Ikleeziyasteez 9:1-18
9 Soh Ah mi tink bowt aala dehndeh tingz, an Ah mi riyalaiz dat raichos peepl ahn waiz peepl ahn di tingz weh dehn du deh eena di chroo Gaad hanz. Peepl noh noa humoch ada peepl mi lov ahn hayt eech ada eena di paas.
2 Di saym ting weh wahn hapm tu raichos peepl wahn hapm tu wikid peepl. Di saym ting weh wahn hapm tu hoali peepl wahn hapm tu peepl weh noh hoali. Ahn di saym ting weh wahn hapm tu peepl weh mek sakrifais wahn hapm tu peepl weh noh mek sakrifais. Di saym ting weh wahn hapm tu gud peepl wahn hapm tu peepl weh sin. Ahn di saym ting weh wahn hapm tu sombadi weh mek wahn vow wahn hapm tu sombadi weh frayd fi mek wahn vow.
3 Dis da sohnting sad weh Ah si hapm pahn di ert:* Sins peepl noa dat evribadi wahn ded wan day, dehn aalwayz waahn du bad tingz. Ahn joorin dehn laif, dehn kip di tink bowt du foolish tingz, an afta dat dehn ded.
4 Wen sohnbadi alaiv, dehn ga hoap. Eevn wahn daag weh alaiv beta dan wahn laiyan weh ded.
5 Peepl weh alaiv noa* dat dehn wahn ded, bot peepl weh don ded noh noa notn, dehn noh wahn geh notn,* an evribadi don ferget dehn.
6 Ahn dehn kyaahn lov, hayt, ner jelos enibadi nohmoh. Ahn dehn kyaahn tek paat eena di tingz weh hapm pahn di ert.
7 Goh eet yu food ahn jrink yu wain ahn bee hapi, bikaaz di chroo Gaad hapi wid di tingz weh yu du.
8 Aalwayz mek shoar dat di kloaz weh yu wayr shoa dat yu hapi,* an aalwayz rob ail pahn yu hed.
9 Joorin di shaat taim weh yu liv pahn di ert, yu fi injai yu laif lang wid yu waif weh yu lov ahn yu fi injai aala di dayz weh Gaad gi yu. Dat da yu riwaad eena laif ahn yu riwaad fi yu haad werk weh yu du pahn di ert.
10 Wateva yu du, du it wid aala yu schrent, bikaaz wen yu goh eena di Grayv,* yu wahn kyaahn werk, plan, laan, ner andastan notn.
11 Ah mi tink bowt evriting weh hapm pahn di ert. Ah mi si dat peepl weh ron faas noh aalwayz win di rays, ahn peepl weh schrang noh aalwayz win di waar. An Ah mi si dat waiz peepl noh aalwayz ga food, ahn smaat peepl noh aalwayz geh rich, ahn tingz noh aalwayz ton owt gud fi peepl weh ga nalij, bikaaz tingz weh dehn noh ekspek ku hapm tu dehn enitaim.
12 Ahn peepl noh noa wen dehn wahn ded. Jos laik how peepl yooz wahn net fi kech fish ahn dehn yooz wahn chrap fi kech berd, da rait soh dizaasta kohn pahn peepl sodn-wan laik wahn chrap.
13 Ah mi si how sohnbadi yooz wizdom eena dehn laif,* ahn dat mi impres mi.
14 Dehn mi ga wahn smaal siti weh onli ga lee bit a peepl. Ahn wahn powaful king mi kohn atak di siti ahn sorong it. Den ih mi bil wahn waal rong di siti fi kyapcha it.
15 Eena da siti, dehn mi ga wahn poa man weh mi waiz. Ahn hihn mi yooz ih wizdom fi sayv da siti. Bot nobadi memba da poa man.
16 An Ah seh tu miself: ‘Wizdom beta dan schrent. Eevn soh, peepl noh apreeshiayt di waiz tingz weh da poa man seh, ahn dehn noh lisn tu ahn.’
17 Ih beta fi lisn tu wahn waiz persn weh taak tu yu eena wahn kaam way dan fi mek wahn persn weh rool oava schupid peepl hala aata yu.
18 Wizdom beta dan di wepan dehn weh peepl yooz eena wahn waar, bot sohnbadi weh sin dischrai evriting weh gud.
Futnoat
^ Lit., “anda di son.”
^ Er “kanshos.”
^ Er “geh no pay.”
^ Er “Aalwayz wayr wait kloaz.”
^ Er “Sheeyol,” weh da di Grayv. Si di Glasari, “Grayv.”
^ Lit., “anda di son.”
