Jan 19:1-42
19 Soh Pailat tel di soaljaz fi kehr Jeezas ahn flag ahn.*
2 Ahn dehn mek wahn krong owta prikl ahn put it pan ih hed, den dehn put wahn perpl roab pan ahn.
3 Now dehn staat tu tek ahn mek papishoh; dehn mi-di goh op tu ahn an seh: “Lang liv di King a di Jooz!” Ahn dehn stay mi-di slap ahn eena ih fays.
4 Pailat gaan owtsaid agen ahn tel di krowd: “Ai di bring hihn owt ya fi mek unu noa dat Ah noh fain no reezn fi akyooz dis man.”
5 Soh Jeezas gaan owtsaid di wayr di perpl roab ahn di krong weh mek owta prikl. Ahn Pailat tel di krowd: “Si di man ya!”
6 Bot wen di cheef prees ahn di aafisa dehn si ahn, dehn hala owt: “Nayl ahn* pahn di stayk! Nayl ahn* pahn di stayk!” Pailat tel dehn: “Unu kehr ahn an kil ahn unuself, kaaz Ah noh fain no reezn fi akyooz dis man.”
7 Di Jooz tel ahn: “Wee ga wahn laa, an akaadn tu datdeh laa, hihn dizerv fi ded, bikaaz hihn mi klaym fi bee Gaad son.”
8 Wen Pailat hyaa weh dehn mi-di seh, hihn get eevn moa frayd.
9 An ih gaahn bak eena di palis an aks Jeezas: “Wehpaat yoo kohn fram?” Bot Jeezas neva ansa ahn.
10 Pailat tel ahn: “Soh, yu noh wahn ansa mi? Yoo noh noa dat Ai ga atariti fi eeda set yoo free er kil yu?”*
11 Jeezas ansa ahn an seh: “Yoo wudn ga eni atariti oava mee anles Gaad gi yu di atariti. Dat da wai di man weh mi han mee oava tu yoo ga moa sin dan yoo.”
12 Soh bikaaz a dis, Pailat mi chrai fi fain wahn way fi free Jeezas, bot di Jooz dehn hala owt: “If yoo free dis man, yoo da noh Seeza fren. Enibadi weh kaal ihself wahn king di taak gens Seeza.”
13 Afta Pailat hyaa dat, ih bring Jeezas owtsaid, an ih sidong pahn di jojment seet da wahn plays weh naym Stoan Payvment; an eena di Heebroo langwij ih naym Gabata.
14 Now da mi di day wen di Jooz pripyaa fi di Sabat; da mi bowt 12 aklak* eena di aftanoon. Den Pailat tel di Jooz: “Luk! Dis da unu king!”
15 Bot di peepl dehn hala: “Kil ahn! Kil ahn! Nayl ahn* pahn di stayk!” Den Pailat aks dehn: “Unu waahn Ai kil fi unu king?” Di cheef prees dehn ansa seh: “Wi noh ga no ada king; fi wee king da Seeza.”
16 Den Pailat han ahn oava tu dehn fi mek dehn nayl ahn pahn di stayk.
Soh den, dehn kehr Jeezas.
17 Dehn mek Jeezas kehr ih oan taacha stayk* tu wahn plays weh naym, eena Heebroo, Golgota, weh meen Skol.
18 Dat da wehpaat dehn nayl Jeezas pahn di stayk. Dehn put ahn bitween too ada man.
19 Den Pailat rait wahn taitl pahn wahn pees a boad ahn put it pahn di taacha stayk.* Ih rait: “Jeezas di Nazareen, di King a di Jooz.”
20 Wahn lata di Jooz mi geh fi reed dis taitl, bikaaz di plays weh dehn mi nayl Jeezas pahn di stayk mi deh kloas tu di siti. Di taitl mi deh eena Heebroo, Latin, ahn Greek.
21 Bot di Jooish cheef prees dehn tel Pailat: “Noh rait, ‘Di King a di Jooz;’ rait dat hihn seh, ‘Ai da di King a di Jooz.’”
22 Pailat tel dehn: “Ah noh wahn chaynj weh Ah don rait.”
23 Now afta di soalja dehn nayl Jeezas pahn di stayk, dehn tek ih koat ahn kot it eena foa pees ahn shayr it monks dehnself, eech wan a di soalja dehn get wahn pees. Den dehn tek wahn roab weh ih mi gat aan anda ih koat. Bot dis roab neva ga wahn seem; ih mi mek owta wan pees a klaat weh dehn weev fahn tap tu batam.
24 Soh dehn seh tu wan anada: “Noh mek wi tayr it, bot mek wi chroa sohnting laik wahn dais* ahn si hoo wahn get it.” Bot dis mi hapm soh dat di skripcha ku kohn chroo weh seh: “Dehn shayr op mi kloaz monks dehnself, ahn dehn gyambl oava mi kloaz.” Soh di tingz weh dehndeh soalja mi du da-mi egzakli weh di skripcha seh dehn mi wahn du.
