Jan 18:1-40
-
Joodas bichray Jeezas (1-9)
-
Peeta haal owt wahn soad (10, 11)
-
Dehn kehr Jeezas tu Anas (12-14)
-
Di fers taim Peeta disoan Jeezas (15-18)
-
Wen Jeezas mi deh fronta Anas (19-24)
-
Di sekant ahn terd taim Peeta disoan Jeezas (25-27)
-
Wen Jeezas mi deh fronta Pailat (28-40)
-
“Mai Kingdom noh bilangz tu dis werl” (36)
-
18 Afta Jeezas mi seh dis pryaa, ih gaahn wid ih disaipl dehn tu di gyaadn weh mi deh kraas di Kijron Vali.*
2 Now Joodas, di wan weh mi wahn bichray ahn, mi noa wehpaat dis plays mi deh tu, kaaz Jeezas yoostu meet deh wid ih disaipl dehn.
3 Soh Joodas gaahn deh lang wid wahn groop a soaljaz an aafisaz weh di cheef prees ahn Farisee dehn mi sen wid ahn. Dehn mi kehr sohn lait ahn sohn wepan.
4 Ahn sins Jeezas mi noa weh aal mi wahn hapm tu ahn, ih step faawod ahn seh: “Da hoo unu di luk fa?”
5 Dehn tel ahn: “Jeezas di Nazareen.” Jeezas tel dehn: “Ai da di wan weh unu di luk fa.” Now Joodas, di wan weh mi wahn bichray ahn, mi-di stan op lang wid dehn tu.
6 Bot wen Jeezas tel dehn, “Ai da di wan weh unu di luk fa,” dehn step bak ahn dehn jrap pahn di grong.
7 Soh Jeezas aks dehn agen: “Da hoo unu di luk fa?” Dehn seh: “Jeezas di Nazareen.”
8 Jeezas tel dehn: “Ah tel unu aredi dat Ai da di wan weh unu di luk fa. Soh if da mee unu di luk fa, mek mi disaipl dehn goh.”
9 Dis mi hapm soh dat weh Jeezas mi seh kuda mi kohn chroo; ih mi seh: “Owta aala dehn wan weh yu gi mi, Ah neva laas eni a dehn.”
10 Den Saiman Peeta haal owt di soad weh ih mi gat, an ih chap aaf di rait ayz a di slayv a di hai prees. Di naym a di slayv da-mi Malkos.
11 Bot Jeezas tel Peeta: “Put bak yu soad. Yoo tink dat Ai noh fi jrink fahn owta di kop weh di Faada gi mee?”
12 Den di soaljaz ahn di militeri komanda ahn di aafisa dehn weh di Jooz mi sen, ares Jeezas ahn tai op ih han dehn.
13 Ahn dehn kehr ahn tu Anas fers, kaaz hihn da-mi Kaiyafas faada-in-laa. Kaiyafas da-mi di hai prees fi da yaa.
14 In fak, Kaiyafas da-mi di saym wan weh mi advaiz di Jooz ahn tel dehn dat ih mi beta fi mek wan man ded fi di peepl.
15 Now Saiman Peeta ahn wahn nada disaipl mi-di fala Jeezas. Ahn da disaipl mi noa di hai prees, soh hihn gaan een wid Jeezas tu di koatyaad a di hows a di hai prees,
16 bot Peeta stay owtsaid di stan op bai di doa.* Soh di ada disaipl weh mi noa di hai prees gaahn bak ahn taak tu di servant gyal weh mi-di gyaad di doa, ahn da soh Peeta kom een.
17 Den di servant gyal weh mi-di gyaad di doa tel Peeta: “Yoo da noh wan a dis man disaipl dehn tu?” Peeta seh: “No, Ai da noh wan a dehn.”
18 Now di slayv an aafisa dehn mi mek wahn faiya fi waam dehnself bikaaz ih mi koal. Ahn Peeta mi-di stan op rong di faiya fi waam ihself tu.
