Jan 13:1-38
13 Now fahn bifoa di Paasoava festival, Jeezas mi don noa dat di taim kohn fi mek ih lef di werl ahn goh bak da ih Faada. Ahn bikaaz hihn mi lov ih falowaz weh mi deh eena di werl, ih kantinyu fi lov dehn til di en.
2 Dehn mi-di eet di eevnin meel, ahn di Devl mi don put it eena Joodas Iskariyat haat fi bichray Jeezas. Joodas da-mi Saiman son.
3 Jeezas mi noa dat di Faada mi put evriting eena fi hihn han ahn dat hihn mi kohn fahn Gaad ahn gwehn bak wid Gaad.
4 Soh ih get op fahn rong di taybl ahn set ih roab wan said. Den ih tek wahn towil ahn rap it rong ih ways.
5 Afta dat, ih put waata eena wahn baysn ahn staat tu wash ih disaipl dehn fut ahn jrai dehn wid di towil weh mi rap rong ahn.
6 Wen ih get tu Saiman Peeta, Peeta aks ahn: “Laad, yoo wahn wash mai fut?”
7 Jeezas tel ahn: “Yu noh andastan wat Ai di du now, bot yu wahn andastan dehnya tingz laytaraan.”
8 Peeta tel ahn: “Ah wahn neva mek yoo wash mai fut.” Jeezas tel ahn: “Anles Ai wash yu fut, yoo noh bilangz tu mee.”
9 Saiman Peeta tel ahn: “Wel den Laad, noh onli wash mi fut bot wash mi han ahn mi hed tu.”
10 Jeezas tel ahn: “Enibadi weh don bayd onli need fi wash ih fut, bikaaz ih hoal badi don kleen aredi. An unu kleen, bot wan a unu noh kleen.”
11 Yu si, hihn mi don noa da hoo mi wahn bichray ahn. Dats wai ih mi seh: “Wan a unu noh kleen.”
12 Afta Jeezas mi finish wash dehn fut, ih put aan ih roab ahn gaahn sidong rong di taybl ahn tel dehn: “Unu noa wai Ai mi wash unu fut?
13 Unu kaal mi ‘Teecha’ ahn ‘Laad,’ ahn dat karek, kaaz dat da hoo mee.
14 Soh den, if Ai da Laad ahn Teecha, an Ai wash unu fut, den unu fi wash wan anada fut tu.
15 Ai di shoa unu weh fi du, kaaz di saym ting weh Ai du fi unu, unu shuda du fi wan anada.
16 Ah di tel unu di chroot, wahn slayv noh moa impoatant dan ih maasta, ahn wahn mesinja noh moa impoatant dan di wan weh sen ahn.
17 Unu noa dehnya tingz, bot unu wahn hapi if unu du dehn.
18 Ah noh di taak bowt aala unu; Ai noa aala di wan dehn weh Ai chooz. Bot dis hapm soh dat di skripcha ku kohn chroo; ih seh: ‘Di wan weh mi-di eet bred wid mi ton mi enimi.’*
19 Now Ah di tel unu dis soh dat wen ih hapm tu mi, unu wahn noa dat dis skripcha di taak bowt mee.
20 Bileev mi, enibadi weh welkom di persn weh Ai sen, di welkom mee tu. An enibadi weh welkom mee, di welkom di Wan weh sen mee.”
21 Afta Jeezas seh dehnya tingz, ih haat geh hevi hevi, an ih prafesai seh: “Ah di tel unu di chroot, wan a unu wahn bichray mi.”
22 Di disaipl dehn staat luk rong pahn wan anada, kaaz dehn neva noa da wich wan a dehn hihn mi-di taak bowt.
23 Wan a di disaipl, di wan weh Jeezas lov, mi-di sidong kloas tu Jeezas.
24 Soh Saiman Peeta mek sain tu dis disaipl ahn tel ahn: “Tel wi da hoo hihn di taak bowt.”
25 Soh da disaipl leen bak pahn Jeezas ches ahn seh: “Laad, da hoo?”
26 Jeezas seh: “Da di wan weh Ah wahn gi di pees a bred tu.” Soh ih dip di bred eena wahn bowl, an aftawodz ih giv it tu Joodas, di son a Saiman Iskariyat.
27 Afta Joodas tek di pees a bred, Saytan gaan eena ahn. Soh Jeezas tel ahn: “Hori goh du weh yu di plan fi du.”
28 Bot non a di disaipl dehn weh mi-di sidong da di taybl mi noa wai hihn mi tel ahn dat.
29 Som mi tink dat sins Joodas mi-di kip di moni, Jeezas mi-di tel ahn, “Goh bai weh wi need fi di festival,” er dat ih shuda gi sohnting tu di poa peepl.
30 Soh rait afta Joodas geh di pees a bred, ih lef fahn deh. Da mi don nait aredi.
31 Soh afta Joodas lef, Jeezas seh: “Now dehn di giv aana tu di Son a man, ahn dehn di giv aana tu Gaad tu bikaaz a di Son.
32 Gaad ihself wahn aana hihn, an ih wahn du it rait away.
33 Mi frenz, Ah wahn deh wid unu jos wahn lee bit langa. Unu wahn luk fi mi, an Ah wahn tel unu jos laik weh Ah mi tel di Jooz dehn, ‘Weh Ai gwehn, unu kyaahn kom.’
34 Ai di giv unu wahn nyoo komanment: Lov wan anada. Unu mos lov wan anada di saym way Ai lov unu.
35 Evribadi wahn noa dat unu da mai disaipl if unu lov wan anada.”
36 Saiman Peeta aks ahn: “Laad, da wehpaat yu gwehn?” Jeezas tel ahn: “Weh Ai gwehn, yoo kyaahn fala mi now, bot yu wahn ku fala mi layta.”
37 Peeta tel ahn: “Bot Laad, wai Ai kyaahn fala yu now? Ai wahn giv op mi laif* fi yoo.”
38 Jeezas tel ahn: “Yoo redi fi giv op yu laif* fi mee? Ah di tel yu di chroot, bifoa wahn roosta kroa, yoo wahn seh dat yu noh noa mi chree difrent taimz.”
