Heebrooz 7:1-28
7 Melkizidek da-mi di king a Saylem ahn wahn prees a di Moas Hai Gaad. Da hihn mi gaahn meet Aybraham ahn bles ahn az Aybraham mi-di kohn bak fahn win di waar gens di king dehn.
2 Aybraham mi gi Melkizidek ten persent a evriting weh ih mi win fahn di waar. Melkizidek naym meen “King a Raichosnis,” ahn hihn da aalso king a Saylem, weh meen “Di King Weh Bring Pees.”
3 Hihn noh ga wahn ma ner wahn pa, ahn no rekad a ih famili lain deh, ahn nobadi noh noa wen ih mi baan er wen ih mi ded. Eena dis way, hihn da laik di Son a Gaad, ahn soh hihn da wahn prees fareva.
4 Dis man mi grayt fi chroo! Dat da wai eevn Aybraham, di hed a di famili, mi giv ahn ten persent a aala di bes tingz weh hihn mi geh fahn di waar.
5 Now, akaadn tu di Laa, di son dehn a Leevai weh mi geh pik fi serv az prees mi ga wahn koman fi kalek ten persent fahn di peepl, weh da-mi dehn oan bradaz, eevn doa di peepl da-mi Aybraham chiljren tu.
6 Bot dis man weh neva eevn kohn fahn Leevai famili lain mi aksep di ten persent fahn Aybraham, ahn hihn mi bles di wan weh geh di pramis dehn fahn Gaad.
7 Now aala wi wuda agree dat di wan weh gi di blesin grayta dan di wan weh get it.
8 An eena dis wan kays, di Leevait dehn yoostu geh di ten persent a evriting, ahn dehn da-mi jos man weh ku ded, bot eena dis neks kays, di ada man weh di geh di ten persent da laik Melkizidek, ahn di Skripchaz seh dat hihn alaiv.
9 Ahn wi ku seh dat eevn Leevai, weh mi geh di ten persent a evriting, mi pay di ten persent chroo Aybraham.
10 Kaaz Leevai neva eevn mi baan yet az wahn son a ih ansesta Aybraham wen Melkizidek mi meet Aybraham.
11 Now, paat a Moaziz Laa weh Gaad mi gi di Izrelait dehn mi seh dat da onli Leevai son dehn kuda mi geh pik fi serv az prees. Soh, if di prees dehn fahn Leevai famili lain kuda mi free peepl fahn sin, unu tink dat wee wuda stil need wahn prees laik Melkizidek? Unu noh tink dat wahn prees laik Ayron wuda inof?
12 Ahn sins Gaad di chaynj di wan dehn weh serv az prees, ih haftu chaynj di Laa tu.
13 Kaaz dis persn weh wi di taak bowt kohn fahn wahn nada chraib, ahn nobadi fahn da chraib eva serv az prees.
14 An aala wi noa dat wi Laad kohn fahn di chraib a Jooda, bot Moaziz neva seh eniting bowt prees di kohn fahn da chraib.
15 Ahn wi ku andastan aala dis eevn beta kaaz Gaad rayz op wahn nada prees laik Melkizidek.
16 Ahn hihn di serv az prees, noh bikaaz a di chraib weh hihn kohn fram akaadn tu weh di Laa seh, bot hihn di serv bikaaz hihn ga powa, ahn da powa gi hihn laif weh kyaahn geh dischrai.
17 Kaaz dis da weh wan a di skripcha dehn seh: “Yoo da wahn prees jos laik Melkizidek, ahn yu wahn bee wahn prees fareva.”
18 Soh den, Gaad put di oal komanment wan said, bikaaz di oal komanment mi week an ih neva benifit nobadi.
19 Kaaz di Laa neva mek notn perfek, bot Gaad gi wi wahn beta hoap, ahn dat mek evriting perfek. Ahn bikaaz a da hoap wi ku geh kloas tu Gaad.
20 Aalso, da bai wahn vow Gaad mi pik Jeezas fi serv az prees
21 (kaaz dehn mi ga sohn man weh serv az prees eevn doa Gaad neva mek wahn vow bowt dehn, bot Gaad mi did mek wahn vow bowt dis persn wen ih seh: “Ai, Jehoava, mek wahn vow, an Ai noh wahn chaynj mi main,* ‘Yoo wahn bee wahn prees fareva’”),
22 ahn dat da wai Gaad gi Jeezas az proof a di nyoo kovenant, ahn da nyoo kovenant beta dan di oal kovenant.
23 Pahn tap a dat, bikaaz a det wahn lata difrent prees mi haftu serv, kaaz wen eech wan mi ded wahn neks wan mi haftu tek ih plays.
24 Bot bikaaz Jeezas kantinyu fi liv fareva, nobadi wahn serv az prees afta hihn.
25 Soh hihn da di wan weh ku reeli sayv peepl weh pray tu Gaad eena fi hihn naym. Kaaz hihn aalwayz alaiv fi aks Gaad fi help dehn.
26 Wi need wahn hai prees laik hihn weh laayal, inosent, ahn hoali, ahn wan weh difrent fahn sinaz ahn weh haiya dan di hevn dehn.*
27 Ahn hihn da noh laik dehn ada hai prees weh mi haftu aafa op sakrifais tu Gaad evri day fi dehn oan sin fers, ahn den fi ada peepl aftawodz. Hihn mi onli haftu du dis wan taim wen ih mi aafa op ihself az wahn sakrifais, ahn dat wahn benifit peepl fareva.
28 Di hai prees dehn weh di Laa mi apoint da-mi sinaz, bot di vow weh Gaad mi swayr apoint fi hihn Son fi bee di perfek hai prees fareva.
Futnoat
^ Er “an Ai noh wahn feel sari bowt mi disizhan.”
^ Di “hevn dehn” di rifaa tu di hyooman govament dehn.
