Heebrooz 6:1-20
6 Soh den, sins wi don laan di baysik teechinz bowt di Krais, mek wi werk haad fi bee machoar. Noh mek wi staat aal oava agen laik if wi di laan bowt how fi ripent fahn yoosles werks ahn how fi ga fayt eena Gaad.
2 Ahn noh mek wi ak laik wi jos di laan bowt di difrent kaina baptizm dehn ahn how fi lay wi han pahn adaz, er laik wi jos di laan fi di fers taim bowt di rezorekshan a di ded ahn di fainal jojment.
3 Bot wi noa dat wid di help a Gaad, wee wahn ku bee machoar peepl fi chroo.
4 Bot som bileevaz rijek di chroo teechinz an ih noh pasabl fi mek enibadi help dehn ripent. Dehn mi geh di lait, di gif weh kohn fahn hevn, ahn di hoali spirit.
5 Dehn mi aalso geh di wandaful werd a Gaad ahn di blesinz weh ga fi du wid di werl weh di kom.*
6 Bot dehn rijek di fayt, an ih noh pasabl fi help dehn ripent, bikaaz da laik dehn di nayl di Son a Gaad tu di stayk agen ahn kaaz peepl fi mek fon a ahn.
7 Now, peepl da laik di grong. Wen ih rayn wahn lat ahn di grong soak op di rayn, tingz staat tu groa fi di wan dehn weh mi plaant. Dat meen seh dat di grong geh wahn blesin fahn Gaad.
8 Bot if di grong projoos loan prikl, den ih noh gud fi notn, ahn soon Gaad wahn put wahn kers pan it, an eena di langa ron ih wahn geh bon op.
9 Bot az fi unu, mi dyaa bradaz ahn sistaz, eevn doa wi seh dehnya tingz, wi shoar seh dat unu deh eena wahn beta pozishan dan di wan dehn weh mi rijek di fayt, ahn dat unu di du tingz weh wahn mek Gaad sayv unu.
10 Kaaz Gaad da wahn raichos Gaad, ahn hihn noh wahn ferget di lov weh unu shoa fi ih naym. Hihn si how unu du unu bes fi help owt di hoali wan dehn ahn how unu kantinyu fi du dis, an ih noh wahn ferget dat.
11 Bot wi wuda waahn mek eech wan a unu shoa di saym haad-werkin atichood laik weh unu mi ga fahn di biginin, soh dat unu ku bee shoar bowt di hoap weh unu gat rait dong tu di en.
12 Wi noh waahn unu bee layzi. Bot insted unu mos fala di egzampl a dehn wan weh don geh di pramis dehn bikaaz a dehn fayt ahn payshens.
13 Kaaz wen Gaad mi mek ih pramis tu Aybraham, ih neva swayr bai enibadi naym, sins nobadi noh grayta dan hihn, bot ih mi swayr bai ih oan naym.
14 Ih mi seh: “Ah wahn bles yu fi shoar an Ah wahn definaytli bles yu wid lata chiljren.”
15 Soh afta Aybraham mi shoa payshens, Gaad mi mek dis pramis tu ahn.
16 Kaaz wen hyoomanz mek wahn vow, dehn swayr bai di naym a sombadi weh grayta dan dehnself, ahn dis vow put wahn en tu eni aagyument weh mait kom op, an ih proov dat weh dehn mi seh da chroo.
17 Jos laik dat, wen Gaad mi waahn gi moa proof tu di wan dehn weh wahn geh di pramis dat fi hihn perpos* noh wahn chaynj, ih mek wahn vow.
18 Ahn bikaaz ih noh pasabl fi mek Gaad lai wen ih kohn tu dehnya too tingz,* wee hoo ron fi tek shelta wid hihn get aal di inkorijment weh wi need fi hoal aan tait tu di hoap weh hihn put heda wi.
19 Ahn dis hoap da laik wahn anka eena wi laif,* ih schrang an ih kyaahn fayl, kaaz ih kehr wi chroo di kertn.
20 Ahn Jeezas da-mi di fers wan fi gaahn chroo di kertn fi wi, ahn hihn da fi wee hai prees fareva, jos laik how Melkizidek da-mi hai prees.
Futnoat
^ Er “di sistem a tingz weh di kom.” Si di Glasari, “Sistem a tingz.”
^ Er “fi hihn kongsl.”
^ Dis di taak bowt ih pramis an ih vow.
^ Er “laik wahn anka fi wi soal.”
