Jan 17:1-26
17 Afta Jeezas seh dehnya tingz, ih luk op da hevn ahn pray: “Faada, di taim kom. Pleez giv aana tu yu son soh dat hihn ku gi yoo aana tu.
2 Yu don gi yu son atariti oava evribadi. Ahn yu du dis soh dat hihn ku giv evalastin laif tu aala di wan dehn weh yoo giv ahn.
3 Ahn di wan dehn weh wahn get evalastin laif need fi get fi noa yoo,* di onli chroo Gaad, ahn di wan weh yu sen, Jeezas Krais.
4 Ai don finish di werk weh yoo gi mee fi du, ahn bikaaz a dat, Ai gi yoo gloari ya pahn di ert.
5 Soh now, Faada, pleez put mi saida yoo ahn gi mi di aana weh Ah mi gat wen Ah mi deh saida yu bifoa di werl* mi egzis.
6 “Di peepl weh yu gi mi fahn owta di werl noa yu naym, kaaz Ai shoa dehn* yu naym. Dehn bilangz tu yoo, ahn yoo gi dehn tu mee, ahn dehn obay weh yoo seh.
7 Now dehn noa dat evriting weh yoo mi gi mi kohn fahn yu.
8 Ahn dehn noa dis bikaaz Ah tel dehn di tingz weh yu tel mi, ahn dehn aksep it ahn now dehn noa fi shoar dat Ai kohn fi reprizent yoo, ahn dehn bileev dat yoo sen mi.
9 Ai noh pray fi di werl, bot Ah di pray fi di wan dehn weh yu gi mi, bikaaz dehn bilangz tu yoo.
10 Evriting weh Ai gat da fi yoo, an evriting weh yoo gat da fi mee, ahn bikaaz a dehn Ai get aana.
11 “Ai wahn soon lef dis werl, bot dehn deh eena di werl an Ai di kohn tu yoo. Soh Hoali Faada, pleez protek dehn fi di sayk a yu naym, di naym weh Ah mi shoa dehn, soh dat dehn ku bee wan* jos laik how wee da wan.*
12 Wen Ai mi deh wid dehn, Ah yoostu protek dehn fi di sayk a yu oan naym, di naym weh Ah mi shoa dehn. An Ai mi protek dehn; Ah neva laas eni a dehn eksep fi di son a dischrokshan. Bot dis mi hapm soh dat di skripcha ku kohn chroo.
13 Now Ai di kohn tu yoo, bot Ah di seh aala dehnya tingz wail Ah stil deh eena dis werl, soh dat dehn ku feel di jai weh Ai gat.
14 Ah tel dehn evriting weh yoo tel mi fi seh, bot di werl hayt dehn. Dehn noh bilangz tu dis werl, jos laik how Ai noh bilangz tu dis werl.
15 “Faada, Ah noh di aks yu fi tek dehn owta di werl. Ah di aks yu fi pleez protek dehn fahn Saytan.*
16 Dehn noh bilangz tu di werl, jos laik how Ai noh bilangz tu dis werl.
17 Yooz yu werd, weh da di chroot, fi mek dehn bee hoali, kaaz fi yoo werd da di chroot.
18 Jos laik how yu mi sen mi intu di werl, Ai di sen dehn intu di werl tu.
19 Ai di kip miself hoali fi dehn, soh dat di chroot ku aalso help dehn fi bee hoali.
20 “Ai noh onli di pray fi dehn, bot Ah di pray fi evribadi weh ga fayt eena mee afta dehn lisn tu fi dehn teechin.
21 Ah pray dat dehn ku bee yoonaitid, jos laik how yoo, Faada, yoonaitid wid mee an Ai yoonaitid wid yoo. Help dehn fi bee yoonaitid wid wee, soh dat di werl ku bileev dat da yoo sen mi.
22 Ai gi dehn di saym rispek weh yoo gi mi, soh dat dehn ku bee wan jos laik how wee da wan.
23 Ai yoonaitid wid dehn, ahn yoo yoonaitid wid mee; eena dis way, wi ku ga perfek yooniti.* Den di werl wahn noa dat da yoo sen mi, ahn dat yu lov dehn jos laik how yu lov mee.
24 Faada, Ah waahn aks yu fi di wan dehn weh yoo mi gi mi. Ah wuda waahn dat weh Ai deh, dehn kuda deh tu, soh dat dehn ku si di gloari weh yoo gi mi fahn eevn bifoa eni chiljren* mi baan pahn dis ert.
25 Raichos Faada, di werl reeli noh noa yoo, bot Ai noa yu, ahn di wan dehn weh yoo gi mi noa dat yu sen mi.
26 Ah teech dehn bowt yu naym, an Ah wahn kantinyu fi teech dehn, soh dat dehn ku shoa lov tu ada peepl jos laik how yoo shoa lov tu mee, ahn soh dat Ah ku bee yoonaitid wid dehn.”
Futnoat
^ Er “need fi tek een nalij bowt yoo.”
^ Er “bifoa hyoomanz.”
^ Er “Ai mek dehn noa.”
^ Er “yoonaitid.”
^ Er “wee yoonaitid.”
^ Lit., “fahn di wikid wan.”
^ Er “kompleet yooniti.”
^ Dis di rifaa tu Adam ahn Eev chiljren.
