”
14 Aala di aynjel dehn da spirit weh serv Gaad. Ahn hihn gi dehn aadaz fi help di wan dehn weh wahn inherit salvayshan.
Futnoat
^ Er “Bot now, da di en a dehnya dayz.”
^ Er “fi mek di sistem a tingz.” Si di Glasari, “Sistem a tingz.”
^ Er “ih minista dehn.”
^ Lit., “Gaad da yu chroan fareva an eva.”
^ Dis di rifaa tu di king dehn fahn Dayvid famili lain.
