Ikleeziyasteez 6:1-12
6 Dehn ga sohnting els weh sad* weh Ah si hapm tu lata peepl pahn di ert:*
2 Di chroo Gaad gi wahn persn richiz, mateeryal tingz, an aana, soh dat ih ku gat evriting weh ih waahnt. Bot di chroo Gaad noh alow ahn fi injai dehndeh tingz, eevn doa ih alow wahn schraynja fi injai dehn. Weh hapm tu da persn noh mek no sens ahn da sohnting veri sad.
3 Now wahn man ku ga wahn honjrid pikni, liv fi lata yaaz, ahn geh oal. Bot stilyet, if ih* noh injai di gud tingz weh ih gat bifoa ih goh eena di grayv, den Ah haftu seh dat wahn baybi weh baan ded beta dan hihn.
4 Da baybi baan fi notn. Da laik if ih ded eena daaknis, an ih noh ga wahn naym.
5 Eevn doa ih neva si di son an ih neva noa notn, ih stil deh eena wahn beta sichuwayshan* dan da man.
6 Ih noh mek no sens fi mek wahn persn liv fi too towzn yaaz if ih noh injai ih laif, bikaaz evribadi gwehn da di saym plays.
7 Di onli reezn wahn man werk haad da fi ful ih beli, bot ih* wahn neva feel satisfai.
8 Eena weh way wahn waiz persn beta dan wahn schupid persn? Ahn how wahn poa persn benifit wen ih noa how fi deel wid laif?
9 Ih beta fi injai di tingz weh yu aiy si dan fi waahn tingz weh yu kyaahn get. Eevn dat noh mek no sens, ahn da laik yu di chays afta breez.
10 Eniting weh mi egzis eena di paas don ga wahn naym aredi. An evribadi noa dat wahn hyooman da jos wahn hyooman, an ih kyaahn proov dat ih inosent fronta sombadi weh moa powaful dan ahn.
11 Bikaaz noh mata humoch ih taak, aala ih werdz noh meen notn,* ahn dat noh help nobadi.
12 Wahn persn onli liv fi wahn shaat taim,* an ih disapyaa laik wahn shado. Soh hoo noa wat da di bes ting fi mek wahn persn du joorin di lee bit a taim weh ih liv? Ahn hoo ku tel wahn persn weh wahn hapm pahn di ert afta ih ded?
Futnoat
^ Er “bad.”
^ Lit., “anda di son.”
^ Er “ih soal.” Si di Glasari, “Soal.”
^ Er “ih stil ga moa res.”
^ Er “ih soal.”
^ Dis ku aalso bee “noh mata humoch tingz ih gat, aala ih tingz noh meen notn.”
^ Er “Wahn persn laif noh wert notn.”
