Heebrooz 4:1-16
4 Now Gaad pramis wi dat wee ku jain hihn pahn fi hihn day a res. Ahn sins da pramis deh stil gud, mek wi bee kyaaful dat wi noh looz owt pahn da pramis.
2 Kaaz wee mi hyaa di gud nyooz, jos laik how di Izrelait dehn mi hyaa it. Bot dehn neva obay, soh ih neva benifit dehn non ataal. Dehn mi disobay bikaaz fi dehn fayt neva schrang laik di fayt a dehn wan weh mi obay.
3 Bot wee weh ga fayt jain hihn pahn fi hihn day a res. Az fi dehn wan weh neva obay, ih mi seh: “Soh dis da weh Ah swayr wen Ah mi beks wid dehn, ‘Dehn noh wahn jain mi pahn mi day a res,’” eevn doa hihn finish ih werk fahn di biginin a di werl* an ih stil di res.
4 Bikaaz eena wan skripcha, dis da weh hihn mi seh bowt di sevent day: “Ahn Gaad res pahn di sevent day fahn aala ih werk,”
5 ahn now agen ih seh: “Dehn noh wahn jain mi pahn mi day a res.”
6 Di wan dehn weh mi fers hyaa di gud nyooz neva jain Gaad pahn fi hihn day a res, kaaz dehn neva obeedyant. Bot wahn apachooniti stil dehdeh fi peepl jain Gaad pahn fi hihn day a res.
7 Soh dat da wai, afta wahn lang taim, Gaad mi seh eena wan a di saam dehn fahn Dayvid (jos laik weh dis leta mi seh lee erliya), “Tudeh, wen unu lisn tu mai vais, noh haadn unu haat gens mi.” Soh agen ih mi maak aaf wahn day weh ih kaal “Tudeh.”
8 Tink bowt it, if Jashwa mi kehr dehn eena wahn plays weh dehn kuda mi res wid Gaad, Gaad wudn taak bowt wahn nada day.
9 Soh wahn day fi res, laik wahn sabat day, stil egzis fi Gaad peepl.
10 Kaaz di persn weh jain Gaad pahn fi hihn day a res, di res aalso fan ih oan werk, jos laik how Gaad di res fahn fi hihn werk.
11 Soh den, mek wi du wi bes fi jain Gaad pahn fi hihn day a res, soh dat non a wi fala fi dehn egzampl ahn disobay Gaad.
12 Kaaz di werd a Gaad alaiv an ih ga lata powa, an ih shaapa dan eni soad weh shaapm pahn too said. Ih ku kot soh deep intu wahn persn dat ih shoa hoo da persn pahn di owtsaid* ahn hoo dehn pahn di eensaid.* Ih ku eevn kot deep bitween di jaint dehn ahn di maro. Ih ku shoa di tingz weh wahn persn tink bowt eena ih haat ahn weh ih waahnt.
13 Ahn notn noh deh eena kriyayshan weh ku haid fahn Gaad; evriting ekspoaz tu hihn. Hihn ku si evriting klyaa-wan, ahn da hihn wahn joj wi.
14 Soh den, sins fi wee grayt hai prees, Jeezas di Son a Gaad, gaan da hevn, mek wi kantinyu fi taak bowt wi fayt eena hihn.
15 Kaaz wi noh ga wahn hai prees weh kyaahn andastan fi wee weeknis dehn, bot wi hai prees mi fays aal difrent kaina tes jos laik wee, ahn yet ih neva sin.
16 Soh den, mek wi kohn kloas tu di chroan a di Gaad hoo gi grayt kainis,* ahn noh mek wi feel frayd fi pray tu hihn soh dat wi ku geh mersi ahn help da di rait taim.
Futnoat
^ Dis di rifaa tu Adam ahn Eev chiljren.
^ Er “Ih ku divaid di soal.” Si di Glasari, “Soal.”
^ Er “ahn di spirit.” Si di Glasari, “Spirit.”
^ Si di Glasari, “Grayt kainis.”
