Jashwa 16:1-10
16 Ahn di lan weh Joazef disendant dehn get da-mi fahn di Jaadn kloas tu Jeriko tu di waata spring weh deh ees a Jeriko, chroo di wildanes* wehpaat yu goh op fahn Jeriko fi goh da di mongtin dehn rong Betel.
2 Ahn fahn Betel, weh deh kloas tu Loz, dehn lan kantinyu op tu di Arkait boada da Atarot.
3 Den ih gaahn dong tu di wes tuwaadz di Jafletait dehn az faar az di bongjri da Loawa Bet-hoaron ahn Geezer, an ih gaan aal di way tu di see.
4 Soh Joazef disendant dehn, Manaaseh an Eefrayim, tek di lan weh dehn get.
5 Di bongjri pahn di ees said a di lan weh di famili dehn fahn Eefrayim chraib mi get az dehn inheritans ron fahn Atarot-adar az faar az Haiya Bet-hoaron,
6 ahn di bongjri gaan aal di way tu di see. Mikmeetat mi deh tu di naat, ahn fahn deh di bongjri gaan ees tu Tayanat-shailo, an ih kantinyu ees tu Janoawa.
7 Den fahn Janoawa ih gaahn dong tu Atarot ahn Nayara ahn gaahn tu Jeriko, ahn den ih gaan aal di way tu di Jaadn Riva.
8 Fahn Tapuwa di bongjri kantinyu wes tu Kayna Riva an ih gaan aal di way tu di see. Dehnya lan da weh di famili dehn fahn Eefrayim chraib get az dehn inheritans.
9 Eefrayim disendant dehn mi aalso ga sohn siti eena di lan weh Manaaseh chraib mi get az dehn inheritans, ahn dehn mi aalso gat aala di vilij rong dehndeh siti.
10 Bot sohn Kaynanait mi-di liv da Geezer, ahn dehn neva jraiv dehn owt fahn deh. Soh di Kaynanait dehn kantinyu fi liv monks Eefrayim disendant dehn op tu tudeh, ahn dehn foas di Kaynanait dehn fi werk haad laik slayv.
Futnoat
^ Si di Glasari, “Wildanes.”
