Jan 2:1-25
2 Too dayz layta, wahn marij fees mi tek plays da Kayna, weh deh eena Gyalilee, ahn Jeezas ma mi dehdeh.
2 Jeezas ahn fi hihn disaipl dehn mi geh invaitid tu di marij fees tu.
3 Wen di wain mi soon don, Jeezas ma tel ahn: “Dehn noh ga nohmoh wain.”
4 Bot Jeezas tel ahn: “Ahn weh dat ga fi du wid mee? Di taim noh kohn yet fi mek Ah shoa peepl da hoo mee.”
5 Ih ma tel di wan dehn weh mi-di serv: “Du wateva hihn tel unu fi du.”
6 Now siks stoan jaar mi dehdeh, an eech a dehn kuda mi hoal bowt 12 tu 17 gyalan* a waata. Dehn jaar mi dehdeh bikaaz a di Jooish kleenin chradishan.
7 Jeezas tel dehn: “Ful op di jaar dehn wid waata.” Soh dehn ful dehn op tu di rim.
8 Den ih tel dehn: “Now tek owt som ahn kehr it tu di man weh in chaaj a di fees.” Soh dehn kehr it.
9 Den di man in chaaj a di fees tays di waata weh mi ton intu wain. Hihn neva noa wehpaat di wain mi kohn fram (eevn doa di servant dehn weh mi tek owt di waata mi noa), soh hihn kaal di braidgroom
10 ahn tel ahn: “Evribadi els serv di bes wain fers, ahn wen di peepl geh jronk, dehn serv di cheep wain. Bot yoo di serv di bes wain til now.”
11 Jeezas mi du ih fers mirakl da Kayna, weh deh eena Gyalilee. An eena dis way hihn mi shoa ih powa, ahn fi hihn disaipl dehn mi staat bileev eena ahn.
12 Afta dis, Jeezas, ih ma, ih breda dehn, an ih disaipl dehn mi gaahn dong tu Kapernyam, bot dehn neva stay deh fi wahn lang taim.
13 Now da mi nayli taim fi mek di Jooz selibrayt di Paasoava, ahn Jeezas gaan op tu Jeroosalem.
14 Ahn wen ih gaan eena di templ, ih fain peepl di sel kyatl, sheep, ahn dov, an ih eevn si di peepl weh chaynj moni di sidong deh.
15 Soh ih tek sohn roap ahn mek wahn wip, den ih chays aala di peepl dehn fahn owta di templ, lang wid dehn sheep ahn kyatl. Ahn hihn skyata aala di moni fahn di peepl weh chaynj moni, an ih ton oava dehn taybl.
16 Ahn hihn tel dehn wan weh sel dov: “Kehr dehnya tingz owt fahn ya! Mai Faada hows da noh wahn plays fi du bizniz!”*
17 Wen ih disaipl dehn si dat, dehn memba weh rait dong eena di skripcha: “Di lov weh Ah gat fi yu hows wahn bee laik wahn faiya weh di bon eensaida mi.”
18 Soh di Jooz dehn aks ahn: “Weh sain yoo ku shoa wi fi proov dat yoo ga di rait fi du dehnya tingz?”
19 Jeezas tel dehn: “Unu brok dong dis templ, an eena chree dayz Ah wahn bil it op bak.”
20 Den di Jooz tel ahn: “Ih mi tek 46 yaaz fi bil dis templ, ahn now yoo wahn bil it op bak eena chree dayz?”
21 Bot wen Jeezas mi-di taak bowt di templ, hihn akchwali mi-di rifaa tu ih badi.
22 Wen Jeezas mi rayz op bak fahn di ded, fi hihn disaipl dehn mi memba dat hihn yoostu seh dat. Soh dehn bileev weh di skripcha seh ahn weh Jeezas mi seh.
23 Wen Jeezas mi deh da Jeroosalem, hihn mi du wahn lata mirakl joorin di Paasoava festival, ahn wen di peepl mi si dat, dehn bileev eena ahn.
24 Bot Jeezas neva chros dehn, bikaaz hihn mi noa weh deh eena dehn haat.
25 Ahn hihn neva need nobadi fi tel ahn bowt how peepl tink, kaaz hihn noa weh deh eena wahn persn haat.
Futnoat
^ Wan jaar mi praabli hoal too er chree baat. Wan baat mi eekwal tu bowt 5.81 gyalan (22 L).
^ Er “wahn maakit.”
