Heebrooz 12:1-29
12 Now, dis big krowd a peepl da laik wahn big klowd weh deh aal rong wi, ahn dehn witnis bowt di tingz weh dehn si ahn hyaa. Soh den, mek wi geh rid a evri berdn ahn di sin weh eezi fi chrap wi. Ahn mek wi bayr op ahn ron di rays weh deh heda wi,
2 wail wi kip wi aiy dehn pahn Jeezas, di Cheef Leeda a wi fayt ahn di wan weh help wi fi ga kompleet fayt. Ahn sayka di jai weh mi deh heda hihn, ih neva feel shaym eevn doa hihn mi sofa ahn ded pahn di taacha stayk.* Ahn now hihn di sidong pahn di rait han said a Gaad chroan.
3 Soh, mek wi tink bowt di egzampl a di wan weh mi bayr op wen sinaz mi insolt ahn, bot dehn sinaz onli mi-di haam dehn oanself wen dehn du dat. Yes, tink bowt fi hihn egzampl soh dat unu noh geh taiyad ahn giv op.
4 Eena unu schrogl wid sin, non a unu neva yet haftu giv op unu oan laif.
5 An unu don ferget di advais weh Gaad giv unu. Hihn mi taak tu unu laik wen wahn pa di taak tu ih son dehn; ih mi seh: “Mi son, noh ton yu bak pahn di disiplin weh Jehoava gi yu, ahn noh giv op wen hihn karek yu.
6 Kaaz Jehoava disiplin di wan dehn weh hihn lov, ahn hihn ponish enibadi weh hihn aksep az ih son.”
7 If unu bayr op, dat wahn serv az paat a unu disiplin.* Ahn Gaad di chreet unu laik ih son dehn. Tink bowt it, wich pa deh weh noh disiplin ih pikni dehn?
8 Soh if Gaad noh disiplin unu laik how ih disiplin aala wi, den unu da noh reeli fi hihn pikni dehn, unu da sombadi els pikni.
9 Pahn tap a dat, wee yoostu rispek wi hyooman faada dehn* wen dehn disiplin wi. Soh now, unu noh tink dat wi shuda eevn moa redi fi put wiself anda di wil a wi Faada weh gi wi spirichwal laif, ahn liv?
10 Wi payrents mi disiplin wi fi wahn lee wail akaadn tu weh dehn mi kansida fi bee rait. Bot wi hevnli Faada aalwayz disiplin wi fi wi oan benifit soh dat wi ku bee hoali jos laik hihn.
11 Aala wi wuda agree dat non a wi noh injai disiplin wail wi di goh chroo it, kaaz ih payn wi; bot aftawodz, if wi alow di disiplin fi chrayn wi, ih wahn help wi fi liv rait ahn liv eena pees.
12 Soh den, unu fi schrentn unu han dehn weh di heng dong an unu nee dehn weh week,
13 ahn kantinyu fi waak schrayt pahn di road, soh dat di paat weh week noh geh wers, bot insteda dat, ih wahn geh heel.
14 Werk haad fi liv eena pees wid evribadi ahn fi liv wahn hoali laif, kaaz widowt dat nobadi wahn si di Laad.
15 An unu mos bee kyaaful soh dat non a unu looz owt pahn di grayt kainis* fahn Gaad, ahn soh dat no paiznos plaant tek root ahn kaaz chrobl ahn paizn adaz.
16 Ahn kip pahn di wach fi enibadi monks unu weh praktis sekshwal imoraliti* er weh noh apreeshiayt hoali tingz, laik Eesaa, hoo mi giv op ih raits az di fersbaan son fi wan meel.
17 Kaaz unu noa dat aftawodz hihn mi waahn inherit di blesin, bot ih pa rijek ahn. An eevn doa hihn mi kohn di krai tu ih pa, ih kudn du notn fi chaynj ih pa main.
18 Kaaz unu neva kohn kloas tu di mongtin weh mi-di bon wid faiya aal oava, weh mi ga wahn daak klowd ahn schrang breez rong it,
19 ahn weh yu kuda mi hyaa chrompit di bloa ahn wahn vais fahn hevn di taak. Wen di peepl mi hyaa da vais, dehn mi bayg Moaziz fi mek dehn stap hyaa it.
20 Kaaz dehn mi geh frayd wen dehn mi hyaa di koman weh seh: “If eevn wahn animal toch di mongtin, dehn wahn haftu stoan ahn tu det.”
21 Weh dehn mi si mi luk soh fraitnin dat eevn Moaziz mi seh: “Ah di chrimbl anaal weh Ah soh fraitn.”
22 Bot unu kohn kloas tu wahn Mongt Zaiyan, di siti a di livin Gaad, ahn da siti da di Jeroosalem weh deh da hevn, ahn towznz ahn towznz a aynjelz dehdeh*
23 ahn dehn gyada op tugeda. An aala di fersbaan fahn di kangrigayshan weh ga dehn naym rait dong eena hevn dehdeh, lang wid Gaad hoo da di Joj oava evribadi, ahn lang wid di raichos wan dehn weh liv di way di hoali spirit waahn dehn liv ahn weh geh fi bee perfek.
24 An unu kohn kloas tu Jeezas, hoo da di helpa fi di nyoo kovenant,* ahn tu di blod weh hihn sprinkl pahn wi, weh beta dan Aybl blod.
25 Unu mos bee kyaaful ahn mek shoar dat unu lisn tu* di Wan weh di taak tu unu fahn hevn. Kaaz if di peepl neva eskayp ponishment wen dehn neva obay di wan weh mi-di waan dehn pahn di ert, den wee noh wahn eskayp ponishment needa if wi noh obay di Wan weh di taak tu wi fahn hevn!
26 Joorin da taim deh, fi hihn vais mi shayk di ert, bot now hihn pramis seh: “Ah noh onli wahn shayk di ert wan moa taim, bot Ah wahn shayk di hevn dehn tu.”
27 Now wen Gaad seh “wan moa taim,” dat meenz dat hihn wahn geh rid a evriting weh ku geh shayk, tingz weh hihn neva mek, soh dat di tingz weh noh shayki wahn stay.
28 Soh den, sins wi noa dat wi wahn geh wahn Kingdom weh noh shayki, mek wi kantinyu fi benifit fahn Gaad grayt kainis, soh dat wi wahn ku aafa hihn hoali servis* weh wahn pleez ahn, lang wid fyaa a Gaad ahn deep rispek.
29 Kaaz wi Gaad da laik wahn faiya weh dischrai evriting.
Futnoat
^ Si di Glasari, “Taacha stayk.”
^ Er “paat a unu chraynin.”
^ Lit., “di faada dehn a wi flesh.”
^ Si di Glasari, “Grayt kainis.”
^ Si di Glasari, “Sekshwal imoraliti.”
^ Er “ahn tenz a towznz a aynjelz dehdeh.”
^ Si di Glasari, “Helpa fi di kovenant.”
^ Er “unu noh mek ekskyoos tu; unu noh ignoar.”
^ Er “aafa hihn saykrid servis.” Si di Glasari, “Hoali servis.”
