Ikleeziyasteez 10:1-20
10 Jos laik how wahn perfyoom ail wuda spail ahn smel bad wen wahn flai ded een deh, da rait soh wahn waiz persn weh peepl rispek ku spail ih gud repyutayshan wen ih du sohnting foolish.
2 Wahn waiz persn mek ih haat gaid ahn eena di rait way, bot wahn schupid persn mek ih haat gaid ahn eena di rang way.
3 Di tingz weh wahn foolish persn du shoa dat ih noh ga no sens, an ih mek evribadi noa dat ih foolish.
4 If wahn roola geh beks bad wid yu, noh moov fahn wehpaat yu di stan op. Wahn persn weh stay kaam noh wahn komit wahn seeryos sin.
5 Wahn nada sad ting weh Ah si hapm pahn di ert* da di mistayk weh powaful peepl mek. Ahn dis da weh dehn du:
6 Dehn noh gi wahn hai pozishan tu peepl weh dizerv it, bot wahn lata taim dehn giv it tu foolish peepl insted.
7 Ah si how sohn servant raid haas meenwail di prins dehn di waak laik if dehn da servant.
8 Enibadi weh dig wahn hoal ku jrap eena it, ahn wahn snayk ku bait sombadi weh brok chroo wahn stoan waal.
9 Wahn persn ku hert ihself wen ih di werk da wahn kwari, ahn sombadi ku put ihself eena daynja wen dehn di chap wud.*
10 If sombadi di yooz wahn aks weh dol ahn dehn noh shaapm it, den dehn wahn haftu werk haada. Bot tingz gwehn gud fi sombadi weh waiz.
11 If wahn persn ga di skil fi mek wahn snayk daans bot di snayk bait ahn bifoa ih ku seh eniting fi mek ih daans, den da persn skil noh wert notn.
12 Di werdz weh kom owta wahn waiz persn mowt mek adaz hapi, bot wahn schupid persn wahn kaaz chrobl fi ihself bikaaz a di tingz weh ih seh.
13 Di fers ting weh kom owta ih mowt da foolishnis, ahn di laas ting weh ih seh da loan krayzinis weh bring prablemz,
14 bot da schupid persn kantinyu fi taak.
Wahn man noh noa weh wahn hapm, soh hoo ku tel ahn weh wahn hapm afta ih ded?
15 Wahn schupid persn onli taiyad owt ihself wen ih werk haad. Az a mata a fak, ih kyaahnt eevn fain ih way fi goh da di siti.
16 Weh wahn hapm tu di peepl wen dehn king da wahn yong bwai ahn wen di prins dehn eet ahn jrink aal maanin?
17 Peepl wahn bee hapi wen dehn king kohn fahn wahn impoatant famili ahn wen di prins dehn noh eet ahn jrink jos fi geh jronk. Insteda dat dehn eet ahn jrink da di rait taim fi geh bak dehn schrent, bot noh fi geh jronk.
18 If wahn persn layzi bad, di beem dehn fahn ih roof wahn jrap dong. An if ih aidl op ihself, ih roof wahn leek.
19 Food mek peepl geh hapi, ahn wain mek peepl injai laif; bot moni help peepl get evriting weh dehn need.
20 Yu noh fi wish dat sohnting bad hapm tu* di king, nat eevn eena yu main. Ahn yu noh fi wish dat sohnting bad hapm tu* rich peepl wen yu deh eena yu room, bikaaz wahn lee berd mait hyaa weh yu seh ahn ripeet it.
Futnoat
^ Lit., “anda di son.”
^ Dis ku aalso bee “sombadi shuda bee kyaaful wen dehn di chap wud.”
^ Er “Yu noh fi kers.” Si di Glasari, “Kers.”
^ Er “yu noh fi kers.”
