Ikleeziyasteez 1:1-18
1 Dis da weh di teecha,* hoo da Dayvid son ahn di king da Jeroosalem, seh:
2 Di teecha seh: “Evriting yoosles!Evriting wertles! Evriting da ways a taim!”
3 Weh sohnbadi geh fahn di werk weh ih du,Fahn aala di haad werk weh ih du pahn di ert?*
4 Peepl di baan ahn peepl di ded,Bot di ert wahn egzis fareva.
5 Di son kom op, ahn di son goh dong;Den ih hori goh bak da di plays wehpaat ih wahn kom op agen.
6 Di breez bloa tu di sowt an ih goh bak tu di naat;Ih goh rong ahn rong laik wahn serkl, an ih neva stap bloa.
7 Aala di riva waata floa intu di see, bot di see noh geh ful op.
Ahn di riva waata floa rait bak wehpaat ih kohn fram soh dat ih ku kantinyu floa agen.
8 Evriting mek wahn persn taiyad;Nobadi ku eevn taak bowt it.
Wahn persn aiy aalwayz waahn si moa ahn moa,An ih ayz aalwayz waahn hyaa.
9 Weh hapm eena di paas wahn hapm agen,Ahn peepl wahn du di saym tingz laik weh ada peepl mi du bifoa;Notn nyoo deh pahn di ert.
10 Sombadi ku seh dat sohnting nyoo?
No, ih mi don egzis fahn lang taim;Ih mi egzis bifoa wee.
11 Nobadi memba peepl weh mi liv eena di paas.Ahn peepl weh egzis afta dehn noh wahn memba dehn needa.Ahn stilyet, ada peepl weh wahn egzis afta dehndeh peepl noh wahn memba dehn needa.
12 Ai da di teecha an Ai da stil di king a Izrel weh deh da Jeroosalem.
13 Ah mi disaid fi yooz mi wizdom fi stodi evriting weh hapm pahn di ert. Ah laan moa bowt how peepl mizarabl wail dehn di du di werk weh Gaad gi dehn fi du fi kip dehn bizi.
14 Ah luk pahn evriting weh peepl du pahn di ert,An Ah noatis dat evriting yoosles; da laik if peepl di chays afta breez.
15 Nobadi ku schraytn sohnting weh krukid,Ahn nobadi ku konk sohnting weh noh dehdeh.
16 Den Ah tel miself: “Ah geh wahn lata wizdom. Ah geh moa wizdom dan enibadi els weh mi egzis bifoa mee da Jeroosalem. Eevn mi haat geh fi apreeshiayt di lata wizdom ahn nalij weh Ah get.”
17 Ah mek op mi main fi laan moa bowt wizdom, krayzinis, ahn schupidnis. Eevn dehndeh tingz da laik if yu di chays afta breez.
18 Wahn lata wizdom kaaz lata prablemz,Soh enibadi weh waahn geh moa nalij wahn ga moa payn.
