Ifeezhanz 6:1-24
6 Chiljren, unu mos obay unu payrents eena wahn way weh pleez di Laad, bikaaz dat da di rait ting fi du eena Gaad sait.
2 “Aana yu ma ahn yu pa.” Dat da di fers koman weh kohn lang wid wahn pramis weh seh:
3 “Yu ku ga wahn gud laif* ahn yu ku liv wahn lang taim pahn di ert.”
4 Unu weh da pa, unu noh fi provoak unu chiljren mek dehn geh beks wid unu. Bot unu mos rayz dehn op ahn disiplin dehn akaadn tu di gaidans weh kohn fahn Jehoava.
5 Unu weh da slayv, obay unu maasta wid aala unu haat ahn shoa dehn lata rispek, jos laik how unu rispek di Krais.
6 Noh onli obay wen peepl di wach unu, jos fi pleez dehn, bot unu fi obay bikaaz unu da Krais slayv weh di du Gaad wil wid aala unu haat.*
7 Serv unu maasta wid wahn gud atichood, laik unu di serv Jehoava ahn noh peepl.
8 Bikaaz unu noa dat Jehoava wahn riwaad evribadi fi di gud weh dehn du, weda dehn da wahn slayv er dehn free.
9 Pahn tap a dat, unu weh da maasta, chreet unu slayv dehn eena di saym way. Noh chretn dehn, bikaaz unu noa dat unu an unu slayv dehn ga di saym Maasta da hevn, ahn hihn joj evribadi di saym way.
10 Mek Ah tel unu dis wan laas ting: Unu fi mek di Laad giv unu schrent, bikaaz ih ga maiti powa.
11 Put aan di hoal soot weh Gaad giv unu fi protek unuself, jos laik weh wahn soalja put aan wen ih goh da waar. If unu du dat, den unu wahn ku stan op gens di Devl chriks.
12 Bikaaz wi noh di fait gens flesh ahn blod, bot gens di govament dehn, gens di atariti dehn weh rool oava di werl weh deh eena daaknis, ahn gens di wikid spirit dehn weh deh da hevn.
13 Bikaaz a dat, unu mos put aan di hoal soot weh Gaad giv unu, soh dat wen di wikid day kohn, unu wahn ku fait gens di enimi an unu wahn ku stan op schrang bikaaz unu finish du evriting weh unu mi haftu du.
14 Soh den, stan op schrang wid di chroot rong unu ways laik wahn belt, ahn wid raichosnis pahn unu ches laik wahn ves,
15 an unu fi bee redi fi preech di gud nyooz ahn mek dat bee laik di shooz weh unu wayr pahn unu fut.
16 Pahn tap a dat, unu fayt shuda bee laik di sheel weh unu kehr, soh dat unu ku yooz it fi blak aala di aro dehn weh di bon wid faiya weh di wikid wan di shoot aata unu.
17 An unu mos put aan di helmit, weh da di hoap a salvayshan, an aksep di soad a di spirit, weh da Gaad werd.
18 Unu mos kip aan di pray wid aala unu haat eena evri sichuwayshan wid evri kaina pryaa, ahn mek Gaad spirit gaid unu wen unu pray. Fi du dat unu mos stay awayk an aalwayz pray wid aala unu haat fi aala di hoali peepl.
19 Pahn tap a dat, unu mos pray fi mee, soh dat wen Ah oapm mi mowt Ah wahn ku taak bowt di hoali seekrit* a di gud nyooz widowt frayd.
20 Ai da Gaad mesinja weh deh eena prizn sayka weh Ah preech di gud nyooz. Pray fi mi soh dat Ah ku taak bowt di gud nyooz widowt frayd, jos laik how Ah sopoas tu.
21 Tikikos, hoo da mi dyaa brada ahn wahn faytful servant a di Laad, wahn tel unu evriting soh dat unu ku noa weh Ah di du ahn how Ah di du.
22 Ah di sen hihn tu unu soh dat ih ku tel unu bowt how wi di du, ahn soh dat ih ku komfert unu haat.
23 Ah pray dat Gaad di Faada ahn di Laad Jeezas Krais gi di bradaz ahn sistaz pees ahn lov lang wid fayt.
24 Ah pray dat Gaad shoa ih grayt kainis* tu evribadi weh lov wi Laad Jeezas Krais wid wahn lov weh wahn neva en.
Futnoat
^ Er “Yu wahn praspa.”
^ Er “soal.” Si di Glasari, “Soal.”
^ Er “saykrid seekrit.” Si di Glasari, “Hoali seekrit.”
^ Si di Glasari, “Grayt kainis.”
