Jashwa 2:1-24
2 Wail dehn mi deh da Shitim, Non son Jashwa sen owt too man fi spai owt di lan a Kaynan. Ih tel dehn: “Goh ahn chek owt di ayrya, espeshali Jeriko.” Soh dehn gaan, ahn wen dehn reech Jeriko dehn gaahn da di hows a wahn prastichoot weh naym Rayhab ahn dehn stay deh.
2 Sombadi tel di king a Jeriko: “Sohn Izrelait man deh ya tunait fi spai owt di ayrya.”
3 Den di king a Jeriko sen mesij tu Rayhab ahn tel ahn: “Bring owt di man dehn weh di stay da yu hows, kaaz dehn kohn ya fi spai owt di hoal ayrya.”
4 Bot di laydi tek di too man ahn haid dehn. Den shee seh: “Yes dehn mi kohn da mi hows, bot Ah neva noa weh dehn kohn fram.
5 Ahn wen ih mi-di geh daak ahn da mi nayli taim fi mek dehn kloaz di siti gayt, di man dehn gaan. Ah noh noa wehpaat dehn gaan, bot if yu hori ahn chays afta dehn yu wahn kech dehn.”
6 Bot shee mi don kehr dehn op da ih roof ahn haid dehn monks di pail a linen plaant stem weh mi deh op deh.
7 Soh di king mesinja dehn chays afta di man dehn tuwaadz di Jaadn wehpaat ih shalo inof fi paas, ahn di gayt shet afta dehn lef.
8 Bifoa di too man gaahn sleep shee gaahn si dehn pahn di roof.
9 An ih tel dehn: “Ai noa dat Jehoava wahn giv unu wi lan ahn dat aala wi frayd fi unu. Aala fi wee peepl feel diskorij sayka unu,
10 kaaz wi hyaa how Jehoava mi jrai op di Red See fi mek unu paas wen unu lef Eejip ahn how unu mi kil di too Amorait king, Saihon an Og, pahn di ada said* a di Jaadn.
11 Wen wi hyaa bowt it wi mi geh soh fraitn dat wi feel week, ahn nobadi ga eni korij sayka unu, bikaaz Jehoava unu Gaad da Gaad op da hevn ahn dong ya pahn ert.
12 Now Ai don shoa lov* tu unu, soh pleez swayr tu mi fronta Jehoava dat unu wahn shoa lov* tu mi pa famili, an unu mos gi mi wahn sain dat unu wahn kip unu pramis.*
13 Unu pleez sayv mi ma ahn mi pa, mi breda ahn sista dehn, an aala mi faamli fahn det.”
14 Den di man dehn tel ahn: “If yu noh seh notn bowt weh wi kohn du ya, den wi wahn shoa unu lov* ahn ga mersi pahn unu wen Jehoava gi wi dis plays, adawaiz mek wee ded insteda unu.”*
15 Afta dat shee heng wahn roap owtsaida di windo fi mek dehn klaim dong di said a di siti waal, kaaz shee mi-di liv pahn tap a di waal.
16 Den shee tel dehn: “Goh da di mongtin dehn ahn haid deh fi chree dayz, soh dat dehn wan weh di chays unu noh fain unu. Den afta dehn kohn bak unu ku goh.”
17 Den di man dehn tel ahn: “Wi onli wahn kip dis pramis if yu du dis:
18 Wen wi kom eena di siti, yu fi ga dis brait red roap tai eena di windo weh wi klaim dong fram. Yu mos mek yu pa, yu ma, yu breda dehn, an aala yu pa faamli stay eena di hows lang wid yu.
19 Den if enibadi goh owtsaida di hows, dehn wahn bee rispansabl fi dehn oan det, ahn wee noh wahn bee gilti. Bot if eniting bad hapm tu enibadi weh stay wid yu eena di hows, wee wahn bee rispansabl fi dehn det.
20 Bot if yoo ripoat weh wi kohn du ya, den wi noh haftu kip di pramis weh wi mi mek tu yu.”
21 Shee seh: “Mek ih hapm jos laik weh unu seh.”
Den shee sen dehn weh ahn dehn gaahn bowt dehn bizniz. Aftawodz, shee tai di red roap da ih windo.
22 Soh dehn lef fahn deh ahn gaahn da di mongtin dehn fi chree dayz til dehn wan weh mi-di chays dehn gaahn bak. Dehn mi-di luk fi dehn pahn evri road bot neva fain dehn.
23 Den di too man kohn dong fahn di mongtin ahn kraas di riva ahn gaahn tu Non son Jashwa. Dehn tel ahn evriting weh mi hapm tu dehn.
24 Den dehn tel Jashwa: “Jehoava don gi wi di hoal a Kaynan. Akchwali, aala di peepl fahn deh diskorij sayka wee.”
Futnoat
^ Dis di rifaa tu di ees said.
^ Er “laayal lov.” Si di Glasari, “Laayal lov.”
^ Er “laayal lov.”
^ Er “wahn sain weh Ah ku chros.”
^ Er “laayal lov.”
^ Er “mek fi wee soal ded insteda unu.” Si di Glasari, “Soal.”
