Jan 8:12-59
8 12 Den Jeezas tel dehn agen: “Ai da laik wahn lait fi di werl. Enibadi weh fala mee wahn neva waak eena daaknis, bot dehn wahn ga di lait weh gi laif.”
13 Soh di Farisee dehn tel ahn: “Yoo di seh wahn lata tingz bowt yuself, soh wee kyaahn bileev weh yu di seh.”
14 Jeezas tel dehn: “Eevn if Ai seh lata tingz bowt miself, weh Ah seh da chroo, kaaz Ai noa weh Ah kohn fram ahn weh Ah gwehn. Bot unu noh noa wehpaat Ai kohn fram ahn wehpaat Ah gwehn.
15 Unu joj akaadn tu weh unu si,* bot Ai noh joj nobadi.
16 Bot stil, eevn if Ai joj, mai jojment raichos, kaaz Ai noh joj bai miself; di Faada weh sen mi deh wid mi.
17 An eena fi unu oan Laa ih seh: ‘If too witnis da koat gi di saym proof, den weh dehn seh da di chroot.’
18 Wel, Ai tel peepl bowt hoo mee, ahn di Faada weh sen mi da di sekant persn weh tel peepl bowt mee.”
19 Den dehn tel ahn: “Wehpaat yu Faada weh taak bowt yu deh den?” Jeezas tel dehn: “Unu noh noa mee ner di Faada. If unu mi noa mee, unu wuda mi noa di Faada tu.”
20 Jeezas mi seh dehnya tingz eena di chrezhri wail ih mi-di teech eena di templ. Bot nobadi neva ares ahn, kaaz ih taim neva kohn yet.
21 Soh Jeezas tel dehn agen: “Ai gwehn fahn ya, an unu wahn luk fi mi, bot unu wahn stil ded az sinaz. Wehpaat Ai di goh, unu kyaahn kom.”
22 Den di Jooz staat seh: “Yu tink hihn di plan fi kil ihself? Kaaz hihn seh, ‘Wehpaat Ai di goh, unu kyaahn kom.’”
23 Jeezas tel dehn: “Unu da fahn di ert; Ai da fahn hevn. Unu da fahn dis werl; Ai da noh fahn dis werl.
24 Dat da wai Ai mi tel unu: Unu wahn ded az sinaz. Kaaz if unu noh bileev dat Ai da di wan weh mi fi kom, unu wahn ded az sinaz.”
25 Soh dehn staat tu tel Jeezas: “Da hoo yoo?” Jeezas tel dehn: “Ai di ways mai taim ya di taak tu unu.
26 Ai ga lata tingz fi seh bowt unu an Ah ga lata tingz fi joj. In fak, di Wan weh sen mi aalwayz tel di chroot, an Ai di tel di werl di saym tingz weh Ai hyaa fahn hihn.”
27 Dehn neva andastan dat hihn mi-di taak tu dehn bowt di Faada.
28 Den Jeezas seh: “Afta unu lif op di Son a man pahn di stayk, den unu wahn noa da hoo mee ahn dat Ai noh du notn pahn mi oan; bot Ai jos seh egzakli weh di Faada teech mi.
29 Di Wan weh sen mi deh wid mi; hihn noh abandan mi, kaaz Ai aalwayz du di tingz weh pleez hihn.”
30 Ahn wahn lata peepl put fayt eena ahn wail hihn mi-di seh dehnya tingz.
31 Den Jeezas tel di Jooz weh mi bileev eena ahn: “Unu da mi disaipl dehn fi chroo if unu obay mi teechinz,
32 an unu wahn noa di chroot, ahn di chroot wahn set unu free.”
33 Dehn tel ahn: “Wee da Aybraham chiljren, ahn soh faar, wee da noh slayv tu nobadi. Soh da how komz yoo seh, ‘Unu wahn set free’?”
