Jashwa 20:1-9
-
Di sayf siti dehn (1-9)
20 Den Jehoava tel Jashwa:
2 “Tel di Izrelait dehn, ‘Unu mos pik owt di sayf siti dehn fi unuself, jos laik weh Ah mi tel Moaziz fi tel unu,
3 soh if wahn persn kil sombadi* bai aksident* er neva meen fi kil ahn, dehn ku ron da wan a dehndeh siti. Ahn dehndeh siti wahn bee wahn sayf plays wehpaat di persn ku geh protekshan fahn di famili a di persn weh ih kil.
4 Ih mos ron tu wan a dehndeh siti ahn stan op da di siti gayt ahn tel di oalda man dehn weh tek di leed* eena da siti weh mi hapm. Den dehn mos kehr ahn eena di siti ahn giv ahn wahn plays mek ih ku liv deh wid dehn.
5 If di famili a di persn weh ih kil chays afta ahn, di oalda man dehn noh fi han ahn oava tu ahn. Dehn fi help ahn bikaaz ih kil di persn bai aksident* an ih neva hayt ahn.
6 Ih haftu liv eena da siti til di kangrigayshan* joj ih kays, an ih haftu stay deh til di hai prees weh di serv eena dehn dayz ded. Den ih ku goh bak tu di siti weh ih kohn fram, an ih ku goh hoam.’”
7 Soh dehn mek dehnya siti hoali:* Keedesh da Gyalilee eena di mongtin dehn eena Naftalai teritori, Sheekem eena di mongtin dehn eena Eefrayim teritori, ahn Kiriyat-arba, weh aalso naym Hebron, eena di mongtin dehn eena Jooda teritori.
8 Eena di ayrya rong di Jaadn, tu di ees fahn wehpaat ih paas kloas tu Jeriko, dehn mi pik Beezer eena di wildanes* weh deh op pahn di flat lan eena Rooben chraib teritori, Raymot weh deh da Gilyad eena Gad chraib teritori, ahn Goalan weh deh da Bayshan eena Manaaseh chraib teritori.
9 Dehnya da-mi di sayf siti weh aala di Izrelait dehn ahn di farina dehn weh mi-di liv monks dehn kuda mi ron tu if dehn mi kil sombadi* bai aksident, soh dat di viktim famili neva kil ahn bifoa di kangrigayshan joj ih kays.
Futnoat
^ Er “wahn soal.” Si di Glasari, “Soal.”
^ Er “bot neva noa dehn kil ahn.”
^ Er “eldaz.” Si di Glasari, “Elda.”
^ Er “ih neva noa ih kil di persn.”
^ Si di Glasari, “Kangrigayshan.”
^ Er “dehn dedikayt dehnya siti tu Gaad.”
^ Si di Glasari, “Wildanes.”
^ Er “wahn soal.”
