Ikleeziyasteez 12:1-14
12 Wail unu yong, unu fi memba unu Grayt Gaad weh mek evriting. Unu fi memba ahn bifoa di dayz kohn wen unu feel sad an unu di sofa, ahn bifoa di yaaz kohn wen unu wahn seh: “Ah noh hapi wid mi laif.”
2 Yes, memba Gaad bifoa di son, di moon, ahn di staarz geh daak ahn nohmoh lait deh, bifoa di klowd dehn kohn bak afta ih don rayn,
3 bifoa di day kohn wen di wan dehn weh gyaad di hows staat tu chrimbl, wen di man dehn weh schrang staat tu ben dong, wen di laydi dehn stap grain grayn bikaaz da onli lee bit a dehn, ahn wen di laydi dehn weh laik luk chroo windo onli si daaknis.
4 Ahn memba Gaad bifoa di doa dehn weh di fays di schreet kloaz, wen unu bayli hyaa di song a di mil weh peepl yooz fi grain grayn, wen unu get op sayka weh unu hyaa wahn berd di mek naiz, wen di yong gyal dehn di sing, bot unu ku bayli hyaa dehn,
5 wen unu frayd fi deh da wahn hai plays, wen unu frayd dat sohnting bad mait hapm pahn di schreet, wen di almon chree blaasam, wen di graashapa jreg ihself, wen unu eet di froot weh sopoas tu mek unu feel hongri bot unu stil noh geh hongri, bikaaz peepl di waak tu di hows wehpaat dehn wahn liv fi wahn lang taim ahn di peepl weh di moarn di waak bowt pahn di schreet.
6 Ahn memba Gaad bifoa di silva roap bos, bifoa di goal bowl geh krosh, bifoa di jaar weh deh da di spring geh brok op, ahn bifoa di weel weh help pul op waata fahn di wel geh brok op.
7 Afta dat peepl gwehn bak tu di dos, ahn di bret a laif* weh dehn gat gwehn bak da di chroo Gaad weh giv it tu dehn.
8 Di teecha seh: “Aala dat yoosles. Evriting da ways a taim!”
9 Di teecha neva onli geh waiz, bot ih mi kantinyu teech peepl weh ih mi noa. Ih mi tink bowt evriting an ih mi laan lata tingz soh dat ih kuda mi put tugeda wahn lata praverbz.
10 Di teecha mi chrai fain nais werdz, an ih mi chrai rait dong di chroot ahn mek shoar dat weh ih rait dong karek.
11 Di werdz weh waiz peepl seh da laik sohn lang shaap stik, ahn di tingz weh dehn chooz fi seh da laik sohn nayl weh deh deep dong eena wahn pees a wud. Ahn dehn get dehndeh tingz weh dehn seh fahn wan shepad.
12 Mi son, Ah di waan yu bowt dehnya tingz: Peepl wahn aalwayz di rait lata buks, an if yu spen tu moch taim di reed dehn, yu wahn geh taiyad.
13 Afta yu don hyaa evriting weh Ah seh, dis da di moas impoatant ting yu shuda memba: Ga lata rispek fi di chroo Gaad* an obay ih komanment dehn. Dat da di moas impoatant ting weh wahn persn fi du eena ih laif.
14 Di chroo Gaad wahn joj evriting weh peepl du, eevn if da tingz weh adaz kyaahn si. Hihn wahn disaid weda dehndeh tingz gud er bad.
