Jashwa 1:1-18
1 Afta Jehoava servant Moaziz mi ded, dis da weh Jehoava tel Non son Jashwa,* hoo da-mi Moaziz helpa:
2 “Mi servant Moaziz ded, soh now get op, yoo ahn di Izrelait dehn, ahn kraas di Jaadn ahn goh da di lan weh Ah wahn giv unu.
3 Eniway wehpaat unu set fut, Ah wahn giv unu, jos laik weh Ah pramis Moaziz.
4 Unu teritori wahn staat da di dezert ahn goh aal di way op tu Lebanon ahn di Yoofraytis Riva weh da fi Het disendant dehn, ahn di teritori wahn en aaf da di Grayt See* weh deh pahn di wes.*
5 Fi az lang az yu liv, nobadi wahn ku stan op tu yu. Ah wahn deh wid yu jos laik how Ah mi deh wid Moaziz an Ah wahn neva abandan yu.
6 Ga korij ahn bee schrang, kaaz yoo da di wan weh wahn mek di peepl inherit di lan weh Ah mi swayr Ah mi wahn gi dehn ansestaz.
7 Jos ga korij ahn bee veri schrang, ahn mek shoar yu obay aala di Laa weh mai servant Moaziz mi koman yu. An if yu noh schray fan it tu di rait ner tu di lef, den yu wahn ak wid wizdom eniway weh yu goh.
8 Yu shuda neva stap taak bowt dis buk a di Laa ahn yu mos reed it tu yuself eena wahn loa vais* day ahn nait soh dat yu ku mek shoar fi obay evriting weh deh eena it, kaaz da onli soh yu wahn ga sokses ahn bee waiz.
9 Now Ah di koman yu agen, ga korij ahn bee schrang. Noh bee frayd ner geh fraitn, kaaz Jehoava yu Gaad wahn deh wid yu noh kay wehpaat yu goh.”
10 Den Jashwa koman di wan dehn weh mi ga atariti:
11 “Paas chroo di kyamp ahn gi dis koman tu di peepl, ‘Pak op aal di food weh yu wahn need, bikaaz eena chree dayz yu wahn kraas di Jaadn fi goh tek di lan weh Jehoava yu Gaad di gi yu fi kip.’”
12 Ahn dis da weh Jashwa mi tel Rooben chraib, Gad chraib, ahn di haaf chraib a Manaasa:
13 “Memba weh Jehoava servant Moaziz koman yu: ‘Unu Gaad Jehoava di gi unu dis lan soh dat unu ku liv deh eena pees.
14 Aala unu waif, unu pikni, an unu animal dehn wahn liv eena di lan weh Moaziz giv unu pahn dis said* a di Jaadn, bot unu, wi brayv soalja dehn, shuda kraas oava fronta unu bradaz redi wid unu wepan fi help dehn.
15 Unu mos help dehn til dehn tek oava di lan weh Jehoava gi dehn ahn til dehn ga pees jos laik weh Jehoava du fi unu. Den goh bak da di lan weh Jehoava servant Moaziz giv unu, weh deh pahn di ees said a di Jaadn, weh unu inherit.’”
16 Dehn ansa Jashwa: “Wi wahn du aal weh yu koman wi fi du ahn wi gwehn eniway wehpaat yu sen wi.
17 Jos laik how wi mi lisn tu evriting weh Moaziz tel wi fi du, wi wahn lisn tu yoo tu. Ahn wi jos hoap dat yu Gaad Jehoava wahn deh wid yu jos laik how ih mi deh wid Moaziz.
18 Wi wahn kil enibadi weh goh gens weh yu aada an enibadi weh noh obay aal weh yu koman. Soh jos ga korij ahn bee schrang.”
Futnoat
^ Er “Jehoshwa.” Dis naym meenz “Salvayshan Kohn Fahn Jehoava.”
^ Dis da wahn nada naym fi di Meditaraynyan See.
^ Er “weh deh tuwaadz di sonset.”
^ Er “yu mos tek taim fi tink bowt it gud.”
^ Dis di rifaa tu di ees said.
