Ikleeziyasteez 8:1-17
8 Hoo reeli ku bee laik wahn waiz man? Hoo gat ansaz tu wahn prablem? If wahn persn waiz, ih wahn luk hapi an ih noh wahn ga wahn seeryos fays nohmoh.
2 Obay weh di king koman, bikaaz yu mi mek wahn vow fronta Gaad.
3 Yu noh fi hori lef fahn fronta di king. Noh du bad tingz, bikaaz hihn ku du eniting weh ih waahnt,
4 ahn nobadi ku kweschan weh di king seh. Nobadi ku aks ahn: “Da weh yoo di du?”
5 Nobadi wahn geh hert if dehn obay weh di king koman dehn fi du. Ahn sombadi wid wahn waiz haat wahn noa weh fi du ahn wat da di rait taim fi du it.
6 Sins hyoomanz ga wahn lata prablemz, dehn need fi deel wid evriting eena di rait way ahn da di prapa taim.
7 Nobadi noh noa weh wahn hapm eena di fyoocha. Dat da wai nobadi ku tel yu how tingz wahn hapm.
8 Jos laik how nobadi ku kanchroal di bret a laif, da rait soh nobadi ku kanchroal wen dehn ded. Jos laik how wahn persn kyaahn aks fi permishan fi goh hoam joorin wahn waar, da rait soh wahn persn haftu fays di kansikwens fi di wikid tingz weh ih du.
9 Ah mi si aala dehndeh tingz, an Ah mi tink bowt evriting weh hapm pahn di ert.* Joorin da hoal taim, peepl rool oava ada peepl ahn dehn onli hert eech ada.
10 Ah si sohnting els weh noh mek no sens: Ah si how dehn beri wikid peepl weh yoostu kom een ahn kom owta di hoali plays, bot afta wahn wail, peepl ferget dehndeh saym peepl weh mi du wikid tingz eena di siti.
11 Wen dehn noh ponish sohnbadi rait away fi di bad tingz weh dehn du, dehn noh wahn frayd fi kantinyu du wikid tingz.
12 Eevn doa wahn sina mait du bad tingz wahn honjrid taimz ahn stil liv lang, Ah noa dat tingz gwehn gud fi peepl weh rispek* di chroo Gaad, bikaaz dehn reeli ga lata rispek far ahn.*
13 Bot tingz noh gwehn gud fi wahn wikid persn, bikaaz ih noh ga no rispek fi Gaad.* Ih laif da laik wahn shado weh disapyaa, an ih kyaahn mek ih laif langa.
14 Dis da sohnting els weh hapm pahn di ert weh noh mek no sens: Peepl chreet raichos peepl laik if dehn du sohnting bad, ahn dehn chreet wikid peepl laik if dehn du gud tingz. Dat noh mek no sens.
15 Ah wuda tel peepl fi injai dehn laif, bikaaz notn beta deh fi du pahn di ert dan fi mek wahn persn eet ahn jrink ahn bee hapi. Ih fi werk haad ahn bee hapi fi aala di dayz a ih laif weh di chroo Gaad giv ahn.*
16 Ah mi werk haad fi geh wizdom soh dat Ah ku andastan evriting weh hapm pahn di ert. Sohntaim, Ah neva eevn ga taim fi sleep joorin di day ner joorin di nait.*
17 Wen Ah tink bowt aala di tingz weh di chroo Gaad du, Ah riyalaiz dat noh mata how haad peepl chrai, dehn kyaahn andastan di tingz weh hapm pahn di ert. Eevn if dehn klaym seh dat dehn waiz, dehn kyaahn andastan it.
Futnoat
^ Lit., “anda di son.”
^ Lit., “fyaa.”
^ Lit., “dehn fyaa hihn.”
^ Lit., “ih noh fyaa Gaad.”
^ Lit., “weh di chroo Gaad giv ahn anda di son.”
^ Dis ku aalso bee “Peepl neva eevn ga taim fi sleep joorin di day er joorin di nait.”