25 Now Jeezas ma an ih ma sista, lang wid Mayri, di waif a Klopas, ahn Mayri Magdaleen mi-di stan op bai di taacha stayk* weh Jeezas mi deh pan.
26 Soh wen hihn si ih ma ahn di disaipl weh ih lov di stan op deh, ih tel Mayri: “Ma, fahn now aan hihn da yu son!”
27 Den ih tel di disaipl: “Fahn now aan shee da yu ma!” Soh da day, di disaipl kehr ahn tu fi hihn hows.
28 Bai den Jeezas mi noa dat hihn mi don du evriting weh ih Faada mi aks ahn fi du. Den ih seh: “Ah feel tersti.” Ih seh dis soh dat di skripcha ku kohn chroo.
29 Wahn klay jaar wid sowa wain mi dehdeh. Soh dehn put wahn sponj pahn wahn stik* ahn dip it eena di sowa wain ahn put it da ih mowt.
30 Wen Jeezas tays di sowa wain, ih seh: “Now, Ah don du evriting weh yu aks mi fi du!” Den ih bow ih hed ahn ded.*
31 Da day da-mi wen di Jooz mi-di pripyaa fi di Sabat, soh dehn aks Pailat fi mek di soaljaz brok di fut dehn a di chree man pahn di stayk, ahn fi mek dehn tek dong di badi dehn, kaaz dehn neva waahn lef di badiz pahn di taacha stayk pahn di Sabat (kaaz da mi wahn grayt Sabat day).
32 Soh di soalja dehn kom ahn brok di fut dehn fahn di fers man, ahn den dehn gaahn tu di ada man, weh mi deh saida Jeezas pahn di stayk, ahn brok fi hihn too fut tu.
33 Bot wen dehn get tu Jeezas, dehn si dat ih mi don ded, soh dehn neva brok ih fut dehn.
34 Bot wan a di soalja dehn tek wahn spyaa ahn stab ahn eena ih said, ahn rait away blod ahn waata kom owt.
35 Ahn di persn weh mi see’t ku proov dat dis da chroo; ahn hihn noa dat weh hihn seh da chroo. Hihn seh dehnya tingz soh dat unu ku bileev tu.
36 In fak, dehnya tingz mi hapm soh dat di skripcha ku kohn chroo. Da skripcha seh: “Dehn neva brok* non a fi hihn boan dehn.”
37 Ahn wahn nada skripcha seh: “Dehn wahn luk tu di wan weh dehn stab.”
38 Afta dis, Joazef fahn Arimateeya aks Pailat if hihn ku tek dong Jeezas badi, ahn Pailat tel ahn fi goh hed ahn du it. Joazef da-mi wahn disaipl a Jeezas, bot bikaaz ih mi frayd fi di Jooz ih neva tel nobadi bowt it. Soh ih gaan ahn tek dong Jeezas badi ahn kehr it.
39 Dehn mi ga wahn man weh mi naym Nikodeemos weh mi reech deh tu; hihn da-mi di saym wan weh mi gaahn vizit Jeezas joorin di nait wahn taim. Now hihn kom ahn bring wahn mikscha a mer* an aloaz weh mi way bowt wahn honjrid pong.*
40 Soh di too a dehn tek dong Jeezas badi ahn rap it op eena linen klaat wid sohn sweet perfyoom ail. Dehn pripyaa ih badi di way di Jooz yoostu du it.
41 Now wahn gyaadn mi deh kloas tu di plays weh dehn mi kil Jeezas.* Ahn wahn nyoo toom* mi deh eena da gyaadn.
42 Bikaaz da mi di day wen di Jooz pripyaa fi di Sabat ahn di toom* mi deh soh kloas, dehn put Jeezas badi een deh.
Futnoat
^ Er “ahn wip ahn.” Si di Glasari, “Wip.”
^ Er “Kil ahn.”
^ Er “Kil ahn.”
^ Er “kil yu pahn di stayk?”
^ Lit., “di siks owa.”
^ Er “Kil ahn.”
^ Si di Glasari, “Taacha stayk.”
^ Si di Glasari, “Taacha stayk.”
^ Si di Glasari, “Lats.”
^ Si di Glasari, “Taacha stayk.”
^ Lit., “hisop.” Si di Glasari, “Hisop.”
^ Lit., “an ih giv op ih spirit.”
^ Er “krosh.”
^ Si di Glasari, “Mer.”
^ Dis di rifaa tu wahn honjrid Roaman pong.
^ Er “kil Jeezas pahn di stayk.”
^ Er “memoaryal toom.”
^ Er “memoaryal toom.”
