Ifeezhanz 5:1-33
5 Soh unu mos chrai fi bee laik Gaad, bikaaz unu da fi hihn chiljren weh ih lov.
2 Unu fi kip aan di shoa lov laik di Krais. Hihn lov wi* ahn giv op ih laif fi wi* az wahn aafrin ahn wahn sakrifais weh smel sweet tu Gaad.
3 Unu noh fi eevn taak bowt sekshwal imoraliti* er eni kaina dotinis er greedinis, bikaaz hoali peepl noh fi ga notn fi du wid dehndeh kaina ting.
4 Unu noh fi bihayv laik unu noh ga no shaym ner taak naansens ner tel doti joaks needa, kaaz dehndeh ting noh prapa. Insteda dat, unu fi gi tanks tu Gaad.
5 Kaaz unu noa an unu andastan dat nobadi wahn inherit di Kingdom a Krais ahn Gaad if dehn praktis sekshwal imoraliti,* if dehn noh liv kleen, er if dehn greedi, bikaaz if dehn greedi da jos laik dehn di wership aidol.
6 Noh mek nobadi fool unu ahn tel unu tingz weh da noh chroo ahn weh noh mek no sens, kaaz sayka dehndeh kaina ting Gaad raat di kohn pahn peepl weh noh obay hihn.
7 Soh unu noh fi ga notn fi du wid dehn.
8 Eevn unu yoostu deh eena daaknis, bot now unu deh eena di lait bikaaz unu bilangz tu di Laad. Unu mos kantinyu fi liv laik chiljren a di lait,
9 kaaz evriting weh gud ahn raichos ahn chroo kohn fahn di lait.
10 Aalwayz mek shoar dat di Laad wahn pleez wid weh unu du.
11 Noh ga notn fi du wid di wotlis tingz weh peepl weh bilangz tu di daaknis du. Insteda dat, unu mos ekspoaz dehn.
12 Kaaz ih shaymful fi eevn taak bowt di tingz weh dehn du eena seekrit.
13 Now di lait ekspoaz evriting, an evriting weh ekspoaz wahn bee playn fi si eena di lait.
14 Dat da wai dehn seh: “Wayk op, yoo weh di sleep, rayz op fahn di ded, ahn Krais wahn shain pahn yu.”
15 Soh unu mos kip aan di chek unuself gud fi mek shoar dat unu di liv laik how waiz peepl liv, ahn noh laik how foolish peepl liv.
16 Mek di bes yoos a unu taim,* kaaz di dayz weh wi di liv eena wikid.
17 Soh den, unu fi stap goh aan laik unu noh ga no sens, bot unu mos kip aan di chrai fi andastan wat da Jehoava wil fi unu.
18 An unu noh fi jrink lata wain ahn geh jronk needa, kaaz dat wahn mek unu goh aan bad ahn kyaahn kanchroal unuself. Rada, unu fi liv wahn laif weh ful op wid di hoali spirit.
19 Unu mos sing di saam dehn tugeda,* sing prayz tu Gaad, ahn sing di spirichwal sang dehn tu Jehoava wid myoozik eena unu haat.
20 Unu mos aalwayz gi tanks tu wi Faada Gaad fi evriting eena di naym a wi Laad Jeezas Krais.
21 Unu fi bee wilin fi obay wan anada owta rispek fi Krais.
22 Wahn waif fi bee wilin fi obay ih hozban, jos laik how ih wilin fi obay di Laad.
23 Bikaaz wahn hozban da di hed a ih waif, jos laik how di Krais da di hed a di kangrigayshan, ahn hihn da di sayvya a da badi.
24 Jos laik how di kangrigayshan wilin fi obay di Laad, saym way soh, wahn waif fi bee wilin fi obay ih hozban eena evriting.
25 Unu hozban, unu fi kantinyu lov unu waif, jos laik how di Krais lov di kangrigayshan ahn giv op ih laif far it,
26 soh dat ih ku mek it hoali ahn yooz Gaad werd laik waata fi wash it kleen.
27 Krais mi du dat fi mek di kangrigayshan byootiful eena fi hihn sait, widowt wahn spat er wahn rinkl er eniting laik dat, bot hoali ahn widowt faalt.
28 Saym way soh, wahn hozban fi lov ih waif jos laik how ih lov ih oan badi. Wahn man weh lov ih waif lov ihself.
29 Kaaz no man eva hayt ih oan badi, bot ih feed it ahn cherish it, jos laik how di Krais chreet di kangrigayshan,
30 bikaaz aala wi da paat a fi hihn badi.
31 Di Skripchaz seh: “Bikaaz a dis, wahn man wahn lef ih ma an ih pa an ih wahn stik tu* ih waif, ahn di too a dehn wahn bee wan persn.”*
32 Now weh Ah di taak bowt da wahn veri impoatant hoali seekrit* bowt di Krais ahn di kangrigayshan.
33 Stilyet, eech wan a unu fi lov ih waif jos laik how ih lov ihself, ahn di waif fi ga lata rispek fi ih hozban.
Futnoat
^ Dis ku aalso bee “unu.”
^ Dis ku aalso bee “unu.”
^ Di Greek werd da por·neiʹa. Si di Glasari, “Sekshwal imoraliti.”
^ Si di Glasari, “Sekshwal imoraliti.”
^ Er “Unu mos bai taim.”
^ Dis ku aalso bee “tu unuself.”
^ Er “stay wid.”
^ Er “wan flesh.”
^ Er “saykrid seekrit.” Si di Glasari, “Hoali seekrit.”
