Ifeezhanz 3:1-21
3 Soh Ai, Paal, deh da prizn bikaaz Ah bilangz tu Krais Jeezas ahn bikaaz Ah di help unu hoo da peepl a di nayshan dehn.
2 Unu mi hyaa aredi dat Ah mi geh di rispansabiliti fi help unu benifit fahn di grayt kainis* a Gaad,
3 ahn dat Gaad mi mek Ah noa di hoali seekrit.* Ah mi rait tu unu wahn lee bit bowt dat bifoa.
4 Soh wen unu reed dis, unu wahn noa dat Ah andastan di hoali seekrit a di Krais.
5 Eena di paas jenarayshan dehn, Gaad neva mek peepl noa da hoali seekrit. Bot now ih yooz di hoali spirit fi mek di hoali apasl dehn ahn di prafit dehn noa it.
6 Ahn dis da di hoali seekrit: Peepl a di nayshan dehn weh da wan wid Krais Jeezas wahn geh di saym inheritans laik hihn. Dehn wahn bee paat a di saym badi, ahn dehn wahn geh di saym tingz weh Gaad pramis wi chroo di gud nyooz.
7 Ai da wahn servant a da hoali seekrit bikaaz a Gaad grayt kainis, ahn hihn mi yooz fi hihn powa fi gi mi da free gif.
8 Gaad shoa ih grayt kainis tu mee, eevn doa aala di ada hoali peepl moa impoatant dan mee, soh dat Ah ku tel di nayshan dehn di gud nyooz bowt di lata richiz a di Krais weh nobadi kyaahn andastan.
9 An Ah ku mek evribadi si how Gaad, weh kriyayt evriting, di manij ih hoali seekrit weh hihn mi haid fi wahn lang taim.
10 Dat mi hapm soh dat Gaad ku yooz di kangrigayshan fi mek di govament dehn ahn di atariti dehn da hevn noa bowt fi hihn wizdom weh ih shoa eena lata difrent wayz.
11 Dat gree wid weh Gaad mi waahn du fahn di biginin chroo Krais Jeezas wi Laad.
12 Bikaaz a hihn wi ku taak widowt frayd ahn wi ku ton tu Gaad wid kanfidens bikaaz wi ga fayt eena Krais.
13 Soh Ah aks unu noh fi giv op sayka di chribyulayshan weh Ah gaahn chroo fi help unu, bikaaz mai chribyulayshan bring aana tu unu.
14 Bikaaz a dat, Ah ben mi nee tu di Faada.
15 Hihn da di Wan weh giv evri famili da hevn ahn pahn di ert dehn naym.
16 Ah pray dat Gaad, weh ga lata gloari, yooz di powa weh kohn fan ih hoali spirit fi schrentn unu haat an unu main.
17 An Ah pray dat Krais, lang wid lov, liv eena unu haat bikaaz a unu fayt. An Ah pray dat unu ku stan op schrang pahn di fongdayshan, jos laik how di roots a wahn chree mek ih stan op schrang, ahn jos laik how wahn bildin stan op schrang pahn wahn salid fongdayshan.
18 Den, laik dat, unu an aala di ada hoali peepl wahn ku andastan evriting bowt how waid, ahn how lang, ahn how hai, ahn how deep di chroot.
19 An unu wahn noa di lov a di Krais, weh grayta dan nalij, soh dat unu ku bee ful op wid aala di kwaliti dehn weh Gaad giv unu.
20 Gaad powa di werk eena wi, ahn hihn ku du way moa dan weh wi ku aks fa er weh wi kuda eva imajin.
21 Soh evri jenarayshan fi gi Gaad gloari chroo di kangrigayshan ahn chroo Krais Jeezas fareva an eva. Aymen.
