Jashwa 11:1-23
11 Az soon az Jaybin di king a Hayzor hyaa bowt weh hapm, ih sen wahn mesij tu di king a Shimron, di king a Akshaf, ahn tu Joabab di king a Maydon.
2 Ih aalso sen mesij tu aala di king dehn weh liv eena di mongtin dehn op naat, eena di Araba tu di sowt a Kineret, eena di Shefeela, ahn pahn di hil dehn tu di wes a Dor,
3 ahn tu di Kaynanait dehn weh liv tu di ees ahn tu di wes, tu aala di Amorait, Hitait, Perizait, ahn Jebyusait dehn weh liv da di mongtin dehn, ahn tu di Haivait dehn weh liv da di batam a Mongt Hermon eena Mizpa.
4 Soh aala dehn kom owt wid dehn aami. Da mi soh moch a dehn dat dehn da-mi laik di san pahn di seesaid, ahn dehn bring dehn haas ahn waar chariyat lang wid dehn.
5 Aala dehn agree fi meet op ahn kyamp da di waata spring bai Merom fi fait gens di Izrelait dehn.
6 Den Jehoava tel Jashwa: “Noh frayd fi dehn, kaaz rong dis saym taim tumaaro, Ah wahn giv Izrel vikchri oava dehn mek dehn kil aala dehn. Yu mos kripl aala dehn haas ahn bon op aala dehn chariyat.”
7 Soh Jashwa an aala ih soalja gaahn atak dehn kloas tu di waata spring bai Merom wen dehn neva mi-di ekspek it.
8 Ahn Jehoava giv Izrel vikchri oava dehn, ahn dehn chays dehn az faar az Grayt Saidan, Misrefot-mayim, ahn Mizpa Vali tu di ees, ahn dehn kil dehn; dehn neva lef non a dehn alaiv.
9 Den Jashwa du egzakli weh Jehoava tel ahn fi du. Ih kripl aal dehn haas ahn bon op aala dehn chariyat.
10 Pahn tap a dat, Jashwa gaahn bak ahn kanka Hayzor ahn kil dehn king, bikaaz owta aala dehnya kingdom Hayzor da-mi di moas powaful wan.
11 Dehn tek dehn soad ahn kil owt evribadi* eena di siti. Dehn neva lef non a dehn alaiv, ahn den ih bon dong Hayzor.
12 Jashwa kanka aala di siti dehn weh bilang tu dehnya king ahn kil aal di king dehn tu, an ih kil owt evribadi fahn dehndeh siti, jos laik weh Jehoava servant Moaziz mi tel ahn fi du.
13 Bot Izrel neva bon dong non a di siti dehn weh mi deh pahn wahn hil eksep Hayzor. Dat da-mi di onli wan weh Jashwa bon dong.
14 Di Izrelait dehn mi tek aal di peepl bilanginz an animal dehn fi dehnself. Bot dehn tek dehn soad ahn kil evri hyooman weh mi liv eena dehndeh siti. Dehn neva stap til dehn kil evri singl wan a dehn. Dehn neva lef nobadi alaiv.
15 Jos laik how Jehoava mi koman ih servant Moaziz, da rait soh Moaziz mi koman Jashwa, ahn dat da weh Jashwa mi du. Hihn neva lef owt notn fahn weh Jehoava mi koman Moaziz.
16 Jashwa mi kanka aala dis lan: ih kanka di paat a Jooda weh ga lata mongtin, di paat a Izrel weh ga lata mongtin ahn di loa ayrya kloas deh, di hoal a di Negeb, di lan a Goashen, di Shefeela, ahn di Araba.
17 Ih kyapcha aala di lan fahn Mongt Haylak, weh goh op tu Seeyir, an az faar az Bayal-gad eena Lebanon Vali bai di batam a Mongt Hermon, an ih kyapcha aala di king dehn weh liv eena da lan ahn kil dehn.
18 Jashwa waar wid dehnya king fi wahn lang taim.
19 Di onli siti weh mi mek pees wid di Izrelait dehn da-mi di Haivait dehn weh liv da Gibiyon. Soh Izrel mi waar gens di ada siti dehn ahn kanka dehn.
20 Jehoava lef dehn fi bee stobant soh dehn ku goh da waar gens Izrel. Da way deh, Izrel kuda dischrai dehn widowt ga mersi, jos laik weh Jehoava mi koman Moaziz fi du.
21 Ahn Jashwa kil owt aala Aynak disendant dehn weh mi liv da di mongtin dehn da Jooda an Izrel, inkloodin dehn wan weh mi liv da Hebron, Deeber, an Aynab. Jashwa kil owt aala dehn ahn dischrai aala dehn siti.
22 Non a Aynak disendant dehn mi lef pahn di lan weh bilangz tu di Izrelait dehn; onli eena Gaza, Gat, an Ashdod yu kuda fain dehn di liv.
23 Soh Jashwa tek oava di lan weh Jehoava mi pramis Moaziz. Ih giv it tu Izrel az wahn inheritans ahn divaid it op monks di chraib dehn soh dat eech chraib geh wahn shayr. An afta dat di waar mi stap, ahn di Izrelait dehn mi liv eena pees.
Futnoat
^ Er “evri soal.” Si di Glasari, “Soal.”
