Heebrooz 2:1-18
2 Dat da wai wi need fi pay kloas atenshan tu di tingz wi mi laan bowt Jeezas. Wi need fi du dis soh dat wi noh jrif weh fahn di fayt.
2 Kaaz if di werdz weh Gaad mi seh tu wi ansesta dehn chroo di aynjel dehn mi proov fi bee chroo, an if evri persn weh sin ahn weh noh obeedyant geh di ponishment weh dehn dizerv,
3 how wee wahn eva eskayp ponishment if wi niglek dis wandaful salvayshan? Wi Laad da-mi di fers wan fi preech bowt dis salvayshan, ahn di man dehn weh mi hyaa weh hihn mi seh mi tel wi bowt it tu.
4 Ahn Gaad mi shoa dat weh dehn mi seh da chroo wid di difrent sainz ahn mirakl dehn, wid di difrent powaful werk dehn, ahn wid di gif dehn weh ih gi chroo di hoali spirit akaadn tu fi hihn wil.
5 Gaad neva put aynjelz fi rool oava di ert weh wahn kom,* di wan weh wi mi taak bowt.
6 Bot sohnweh eena di Skripchaz wahn sertn witnis mi rait seh: “Da hoo wee soh dat yu pay soh moch atenshan tu wi, er wahn son a man dat yu shuda main ahn?
7 Yu mi giv ahn wahn loawa pozishan dan di aynjel dehn; yu mi giv ahn aana ahn gloari, ahn yu mi put ahn in chaaj a evriting weh yoo mek.
8 Yu put evriting anda ih fut.” Now, wen Gaad giv ahn evriting fi rool oava, ih noh wahn lef owt notn. Bot soh faar, wee noh si hihn di rool oava evriting az yet.
9 Bot hoo wi doo si da Jeezas, di wan weh Gaad mi gi wahn loawa pozishan tu, wahn loawa pozishan dan weh di aynjel dehn gat, ahn Gaad mi giv ahn gloari an aana fi weh ih mi wilin fi sofa an eevn ded fi wi. Bikaaz a Gaad grayt kainis,* Jeezas gaahn chroo det fi evribadi.
10 Evriting egzis fi gi Gaad gloari ahn dehn egzis bikaaz a hihn. Soh, fi mek Gaad gi gloari tu ih son dehn, ih mi rait fi mek hihn alow di Cheef Leeda a fi dehn salvayshan fi sofa. Eena dis way ih mi kwalifai fi sayv dehn.
11 Now Jeezas ahn di wan dehn weh hihn mek hoali ga di saym Faada, dat da wai hihn noh shaym fi seh dat dehn da fi hihn breda dehn.
12 Kaaz hihn mi seh: “Ai wahn taak bowt yu tu mi breda dehn, an eena di midl a di kangrigayshan Ah wahn prayz yu wid sang.”
13 Hihn mi aalso seh: “Ai wahn put mi chros eena hihn.” Pahn tap a dat, ih mi seh: “Ah deh rait ya wid di yong chiljren dehn weh Jehoava gi mi.”
14 Soh den, sins di “yong chiljren dehn” da flesh ahn blod, hihn kohn tu ert az flesh ahn blod tu. Ih mi du dis soh dat chroo fi hihn det, ih wahn ku dischrai Saytan, di wan weh ku kaaz det.
15 An ih mi kohn fi free di wan dehn weh frayd fi ded dehn hoal laif, bikaaz da fyaa mek dehn liv laik dehn da slayv.
16 Hihn noh di help owt di aynjel dehn; ih mi kohn fi help owt Aybraham disendant dehn.*
17 Soh den, ih mi haftu bee laik ih “breda dehn” eena evri way. Ih mi du dis soh dat hihn kuda mi bee wahn faytful hai prees weh shoa mersi eena ih servis tu Gaad, ahn soh dat ih kuda mi aafa op wahn sakrifais fi mek wi ga pees wid Gaad.*
18 Soh sins hihn mi sofa wen dehn mi tes ahn, hihn ku help owt evribadi weh fays difrent tes tu.
Futnoat
^ Er “di nyoo ert weh wahn kom.”
^ Si di Glasari, “Grayt kainis.”
^ Lit., “seed.”
^ Er “wahn sakrifais fi kova wi sin dehn soh dat wi ku ga pees wid Gaad.”
