Heebrooz 3:1-19
3 Soh den, mi hoali bradaz, unu weh geh kaal* fi goh da hevn, tink bowt Jeezas egzampl, di wan weh Gaad sen pahn di ert* ahn weh da wi hai prees.
2 Hihn mi faytful tu Gaad, di wan weh chooz hihn, jos laik how Moaziz mi faytful tu Gaad wen hihn mi-di serv eena Gaad hows.*
3 Bot Jeezas dizerv moa aana dan Moaziz, kaaz di persn weh bil wahn hows ga moa aana dan di hows.
4 Af koars, evri hows ga sombadi weh bil it, bot Gaad da di wan weh mek evriting.
5 Now Moaziz da-mi wahn faytful servant eena Gaad hows, ahn weh hihn mi du mi serv az wahn witnis a di ting dehn weh Gaad mi wahn seh laytaraan,
6 bot Krais da wahn faytful son weh in chaaj a Gaad hows. Soh if wi kantinyu fi ga korij ahn hoal aan tait tu wi hoap ahn rijais sayka it rait dong tu di en, den wee wahn bee Gaad hows.
7 Soh den, dis da wai di hoali spirit seh, “Tudeh, wen unu lisn tu mai vais,
8 noh haadn unu haat gens mi laik di taim wen unu ansestaz mi get mi beks, laik di day wen dehn mi tes mi eena di wildanes.
9 Da rait deh unu ansestaz mi chrai mi ahn tes mi, eevn doa dehn mi geh fi si aal weh Ah mi du fi dehn fi 40 yaaz.
10 Ahn dis da wai Ah mi geh beks wid da jenarayshan ahn seh: ‘Eena dehn haat, dehn aalwayz ton weh fahn mi, ahn dehn noh noa mi.’
11 Soh dis da weh Ah mi swayr wen Ah mi geh beks wid dehn; Ah mi seh: ‘Dehn noh wahn jain mi pahn mi day a res.’”
12 Mi bradaz, unu mos bee kyaaful noh fi jraa weh fahn Gaad, kaaz dis ku mek unu en op wid wahn wikid haat weh noh ga fayt.
13 Bot unu mos kip aan di inkorij wan anada evri day, wail da stil “Tudeh,” soh dat sin noh chrai fool unu ahn mek unu haat geh haad.
14 Kaaz wi onli wahn shayr eena di tingz weh di Krais di du* if wi hoal aan tait tu di fayt weh wi ga fahn di biginin.
15 Di Skripchaz seh, “Tudeh, wen unu lisn tu mai vais, noh haadn unu haat gens mi laik di taim wen unu ansestaz mi get mi beks.”
16 Da-mi hoo dehn peepl weh mi hyaa Gaad vais ahn stilyet mek ih geh beks? Da mi aal dehn peepl weh Moaziz mi leed owta Eejip, noh chroo?
17 Moroava, da hoo Gaad mi geh beks wid fi 40 yaaz? Da mi wid dehn saym peepl weh mi sin ahn weh mi jrap ded eena di wildanes!
18 Ahn da tu hoo Gaad mi swayr dat dehn neva mi wahn res pahn di day a fi hihn res? Da mi dehn saym peepl weh neva obay ahn, noh chroo?
19 Soh wi si dat dehn kudn res pahn fi hihn day a res, kaaz dehn neva ga fayt.
Futnoat
^ Er “invaitid.”
^ Er “di wan weh wee aksep az wahn apasl.”
^ Dis di rifaa tu di nayshan a Izrel.
^ Er “wi wahn shayr eena di tingz weh da fi Krais.”
