Jan 14:1-31
14 Jeezas aalso seh: “Noh wori unuself. Ga fayt eena Gaad, ahn ga fayt eena mee tu.
2 Wahn lata spays deh fi stay eena mai Faada hows. Ah neva mi wahn tel unu dat if da neva chroo, ahn da chroo bikaaz Ai gwehn goh pripyaa wahn plays fi unu.
3 Ahn wen Ah goh pripyaa wahn plays fi unu, Ai wahn kohn bak an Ah wahn kehr unu wid mi, soh dat wehpaat Ai deh unu wahn dehdeh tu.
4 Ahn wehpaat Ai gwehn, unu noa di way.”
5 Tamas tel ahn: “Laad, wee noh noa wehpaat yoo gwehn. Soh how wee wahn noa di way?”
6 Jeezas tel ahn: “Ai da di way ahn di chroot ahn di laif. Nobadi ku kohn tu di Faada eksep chroo mee.
7 If unu mi reeli noa mee, unu mi wahn noa di Faada tu; fahn now aan unu noa hihn. In fak, unu don si ahn aredi.”
8 Filip tel ahn: “Laad, shoa wi di Faada, ahn dat wahn bee gud inof fi wi.”
9 Jeezas tel ahn: “Ai deh wid unu fi wahn lang taim aredi, ahn Filip, yoo stil noh noa mee yet? Hooeva si mee, don si di Faada tu. Soh how yoo ku seh, ‘Shoa wi di Faada’?
10 Unu noh bileev dat Ai yoonaitid wid di Faada ahn dat di Faada yoonaitid wid mee? Di tingz weh Ai seh, Ai noh kom op wid pahn mi oan, bot di Faada weh yoonaitid wid mee di du fi hihn wil chroo mee.
11 Ah di tel unu di chroot, Ai yoonaitid wid di Faada ahn di Faada yoonaitid wid mee. Bot if unu noh bileev dat, den bileev wen unu si aala di tingz weh Ah du.
12 Ah di tel unu di chroot, hooeva ga fayt eena mee wahn du di tingz weh Ai du. In fak, ih wahn du eevn grayta tingz dan weh Ai du, bikaaz Ai gwehn bak tu di Faada.
13 Ahn wateva unu aks fa eena mai naym, Ah wahn giv it tu unu, soh dat di Son ku giv aana tu di Faada.
14 If unu aks fi eniting eena mai naym, Ai wahn giv it tu unu.
15 “If unu lov mi, unu wahn obay mi komanment dehn.
16 Ah wahn aks di Faada, ahn hihn wahn giv unu wahn nada helpa* fi deh wid unu fareva.
17 Di helpa da di hoali spirit. Di werl kyaahn get it, bikaaz dehn noh see’t ner noa it. Bot unu noa di spirit bikaaz ih deh eena unu an ih stay wid unu.
18 Ai noh wahn lef unu bai unuself.* Ai wahn kohn bak.
19 Soon di werl noh wahn si mi nohmoh, bot unu wahn si mi, bikaaz Ai wahn liv agen an unu wahn liv agen.
20 Pahn da day, unu wahn noa dat Ai yoonaitid wid mai Faada an unu yoonaitid wid mee an Ai yoonaitid wid unu.
21 Enibadi weh lov mee wahn aksep mai komanment dehn an obay dehn. Ahn mai Faada wahn lov enibadi weh lov mee. An Ai wahn lov da persn ahn help ahn fi noa mi gud.”
22 Joodas, noh Joodas Iskariyat, tel Jeezas: “Laad, wai yu waahn mek wee geh fi noa yu gud; wai yu noh waahn di peepl a di werl noa yu?”
23 Jeezas tel ahn: “If enibadi lov mi, hihn wahn obay weh Ah seh. Ahn mai Faada wahn lov hihn, ahn di too a wi wahn kohn tu da persn, ahn da persn wahn deh wid wi.
24 Hooeva noh lov mi noh obay weh Ah seh. Weh Ai seh da noh mai oan werdz, bot da fahn mai Faada weh sen mi.
25 “Ah di seh dehnya tingz wail Ah stil deh wid unu.
26 Bot di helpa, weh da di hoali spirit, weh di Faada wahn sen eena mai naym, wahn teech unu evriting ahn help unu fi memba aal di tingz weh Ah di tel unu.
27 Ai wahn kantinyu fi giv unu di pees weh unu di injai rait now wid mi. Di pees weh Ai giv unu difrent fahn di pees weh di werl giv unu. Soh noh wori ner bee frayd.
28 Unu mi hyaa wen Ah tel unu, ‘Ah gwehn weh an Ah wahn kohn bak.’ If unu lov mi, unu wuda bee hapi dat Ah gwehn da mi Faada, kaaz di Faada moa powaful dan mee.
29 Soh now, Ah di tel unu bifoa ih hapm, soh dat unu ku bileev wen ih hapm.
30 Ah onli wahn taak wahn lee bit moa wid unu, kaaz di roola a di werl di kom, ahn hihn noh ga no kanchroal oava mee.*
31 Ai du egzakli weh di Faada koman mi fi du, soh dat di werl ku noa dat Ai lov di Faada. Unu get op ahn mek wi goh fahn ya.
Futnoat
^ Di helpa da di hoali spirit weh gi komfert ahn schrent.
^ Er “lef unu laik chiljren widowt payrents.”
^ Er “noh ga no powa oava mee.”
