Jashwa 23:1-16
23 Wahn lang taim afta Jehoava gi di Izrelait dehn pees kaaz ih sayv dehn fahn aala dehn enimi, ahn wen Jashwa mi oal oal ahn neva ga moch langa fi liv,
2 Jashwa kaal aala di Izrelait dehn tugeda. Ih kaal di elda* dehn, di cheef dehn, di joj dehn, ahn di ofishal dehn, an ih seh: “Ah oal an Ah noh ga moch langa fi liv.
3 An unu si aal weh Jehoava du tu dehnya ada nayshanz fi protek unu. Jehoava da di wan weh mi-di fait fi unu.
4 An ih mi geh rid a aala di peepl weh mi-di liv pahn di wes said a di Jaadn op tu di Grayt See* an ih giv eech a unu chraib wahn pees a lan az dehn inheritans. Peepl fahn di ada nayshanz stil deh eena di lan bot di lan bilangz tu unu.
5 An unu Gaad Jehoava da di wan weh foas dehn fi goh fahn fronta unu, an ih jraiv dehn weh, an unu staat liv pahn fi dehn lan, jos laik weh Jehoava unu Gaad mi pramis ih mi wahn du fi unu.
6 “Unu mos ga korij an obay evriting weh rait dong eena di buk a di Laa weh Gaad gi Moaziz an unu mosn schray fan it eena eni kaina way.
7 Noh ga notn fi du wid di peepl fahn di nayshanz weh stil di liv eena di lan. Unu mosn eevn yooz fi dehn gaad naym ner swayr eena dehn naym, an unu mos neva wership fi dehn gaad ner bow dong tu dehn.
8 Bot unu mos stay kloas tu unu Gaad Jehoava, jos laik weh unu di du op tu now.
9 Jehoava wahn jraiv weh big ahn schrang nayshanz fahn fronta unu, jos laik how op tu now nobadi kyaahn stan op tu unu.
10 Jos wan a unu wahn chays weh wahn towzn, bikaaz unu Gaad Jehoava di fait fi unu, jos laik weh ih mi pramis fi du.
11 Soh unu mos aalwayz mek shoar dat unu lov unu Gaad Jehoava.
12 “Bot if unu ton unu bak pahn Gaad ahn jain op wid eni peepl fahn dehnya nayshan weh stil di liv monks unu ahn marid dehn an unu kip kompni wid eech ada,
13 den noa dat unu Gaad Jehoava noh wahn kantinyu jraiv owt dehnya nayshan fahn fronta unu non ataal. Dehn wahn bee wahn chrap fi unu ahn dehn wahn bee laik wahn wip pahn unu bak ahn laik wahn prikl eena unu aiy til unu ded owt fahn dis gud lan weh unu Gaad Jehoava giv unu.
14 “Unu lisn ya! Ai wahn ded soon, an unu wel noa wid aal unu haat ahn wid aala unu soal* dat owta aala di gud pramis dehn weh Jehoava unu Gaad mek, evri singl werd kohn chroo. Ih noh brok nat wan werd owta aala ih pramis dehn. Aala dehn kohn chroo fi unu.
15 Bot jos laik how aala di gud pramis dehn weh Jehoava mek kohn chroo fi unu, da rait soh Jehoava ku mek aala di bad tingz weh ih mi pramis kohn chroo tu, an ih ku waip unu owt fahn dis gud lan weh unu Gaad Jehoava giv unu.
16 If unu brok di kovenant* weh unu Gaad Jehoava koman unu fi kip ahn goh ahn bow dong ahn serv eni ada gaad, den Jehoava wahn beks bad wid unu an ih wahn waip unu owt fahn di gud lan weh hihn giv unu.”
Futnoat
^ Si di Glasari, “Elda.”
^ Dis da wahn nada naym fi di Meditaraynyan See.
^ Si di Glasari, “Soal.”
^ Si di Glasari, “Kovenant.”
