Heebrooz 5:1-14
5 Evri man weh geh pik fi serv az hai prees serv di peepl eena di tingz weh ga fi du wid dehn wership tu Gaad, soh dat hihn ku aafa op gif ahn sakrifais fi di sin dehn a di peepl.
2 Ahn wen peepl sin bikaaz dehn noh noa beta, hihn ku deel wid dehn eena wahn jentl way* bikaaz hihn da wahn sina jos laik dehn.
3 Ahn sayka dat, hihn need fi aafa op sakrifais fi ih oan sin dehn jos laik weh ih du fi di sin dehn a di peepl.
4 Moroava, no man kyaahn giv ihself gloari ahn chooz fi bee hai prees pan ih oan; onli Gaad ku chooz da persn, jos laik how hihn mi chooz Ayron.
5 Saym way, Krais neva giv ihself gloari ahn chooz fi bee hai prees pan ih oan, rada da mi Gaad giv ahn gloari ahn tel ahn: “Yoo da mi son; tudeh Ai kohn fi bee yu faada.”
6 An eena wahn nada skripcha ih seh, “Yoo da wahn prees jos laik Melkizidek, ahn yu wahn bee wahn prees fareva.”
7 Ahn wail Krais mi deh pahn di ert,* hihn mi bayg Gaad wid wahn lowd vais, lang wid tyaaz, fi sayv ahn fahn det. Ahn bikaaz hihn mi fyaa Gaad, Gaad ansa ih pryaaz.
8 Aldoa hihn da-mi Gaad Son, ih mi laan fi obay chroo di tingz weh ih sofa.
9 An afta hihn mi obeedyant eena evriting,* hihn provaid di way how obeedyant peepl ku geh sayv ahn liv fareva,
10 kaaz hihn da di wan weh Gaad chooz fi bee hai prees jos laik Melkizidek.
11 Wi ga lata tingz fi seh bowt Krais, bot dehn haad fi eksplayn, kaaz unu noh eevn chrai mek wahn efoat fi andastan weh unu hyaa.
12 Bai now unu shuda di teech ada peepl, bot unu stil need sombadi fi teech unu agen di fers tingz weh unu mi laan fahn Gaad werd. Unu da laik pikni weh need milk insteda salid food.
13 Kaaz evribadi weh need milk da stil pikni ahn dehn noh noa Gaad werd a raichosnis.
14 Bot salid food da fi machoar peepl, fi di wan dehn weh laan fi tink soh dat dehn chrayn dehnself fi tel di difrens bitween gud ahn bad.
Futnoat
^ Er “hihn ku shoa dehn kompashan.”
^ Lit., “Eena di dayz a ih flesh.”
^ Lit., “An afta hihn geh fi bee perfek.”
