Jan 9:1-41
9 Az Jeezas mi-di waak lang, ih si wahn man weh mi baan blain.
2 An ih disaipl dehn aks ahn: “Rabai, da wai dis man baan blain? Da sayka weh hihn sin, er da ih payrents mi sin?”
3 Jeezas tel dehn: “No, hihn noh blain bikaaz hihn sin ner bikaaz ih payrents mi sin, bot weh hapm tu hihn wahn gi peepl wahn chaans fi si di powa a Gaad.
4 Wi need fi du di wil a di Wan weh sen mi wail da stil day; nait di kohn ahn nobadi wahn ku werk.
5 Az lang az Ai deh eena di werl, Ai da di lait fi di werl.”
6 Afta Jeezas seh dis, ih spit pahn di grong ahn miks ih spit wid di dert, ahn den ih put it pahn di man aiy dehn,
7 ahn tel ahn: “Goh wash aaf yu aiy dehn eena di pool weh naym Siloawam.” (Siloawam meenz ‘Waata Weh Rosh Owt.’) Soh di man gaahn wash aaf ih aiy dehn, an ih neva blain agen.
8 Den di man nayba dehn ahn di peepl weh yoostu si ahn di bayg seh: “Hihn da noh di man weh yoostu sidong di bayg?”
9 Som mi seh: “Da hihn yes.” Adaz mi seh: “No, da jos sombadi weh luk laik hihn.” Bot di man stay mi-di tel dehn: “Yes, da mee.”
10 Soh dehn aks ahn: “Wel, da how komz yoo ku si now?”
11 Di man tel dehn: “Di man weh naym Jeezas miks sohn mod ahn put it pahn mi aiy dehn ahn tel mi, ‘Goh wash aaf yu aiy dehn eena di pool weh naym Siloawam.’ Soh Ah gaahn wash aaf mi aiy dehn ahn now Ah ku si.”
12 Soh dehn aks ahn: “Da wehpaat da man deh?” Hihn tel dehn: “Ai noh noa.”
13 Dehn kehr di man weh mi blain fronta di Farisee dehn.
14 Now di day wen Jeezas mi miks di mod wid ih spit ahn heel di man* da-mi di Sabat.
15 Soh eevn di Farisee dehn staat tu aks di man da how komz hihn kuda mi si. Soh hihn tel dehn: “Di man miks ih spit wid di mod ahn put it pahn mi aiy dehn, den Ah wash it aaf, ahn now Ah ku si.”
16 Den som a di Farisee dehn staat tu seh: “Da man da noh fahn Gaad, kaaz hihn noh kip di Sabat.” Adaz seh: “Da how wahn sina ku du miraklz laik dat?” Sayka dat, di peepl kudn gree wid wan anada.
17 Soh dehn aks di blain man agen: “Soh da weh yoo tink bowt di man, sins yoo da di wan weh ih heel?” Di man tel dehn: “Hihn da wahn prafit.”
18 Bot di Jooz neva bileev dat hihn mi reeli baan blain ahn dat now ih kuda mi si, soh dehn sen fi ih payrents,
19 an aks dehn: “Hihn da fi unu son weh unu seh mi baan blain? Soh da how komz hihn ku si now?”
20 Di man payrents tel dehn: “Yes, hihn da fi wee son an ih mi baan blain.
21 Bot wee noh noa how hihn ku si now; ahn wi noh noa da hoo heel ahn. Wai unu noh aks hihn? Hihn oal inof fi taak fi ihself.”
22 Di man payrents mi seh dat kaaz dehn mi frayd fi di Jooish rilijos leedaz, kaaz di Jooz mi kohn tu wahn agreement dat if enibadi seh dat Jeezas da di Krais, dehn wahn kik dehn owta di sinagag.
23 Dat da wai fi hihn payrents mi seh: “Hihn oal inof. Aks hihn.”
24 Soh dehn kaal bak di man weh mi blain wahn sekant taim ahn tel ahn: “Tel di chroot ahn gi gloari tu Gaad; dis man da wahn sina, noh chroo?”
25 Hihn tel dehn: “Ai noh noa if da man da wahn sina er nat. Bot wan ting Ah doo noa, Ai mi blain ahn now Ah ku si.”
26 Den dehn tel ahn: “Da weh hihn du tu yu? Da how hihn mek yu si?”
27 Hihn tel dehn: “Ah don tel unu aredi, bot unu noh di lisn tu mi. Wai unu waahn hyaa it agen? Unu waahn bee fi hihn disaipl dehn tu?”
28 Wel, dehn insolt ahn an tel ahn: “Yoo da wan a fi hihn disaiplz, bot wee da Moaziz disaipl dehn.
29 Wee noa dat Gaad taak tu Moaziz, bot wen ih kohn tu dis man, wee noh noa weh hihn kohn fram.”
30 Di man tel dehn: “Wel dis da wahn schraynj ting fi chroo. Unu noh noa weh hihn kohn fram, ahn yet, hihn da di wan weh heel mi.
31 Wee noa dat Gaad noh lisn tu sinaz, bot Gaad lisn tu eni persn weh fyaa hihn ahn du ih wil.
32 Wee neva yet hyaa bowt enibadi weh heel sombadi weh baan blain.
33 If Gaad neva sen dis man, ih mi wahn kyaahn du notn.”
34 Soh dehn tel ahn: “Yoo baan eena sin, ahn now yu waahn teech wee?” Wid dat dehn kehr ahn fahn deh ahn chroa ahn owt!
35 Jeezas mi geh fi hyaa dat dehn mi chroa ahn owt, ahn wen ih fain ahn, ih tel ahn: “Yoo ga fayt eena di Son a man?”
36 Di man tel ahn: “Ser, pleez tel mi da hoo hihn, soh dat Ah ku ga fayt eena ahn.”
37 Jeezas tel ahn: “Yoo don si ahn, in fak, yoo di taak tu hihn now.”
38 Di man tel ahn: “Ai ga fayt eena ahn, Laad.” Ahn den ih bow dong fronta Jeezas.
39 Den Jeezas tel ahn: “Ai kom eena di werl soh dat peepl ku geh joj; di wan dehn weh blain wahn ku si ahn di wan dehn weh ku si wahn geh blain.”
40 Di Farisee dehn weh mi deh rong ahn seh: “Yoo tink dat wee blain tu?”
41 Jeezas tel dehn: “If unu mi blain, unu wudn bee gilti a sin. Bot sins unu seh dat unu ku si, den unu stil gilti a sin.”
Futnoat
^ Lit., “an oapm di man aiy dehn.”
