Jan 5:1-47
5 Afta dis, di Jooz mi ga wahn festival, ahn Jeezas gaan op tu Jeroosalem.
2 Now wahn pool, weh dehn kaal eena Heebroo Betzayta, mi deh kloas tu di Sheep Gayt eena Jeroosalem, ahn dis pool mi ga faiv waakway* rong it.
3 Lata peepl weh mi sik, blain, kripl, ahn paralaiz mi dehdeh di lidong pahn di floa.
4 *——
5 Bot wahn man mi dehdeh weh mi sik fi 38 yaaz.
6 Wen Jeezas si dis man di lidong, hihn mi don noa dat di man mi sik fi wahn lang taim. Soh Jeezas aks ahn: “Yoo noh waahn geh beta?”
7 Di man weh mi sik tel ahn: “Ser, Ai noh ga nobadi fi help mi get eena di pool wen di waata geh ster op. Evritaim Ah chrai get een, sombadi els step dong heda mi.”
8 Jeezas tel ahn: “Get op! Pik op yu schrecha ahn waak.”
9 Ahn rait away di man geh heel, an ih pik op ih schrecha ahn staat tu waak.
Da day da-mi di Sabat.
10 Soh di Jooish leedaz staat tu tel di man weh geh heel: “Tudeh da di Sabat; ih noh rait fi mek yu bak yu schrecha.”
11 Bot hihn tel dehn: “Di saym persn weh heel mi tel mi, ‘Pik op yu schrecha ahn waak.’”
12 Dehn aks ahn: “Da hoo mi tel yu fi pik op yu schrecha ahn waak?”
13 Bot di man weh geh heel neva noa da hoo heel ahn, kaaz Jeezas mi don lef fahn deh.
14 Afta dis, Jeezas meet di man eena di templ an ih tel ahn: “Now dat yu geh heel, noh sin nohmoh, er els sohnting wers ku hapm tu yu.”
15 Den di man gaan ahn tel di Jooish leedaz dat da mi Jeezas heel ahn.
16 Wel sayka dis, di Jooish leedaz staat tu haraas Jeezas, kaaz hihn mi-di du dehnya kaina ting pahn di Sabat.
17 Bot Jeezas tel dehn: “Mai Faada stil di werk til now, ahn dat da wai Ai kip aan di werk tu.”
18 Wen di Jooish leedaz hyaa dat, dehn mi waahn kil ahn eevn moa, kaaz dehn mi tink dat hihn mi-di brok di Sabat ahn dat hihn mi waahn peepl tink dat hihn eekwal tu Gaad wen ih seh dat Gaad da ih Faada.
19 Soh Jeezas tel dehn: “Bileev mi, di Son kyaahn du wahn singl ting pan ih oan. Hihn onli ku du weh ih si di Faada du. Kaaz wateva di Faada du, dehnya da di tingz weh di Son du.
20 Di Faada lov* di Son ahn shoa ahn evriting weh hihn ihself du, ahn hihn wahn shoa ahn grayta tingz dan weh unu si ya, soh dat unu wahn geh sopraiz fi chroo.
21 Kaaz jos laik how di Faada rayz op peepl fahn di ded ahn gi dehn laif, saym way soh, di Son wahn gi laif tu enibadi weh hihn waahn giv it tu.
22 Di Faada noh joj nobadi, bot hihn gi di Son aal di atariti fi joj,
23 soh dat evribadi ku aana di Son jos laik how dehn aana di Faada. Enibadi weh noh aana di Son noh aana di Faada weh sen ahn.
24 Bileev mi, enibadi weh lisn tu weh Ai seh, ahn bileev di Wan weh sen mi, wahn geh evalastin laif. Da persn noh wahn geh joj, kaaz hihn da laik wahn man weh mi ded bot now ih kohn tu laif.
25 “Bileev mi, di taim di kom, an ih don deh ya, wen peepl weh ded wahn hyaa di vais a di Son a Gaad, ahn di wan dehn weh lisn tu weh ih seh wahn liv.
26 Kaaz jos laik how di Faada ga di powa fi gi laif, saym way soh, hihn gi di Son di powa fi gi laif.
27 Ahn hihn giv ahn atariti fi joj, kaaz hihn da di Son a man.
28 Unu noh geh sopraiz bikaaz a weh Ah jos seh, kaaz di taim di kohn wen aala di wan dehn weh deh eena di toom dehn* wahn hyaa fi hihn vais
29 ahn kom owt. Di peepl weh du gud tingz wahn geh evalastin laif,* bot di peepl weh du bad tingz wahn geh joj.*
30 Ai kyaahn du wahn singl ting pahn mi oan. Ai joj peepl akaadn tu weh di Faada tel mi. Ahn mai jojment raichos, bikaaz Ah noh du weh Ai waahn, bot Ah du di wil a di Wan weh sen mi.
31 “If da onli mee wan tel peepl bowt miself, dehn noh wahn bileev weh Ah seh.
32 Bot sombadi els* deh weh witnis bowt mi, an Ah noa dat weh hihn seh bowt mi da chroo.
33 Unu sen sohn man fi aks Jan bowt mi, ahn weh hihn tel unu da di chroot.
34 Ai noh need fi pen pahn di witnis weh peepl gi bowt mee, bot Ah di seh dehnya tingz soh dat unu ku geh sayv.
35 Jan da-mi laik wahn lamp weh mi-di bon ahn shain brait, ahn fi wahn shaat wail unu mi waahn rijais eena fi hihn lait.
36 Bot Ai ga moa proof dan weh Jan mi gi di peepl, kaaz di saym werk weh mai Faada gi mee fi du da proof dat di Faada sen mi.
37 Ahn di Faada ihself seh dat hihn sen mi. Unu neva yet hyaa ih vais ner si how ih luk,
38 an unu neva bileev di wan weh hihn sen, ahn dat da di reezn wai fi hihn werd neva stay eena unu haat.
39 “Unu di stodi di Skripchaz kaaz unu tink dat chroo dehn unu wahn geh evalastin laif; ahn dehnya da di saym wan dehn* weh di taak bowt mee.
40 Ahn yet unu noh waahn kohn tu mi fi geh laif.
41 Ai noh aksep prayz fahn peepl,
42 bot eena fi unu kays, Ah noa fi shoar dat unu noh lov Gaad.
43 Ai kom eena mi Faada naym, bot unu noh aksep mi. If sombadi els mi kom eena fi dehn oan naym, unu wuda aksep dehn doh.
44 Unu kyaahn bileev mee bikaaz unu di aksep prayz fahn wan anada an unu noh di chrai fi geh di prayz weh kohn fahn di onli Gaad.
45 Noh tink dat da mee wahn akyooz unu fronta di Faada. Da Moaziz di akyooz unu, di saym wan weh unu chros eena ahn.
46 In fak, if unu mi bileev Moaziz, unu wuda bileev mee tu, kaaz hihn mi rait bowt mi.
47 Bot if unu noh bileev weh hihn rait, den how unu wahn bileev weh Ai seh?”
Futnoat
^ Lit., “kolonayd.” Dis da-mi wahn waakway weh mi ga wahn roof oava it.
^ Si di futnoat da Machyu 17:21.
^ Er “shoa afekshan fi.”
^ Er “di memoaryal toom dehn.”
^ Lit., “geh wahn rezorekshan a laif.”
^ Lit., “geh wahn rezorekshan a jojment.”
^ Dis di rifaa tu Gaad.
^ Dis di rifaa tu di Skripchaz.
