Jashwa 17:1-18
17 Den di chraib a Manaaseh, hoo da-mi Joazef fersbaan, geh fi dehn shayr a di lan. Sins Manaaseh fersbaan Maykir, hoo da-mi Gilyad pa, da-mi wahn maiti wariya, hihn geh Gilyad ahn Bayshan.
2 Ahn den di famili dehn fahn di res a Manaaseh chraib geh dehn shayr a di lan: Abi-eezer famili, Heelek famili, Azriyel famili, Sheekem famili, Heefer famili, ahn Shimaida famili. Dis da wahn lis a di man dehn fahn di chraib a Manaaseh, hoo da-mi Joazef son, akaadn tu dehn famili.
3 Bot Zeloafehad, hoofa pa da-mi Heefer, hoofa pa da-mi Gilyad, hoofa pa da-mi Maykir, hoofa pa da-mi Manaaseh, neva ga no son. Ih mi ga loan daata, ahn fi hihn daata dehn mi naym Maala, Noawa, Hagla, Milka, ahn Tirza.
4 Soh dehn gaahn fronta Eliyayza di prees, Non son Jashwa, ahn di cheef dehn ahn tel dehn: “Jehoava mi koman Moaziz fi gi wee wahn inheritans jos laik wi bradaz.” Soh hihn gi dehn wahn inheritans jos laik weh Jehoava mi koman dehn.
5 Bisaidz di lan a Gilyad ahn Bayshan weh mi deh pahn di ada said* a di Jaadn, Manaaseh mi aalso geh ten moa pees a lan,
6 bikaaz di wuman dehn fahn di chraib a Manaaseh mi geh wahn inheritans lang wid di man dehn, ahn di res a Manaaseh chraib mi tek di lan a Gilyad.
7 Ahn Manaaseh bongjri ron fahn Asher tu Mikmeetat, weh deh kloas tu Sheekem, ahn di bongjri kantinyu sowt tu di lan a di peepl weh liv da En-Tapuwa.
8 Soh Manaaseh mi geh di lan weh bilangz tu Tapuwa, bot di siti a Tapuwa weh deh pahn Manaaseh boada mi bilangz tu Eefrayim disendant dehn.
9 Ahn di bongjri gaahn dong tu di sowt a Kayna Riva. Eefrayim mi ga sohn siti eena Manaaseh teritori, ahn Manaaseh bongjri gaahn pahn di naat said a di riva, an ih gaan aal di way tu di see.
10 Di sowt said mi bilangz tu Eefrayim, ahn di naat said mi bilangz tu Manaaseh, ahn fi hihn lan gaan op tu di see. Ahn Manaaseh teritori gaan op naat aal di way tu Asher teritori, ahn pahn di ees ih gaan op tu Isakar teritori.
11 Eena Isakar teritori an Asher teritori, Manaaseh chraib mi geh Bet-sheeyan, Ibliyam, Dor, En-dor, Tayanak, ahn Megido, inkloodin aala di tong rong dehndeh siti an aala di peepl weh liv deh. Chree hai lan ayrya mi bilangz tu Manaaseh chraib.
12 Bot Manaaseh disendant dehn neva aybl fi tek oava dehnya siti, ahn di Kaynanait dehn mi stoban ahn rifyooz fi lef di lan.
13 Wen di Izrelait dehn mi geh schranga, dehn foas di Kaynanait dehn fi werk haad laik slayv, bot dehn neva jraiv owt aala dehn fahn di lan.
14 Joazef disendant dehn tel Jashwa: “Jehoava bles wi op tu now, soh da lata wi deh ya. Soh wai yu onli gi wi wan sekshan a di lan az wi inheritans?”
15 Jashwa tel dehn: “Laik how da soh moch a unu an unu kyaahn fit eena di mongtin dehn da Eefrayim, goh op da di faris ahn klayr owt wahn plays fi unuself deh eena di Perizait ahn Refayim dehn lan.”
16 Den Joazef disendant dehn seh: “Di ayrya eena di mongtin dehn noh big inof fi aala wi. An aala di Kaynanait dehn weh liv eena di vali,* da Bet-sheeyan an aala di tong rong deh ahn da Jezriyel Vali,* ga waar chariyat wid aiyan blayd di stik owt fahn di weel.”*
17 Soh Jashwa tel Eefrayim chraib ahn Manaaseh chraib, hoo da Joazef disendant dehn: “Da wahn lata unu fi chroo, an unu ga wahn lata powa, soh unu noh wahn onli geh da wan sekshan.
18 Di mongtin dehn wahn bee fi unu tu. Da ayrya da loan faris, bot unu wahn klayr it, ahn dat wahn bee di ej a unu teritori. Unu wahn jraiv owt aala di Kaynanait dehn, eevn doa dehn schrang ahn dehn ga waar chariyat wid aiyan blayd pahn dehn weel.”*
Futnoat
^ Dis di rifaa tu di ees said.
^ Er “loa lan.”
^ Er “da di Loa Lan a Jezriyel.”
^ Lit., “aiyan waar chariyat.”
^ Lit., “aiyan waar chariyat.”
