Jan 15:1-27
15 “Ai da di chroo vain ahn mai Faada da di faama.
2 Hihn kot aaf evri branch fahn mee weh noh di bayr froot, an ih proon* di wan dehn weh di bayr froot, soh dat ih ku bayr moa froot.
3 Unu don kleen aredi sayka di tingz weh Ah seh tu unu.
4 Stay yoonaitid wid mee, an Ai wahn stay yoonaitid wid unu. Kaaz jos laik how wahn branch kyaahn bayr froot anles ih stay jain aan tu di vain, unu kyaahn bayr froot* anles unu stay yoonaitid wid mee.
5 Ai da di vain, an unu da di branch dehn. Di wan weh stay yoonaitid wid mee ahn weh Ai stay yoonaitid wid wahn bayr lata froot, kaaz unu kyaahn du notn widowt mee.
6 Enibadi weh noh stay yoonaitid wid mee wahn bee laik wahn branch weh geh kot aaf ahn jrai op. Ahn peepl wahn gyada op dehndeh branch fi chroa dehn eena di faiya fi mek dehn geh bon op.
7 If unu stay yoonaitid wid mee ahn lisn tu weh Ah tel unu fi du, unu wahn ku aks fi wateva unu waahnt an unu wahn get it.
8 Mai Faada wahn geh di aana if unu kip aan di bayr froot ahn proov dat unu da mai disaipl dehn.
9 Di Faada da hevn lov mee, an Ai lov unu, soh kantinyu fi benifit fahn mai lov.
10 Jos laik how Ai obay mai Faada komanment dehn an Ai kantinyu fi benifit fahn fi hihn lov, if unu obay mai komanment dehn, unu wahn kantinyu fi benifit fahn mai lov.
11 “Ah di tel unu dehnya tingz soh dat unu ku feel di saym jai weh Ai feel ahn geh ful op a da jai.
12 Soh dis da mai komanment: Unu mos lov wan anada jos laik how Ai lov unu.
13 Nobadi ga grayta lov dan di persn weh giv op ih laif* fi ih fren dehn.
14 If unu du weh Ai koman unu fi du, unu wahn bee mai frenz.
15 Ai noh kaal unu slayv nohmoh, kaaz wahn slayv noh noa weh ih maasta di du. Bot Ai kaal unu frenz, bikaaz Ah tel unu evriting weh mai Faada mi tel mi.
16 Unu neva chooz mee, da mee chooz unu soh dat unu ku kantinyu bayr froot. Noh mata weh unu aks di Faada fa eena mai naym, ih wahn giv unu.
17 “Ai di tel unu fi du dehnya tingz soh dat unu ku lov wan anada.
18 If di werl hayt unu, memba dat ih mi hayt mee bifoa ih hayt unu.
19 If unu da-mi laik di peepl a dis werl, dehn wuda laik unu. Bot Ai mi chooz unu, an unu da noh laik dehn, dats wai di peepl a dis werl hayt unu.
20 Memba weh Ah tel unu: Wahn slayv noh moa impoatant dan ih maasta. Soh if dehn mi persikyoot mee, dehn wahn persikyoot unu tu. If dehn lisn tu weh Ai seh, dehn wahn lisn tu weh unu seh tu.
21 Bot dehn wahn du aala dehnya tingz tu unu sayka weh unu da mai disaipl, kaaz dehn noh noa di Wan weh sen mee.
22 If Ai neva kom ahn taak tu dehn, dehn wudn bee gilti a sin. Bot bikaaz Ai deh ya an Ai tel dehn, dehn noh ga no ekskyoos fi dehn sin.
23 Enibadi weh hayt mee, hayt mai Faada tu.
24 If dehn neva si di mirakl dehn weh Ai mi du, weh nobadi els ku du, dehn wudn bee gilti a sin, bot now dehn si mi ahn hayt mee ahn mai Faada.
25 Bot dis mi hapm soh dat weh rait dong eena di Laa ku kohn chroo; ih seh: ‘Dehn hayt mi fi no reezn ataal.’
26 Ah wahn sen wahn helpa fahn mi Faada da hevn fi unu. Da helpa da di spirit a chroot weh kohn fahn di Faada. Wen da helpa kom, ih wahn shoa unu weh da di chroot bowt mee.
27 Den aftawodz, unu mos taak di chroot bowt mee, bikaaz unu deh wid mi fahn di biginin.
