Jashwa 14:1-15
14 Now dis da weh di Izrelait dehn mi tek az dehn inheritans eena di lan a Kaynan, weh Eliyayza di prees ahn Non son Jashwa ahn di cheef a di famili dehn fahn aala di chraib a Izrel mi gi dehn fi inherit.
2 Dehn mi chroa lat fi divaid op dehn inheritans akaadn tu di komanment weh Jehoava gi Moaziz fi di nain an a haaf chraib dehn.
3 Moaziz mi gi di ada too an a haaf chraib fi dehn inheritans pahn di ada said* a di Jaadn, an ih neva gi di Leevait dehn no inheritans monks dehn.
4 Dehn mi konk Joazef disendant dehn az too chraib, Manaaseh an Eefrayim, ahn dehn neva gi di Leevait dehn non a di lan az wahn inheritans. Dehn onli gi dehn sohn siti fi liv eena ahn sohn lan fi kip dehn animal an ada tingz weh dehn oan.
5 Soh di Izrelait dehn divaid op di lan jos laik how Jehoava koman Moaziz fi du it.
6 Den sohn man fahn di chraib a Jooda gaan op tu Jashwa wail dehn mi deh da Gilgal. Ahn Kayleb, hoo da di son a Jefona di Kenizait, mi deh wid dehn. Ahn hihn tel Jashwa: “Yoo wel noa weh di chroo Gaad Jehoava tel ih servant Moaziz bowt mee ahn yoo da Kaydesh-barniya.
7 Ai mi 40 yaaz oal wen Jehoava servant Moaziz sen mi fahn Kaydesh-barniya fi goh spai owt di lan, ahn wen Ah kom bak Ah tel ahn di chroot bowt evriting weh Ah si.
8 Eevn doa mi bradaz weh gaahn wid mi mi diskorij di peepl, Ai mi fala mi Gaad Jehoava wid mi hoal haat.
9 Ahn soh Moaziz mi swayr pahn da day ahn seh, ‘Di lan weh yu waak pan wahn aalwayz bee yu inheritans, fi yoo ahn fi yu disendant dehn, bikaaz yu fala mi Gaad Jehoava wid yu hoal haat.’
10 45 yaaz agoa Jehoava mek da pramis tu Moaziz wen Izrel mi deh eena di wildanes,* ahn jos laik weh ih pramis, Jehoava kip mi alaiv. An Ah stil deh ya tudeh, 85 yaaz oal.
11 Tudeh Ah jos az schrang az di day wen Moaziz sen mi fi spai owt di lan a Kaynan. Ah ga di saym schrent tudeh laik weh Ah mi ga bak den fi goh fait di waar ahn fi goh leed di aami.
12 Soh gi mi di ayrya eena di mongtin dehn weh Jehoava mi pramis fi gi mi pahn da day. Fahn den yu mi hyaa dat Aynak disendant dehn di liv eena di big ahn schrang siti dehn, bot Ai chros* dat Jehoava wahn deh wid mi, an Ah wahn ron dehn owt fahn deh, jos laik weh Jehoava mi pramis.”
13 Soh Jashwa bles Jefona son Kayleb, an ih giv ahn Hebron az ih inheritans.
14 Ahn dat da wai Hebron bilangz tu Kayleb, hoo da di son a Jefona di Kenizait. Da fi hihn inheritans op tu tudeh bikaaz hihn fala Jehoava di Gaad a Izrel wid ih hoal haat.
15 Hebron yoostu naym Kiriyat-arba (Arba da-mi di moas impoatant man monks Aynak disendant dehn). An afta dat di waar mi stap, ahn di Izrelait dehn mi liv eena pees.