19 Soh di cheef prees kweschan Jeezas bowt ih disaipl dehn ahn bowt weh ih teech.
20 Jeezas tel ahn: “Ai mi preech tu di peepl eena poblik. Ai mi aalwayz teech eena di sinagag ahn templ weh aala di Jooz kohn fi meet, an Ah neva seh notn eena seekrit.
21 Soh wai unu di kweschan mi now? Kweschan dehn wan weh mi hyaa weh Ah mi preech bowt. Dehn noa weh Ah mi seh.”
22 Afta Jeezas seh dis, wan a di aafisa dehn weh mi deh kloas tu ahn slap ahn eena ih fays ahn seh: “Da soh yoo taak tu di cheef prees?”
23 Jeezas tel ahn: “If Ah seh sohnting rang, tel mi weh Ah seh rang; bot if weh Ah seh rait, wai yu slap mi?”
24 Den Anas sen ahn weh tu Kaiyafas di hai prees wid ih too han tai op.
25 Meenwail, Saiman Peeta mi stil deh bai di faiya di waam ihself. Den dehn tel ahn: “Yoo da noh wan a fi hihn disaipl dehn tu?” Hihn dinai it ahn seh: “No, Ai da noh wan a dehn.”
26 Afta dat, wan a di slayv dehn a di hai prees seh: “Da neva yoo Ai si eena di gyaadn wid ahn?” Yu si, dis slayv da-mi famili tu di man weh Peeta mi chap aaf ih ayz.
27 Bot Peeta mi dinai it agen, ahn saym taim wahn roosta kroa.
28 Erli di neks maanin, dehn kehr Jeezas fahn Kaiyafas hows tu di govna hows. Bot di Jooz neva gaan eensaid, kaaz dehn mi waahn stay kleen eena Gaad sait fi eet di Paasoava meel.
29 Soh Pailat gaan owt tu dehn ahn seh: “Wat da unu akyoozayshan gens dis man?”
30 Dehn seh: “If dis man da neva wahn kriminal, wee wudn han ahn oava tu yu.”
31 Soh Pailat tel dehn: “Unu kehr ahn an joj ahn fi unuself akaadn tu unu laa.” Di Jooz tel ahn: “Wee noh ga di atariti fi kil enibadi.”
32 Dis mi hapm soh dat weh Jeezas mi seh bowt di way dehn mi wahn kil ahn kuda kohn chroo.
33 Soh Pailat gaan eena di palis agen ahn kaal Jeezas tu ahn, an aks ahn: “Yoo da di King a di Jooz?”
34 Jeezas aks ahn: “Yoo di aks dis bikaaz yu reeli waahn noa, er bikaaz adaz tel yu bowt mi?”
35 Pailat seh: “Yoo noa dat Ai da noh wahn Joo. Da di peepl fahn yu oan nayshan ahn di cheef prees dehn di han yu oava tu mi. Tel mi, da weh yu du?”
36 Jeezas seh: “Mai Kingdom noh bilangz tu dis werl. If mai Kingdom da-mi paat a dis werl, den mai falowaz wuda mi fait fi mek dehn noh han mi oava tu di Jooz. Bot mai Kingdom da noh fahn dis werl.”
37 Soh Pailat aks ahn: “Wel den, yoo da wahn king?” Jeezas tel ahn: “Yu rait wen yu seh dat. Ahn di reezn wai Ah mi baan ahn kom eena di werl da fi taak bowt di chroot. Evribadi weh liv akaadn tu di chroot lisn tu weh Ai seh.”
38 Pailat aks ahn: “Ih pasabl fi noa di chroot?”
Afta ih seh dat, ih gaahn bak owtsaid tu di Jooz ahn tel dehn: “Ai noh fain no reezn fi akyooz ahn.
39 Moroava, unu ga wahn kostom weh Ai fi let goh wahn prizna tu unu da evri Paasoava. Soh unu waahn mek Ah set free di King a di Jooz?”
40 Dehn hala: “No, noh dis man. Let goh Baraabas!” Now Baraabas da-mi wahn teef.
Futnoat
^ Dis da-mi wahn rivabed weh mi jrai moas a di taim eksep joorin di winta seezn wen ih rayn wahn lat.
^ Er “di enchrans.”
