Jan 21:1-25
21 Afta dis Jeezas apyaa tu ih disaipl dehn agen kloas tu di See a Taibeeryos. Ih mi apyaa tu dehn dis way:
2 Saiman Peeta, Tamas (weh peepl mi aalso kaal di Twin), Natanyel weh da-mi fahn Kayna eena Gyalilee, Zebidee too son, ahn too moa a Jeezas disaipl mi deh tugeda bai di See.
3 Den Saiman Peeta tel dehn: “Ai gwehn fishin.” Dehn tel ahn: “Wi gwehn wid yu tu.” Soh aala dehn get eena di boat, bot dehn neva kech notn aal nait.
4 Now da mi erli maanin, day mi jos di kom een ahn Jeezas mi-di stan op pahn di beech, bot di disaipl dehn neva noa dat da mi Jeezas.
5 Den Jeezas tel dehn: “Mi frenz, unu ga eniting* fi eet?” Dehn seh: “No, wi noh ga notn.”
6 Ih tel dehn: “Chroa een unu net pahn di rait said a di boat an unu wahn kech sohn fish.” Soh dehn chroa een dehn net, bot dehn kudn eevn haal it op bikaaz a weh dehn kech soh moch fish.
7 Den di disaipl weh Jeezas lov tel Peeta: “Da di Laad!” Now wen Saiman Peeta hyaa dat da mi di Laad, ih put aan ih jakit, kaaz ih mi tek it aaf, an ih jomp eena di see.
8 Bot di ada disaipl dehn stay eena di smaal boat ahn fala bihain wail dehn mi-di jreg di net ful a fish, kaaz dehn mi onli deh bowt 300 feet* fahn di shoar.
9 Wen dehn reech di shoar, dehn si fish di kuk pahn wahn faiya, ahn sohn bred mi dehdeh tu.
10 Jeezas tel dehn: “Bring wahn fyoo a dehn fish weh unu jos kech.”
11 Soh Saiman Peeta get eena di boat, ahn haal di net ful a big fish tu di ej a di See. An eevn doa da mi 153 fish eena di net, ih neva bos.
12 Jeezas tel dehn: “Unu kohn eet.” Nat wan a di disaipl dehn mi ga di korij fi aks ahn da hoo hihn, bikaaz dehn mi don noa dat da mi di Laad.
13 Jeezas pik op di bred ahn gi dehn fi mek dehn eet, an ih du di saym ting wid di fish.
14 Dis da-mi di terd taim now dat Jeezas apyaa tu di disaipl dehn afta ih mi rayz op bak fahn di ded.
15 Wen dehn mi don eet, Jeezas aks Saiman Peeta: “Saiman son a Jan, yoo lov mi moa dan aala dehnya tingz?” Ih tel Jeezas: “Yes, Laad, yu noa Ah lov yu.” Jeezas tel ahn: “Wel, feed mi lee sheep dehn.”
16 Den Jeezas aks ahn wahn sekant taim: “Saiman son a Jan, yoo lov mi?” Peeta ansa seh: “Yes, Laad, yoo noa dat Ai lov yu.” Ih tel ahn: “Den leed mi lee sheep dehn di way wahn shepad wuda leed dehn.”
17 Jeezas aks ahn wahn terd taim: “Saiman son a Jan, yoo lov mi?” Peeta staat tu feel sad kaaz dis da-mi di terd taim Jeezas aks ahn: “Yoo lov mi?” Soh ih tel ahn: “Laad, yoo noa evriting ahn yu noa dat Ai lov yu.” Den Jeezas tel ahn: “Feed mi lee sheep dehn.
18 Ah di tel yu, wen yu mi yonga, yu kuda mi put aan yu oan kloaz ahn goh eniway weh yu waahn goh. Bot wen yu geh oal, yu wahn rayz op yu han dehn ahn sombadi els wahn help yu fi put aan yu kloaz ahn dehn wahn kehr yu weh yu noh eevn waahn goh.”
19 Jeezas mi seh dis soh dat Peeta kuda mi noa dat di kaina det weh hihn mi wahn fays wuda bring aana tu Gaad. Afta ih seh dis, ih tel Peeta: “Kantinyu fi fala mi.”
20 Peeta ton rong ahn si di disaipl weh Jeezas lov di fala dehn, di saym wan weh mi leen bak pahn Jeezas ches joorin di eevnin meel an aks: “Laad, da hoo wahn bichray yu?”
21 Soh wen Peeta kech sait a da disaipl, ih aks Jeezas: “Laad, weh wahn hapm tu hihn?”
22 Jeezas tel ahn: “Wai yoo waahn noa dat? Wat if Ai waahn hihn liv til Ai kohn bak? Bot yoo doh, kantinyu fi fala mi.”
23 Soh di bradaz staat tu seh monks dehnself dat dis disaipl neva mi wahn ded. Bot Jeezas neva seh dat ih wudn ded. Ih mi seh: “Wai yoo waahn noa dat? Wat if Ai waahn hihn liv til Ai kohn bak?”
24 Da disaipl da di wan weh ku gi proof bowt aala dehnya tingz, ahn hoo mi rait dong dehnya tingz, ahn wi noa dat weh hihn seh da chroo.
25 In fak, lat moa tingz deh weh Jeezas mi du. If dehn mi rait dong evri lee deetayl, di werl wudn ga spays fi kip aala dehndeh skroal.