34 Jeezas tel dehn: “Bileev mi, enibadi weh praktis sin wahn bee wahn slayv tu sin.
35 Moroava, wahn slayv noh stay eena ih maasta hows fareva, bot da di maasta oan son stay eena ih hows fareva.
36 Soh if di Son set unu free, den unu free fi chroo.
37 Ai noa dat unu da Aybraham chiljren. Bot unu di chrai kil mi, kaaz unu noh waahn aksep weh Ah di teech unu.
38 Ai taak tu unu bowt di tingz weh Ah mi si wail Ah mi deh wid mi Faada, bot unu du weh unu laan fahn unu faada.”
39 Soh dehn tel ahn: “Aybraham da fi wee faada.” Jeezas tel dehn: “If Aybraham da-mi fi unu faada, unu wuda fala fi hihn egzampl.
40 Bot now unu di luk fi kil mi, eevn doa Ai tel unu di chroot weh Ah hyaa fahn Gaad. Aybraham wuda neva du sohnting laik dat.
41 Unu di du weh unu faada du.” Dehn tel ahn: “Wee da noh no owtsaid pikni;* wi onli ga wan Faada, Gaad.”
42 Jeezas tel dehn: “If Gaad da-mi fi unu Faada fi chroo, den unu wuda lov mee, kaaz Ai kohn fahn Gaad an Ai deh ya. Ai neva kohn pahn mi oan, bot da Hihn sen mi.
43 Unu noh waahn aksep weh Ai di teech, ahn dat da wai unu kyaahn andastan weh Ah di seh.
44 Di Devl da fi unu faada, an unu waahn du weh hihn seh. Hihn da-mi wahn merdara fahn di taim ih mi lai bowt Gaad,* ahn hihn neva kantinyu eena di chroot, bikaaz di chroot noh deh eena ih haat. Hihn tel lai kaaz dat da weh deh eena ahn. Hihn laiyad ahn hihn da di faada a di lai dehn.
45 Ahn now, bikaaz Ai tel unu di chroot, unu noh bileev mi.
46 Wich wan a unu ku proov dat Ai gilti a sin? Weh Ah di tel unu da di chroot, soh wai unu noh bileev mi?
47 Di chiljren a Gaad lisn tu weh hihn seh. Bot unu noh waahn lisn, kaaz unu da noh Gaad chiljren.”
48 Di Jooz tel ahn: “Yoo noh tink wee rait fi seh dat yoo da wahn Samaritan ahn yu ga wahn deemon eena yu?”
49 Jeezas tel dehn: “Ai noh ga wahn deemon eena mi, bot Ai aana mai Faada, an unu noh di shoa mi rispek.
50 Ai noh di chrai aana miself; Gaad wahn aana mi ahn hihn da di joj.
51 Bileev mi, if enibadi du weh Ai seh, ih wahn neva ded.”
52 Di Jooz tel ahn: “Now wi noa fi chroo dat yoo ga wahn deemon eena yu. Aybraham ahn di prafit dehn don ded, bot yoo seh, ‘If enibadi du weh Ai seh, dehn wahn neva ded.’
53 Yoo noh grayta dan fi wee faada Aybraham, rait? Hihn ahn di ada prafit dehn don ded. Soh, da hoo yoo tink yoo soh?”
54 Jeezas tel dehn: “If Ai aana miself, den mi gloari wuda bee notn. Da mai Faada aana mee, di saym persn weh unu di seh da fi unu Gaad.
55 Ahn yet unu noh noa ahn, bot Ai noa hihn. An if Ai wuda seh dat Ai noh noa ahn, den Ai wuda di tel lai jos laik unu. Bot Ai noa ahn an Ai du weh hihn seh.
56 Unu faada Aybraham mi-di luk faawod fi di day wen Ai wahn kom. Hihn mi si da day ahn rijais.”
57 Den di Jooz tel ahn: “Yoo nat eevn 50 yaaz oal, soh da how komz yoo di seh dat yoo don si Aybraham?”
58 Jeezas tel dehn: “Bileev mi, Ai di egzis lang bifoa Aybraham mi baan.”
59 Soh dehn pik op sohn stoan fi stoan ahn, bot Jeezas haid fahn dehn ahn lef di templ.
Futnoat
^ Lit., “akaadn tu di flesh.”
^ Er “Wee noh baan fahn sekshwal imoraliti.” Di Greek werd da por·neiʹa. Si di Glasari, “Sekshwal imoraliti.”
^ Er “merdara fahn di biginin.”
