Jashwa 3:1-17
-
Di Izrelait dehn kraas di Jaadn (1-17)
3 Den Jashwa get op erli di maanin ahn hihn an aala di Izrelait dehn lef Shitim ahn gaahn da di Jaadn. Dehn spen di nait deh bifoa dehn kraas.
2 Afta chree dayz, dehn wan weh mi ga atariti gaan aal chroo di kyamp,
3 ahn dehn gi di peepl dis koman: “Az soon az unu si di Leevait prees dehn di bak di aak a Jehoava kovenant,* unu mos lef fahn weh unu deh ahn fala it.
4 Bot stay bowt 2,920 fut* bihain it; noh goh eni kloasa tu it. Du dat soh unu ku si wich way fi goh bikaaz unu neva yet kohn dis way bifoa.”
5 Jashwa tel di peepl: “Pripyaa unuself fi tumaaro, bikaaz tumaaro Jehoava wahn deh monks unu di du miraklz.”
6 Den Jashwa tel di prees dehn: “Pik op di aak a di kovenant ahn goh heda di peepl.” Soh dehn pik op di aak a di kovenant ahn gaahn heda di peepl.
7 Den Jehoava tel Jashwa: “Tudeh Ah wahn staat shoa yu aana fronta di hoal a Izrel, soh dat dehn noa dat Ai wahn deh wid yoo jos laik how Ah mi deh wid Moaziz.
8 Yu fi gi dis koman tu di prees dehn weh di bak di aak a di kovenant: ‘Wen unu reech di ej a di Jaadn Riva unu fi stan op stil eena di waata.’”
9 Ahn Jashwa tel di Izrelait dehn: “Unu kohn hyaa weh wi Gaad Jehoava seh.”
10 Den Jashwa seh: “Dis da how unu wahn noa dat wahn livin Gaad deh monks unu, bikaaz fi shoar hihn wahn jraiv weh di Kaynanait, di Hitait, di Haivait, di Perizait, di Gergashait, di Amorait, ahn di Jebyusait dehn.
11 Di aak a di kovenant weh bilangz tu di Laad a di hoal ert gwehn heda unu eena di Jaadn Riva.
12 Now pik 12 man, wan man fahn eech a di chraib a Izrel.
13 Di prees dehn weh di kehr di Aak weh bilangz tu Jehoava, di Laad a di hoal ert, wahn put dehn fut eena di Jaadn Riva. Az soon az dehn du dat, di waata fahn di riva wahn stap floa an ih wahn bee laik wahn waal di hoal di waata bak.”
14 Soh wen di peepl lef fahn dehn kyamp fi goh kraas di Jaadn Riva di prees dehn weh mi-di kehr di aak a di kovenant gaahn heda dehn.
15 Now naamali di Jaadn Riva flod joorin haavis, bot az soon az di prees dehn weh mi-di bak di Aak get da di Jaadn, dehn dip dehn fut eena di waata
16 ahn di waata stap floa. Di waata stan op laik wahn waal aal di way op tu di siti a Adam weh deh kloas tu Zaretan, ahn di waata jrai op fahn deh dong tu di Saalt See* weh deh eena di Araba. Di waata mi stap floa ahn di peepl mi kraas oava fronta Jeriko.
17 Wail di prees dehn weh mi-di bak di aak a Jehoava kovenant mi-di stan op pahn jrai grong midl a di Jaadn Riva, aala di Izrelait dehn staat tu kraas oava pahn jrai grong til aala dehn reech di ada said.
Futnoat
^ Si di Glasari, “Aak a di kovenant.”
^ Lit., “2,000 kyoobit.” Wahn kyoobit da 17.5 inchiz. Si Apendiks B14.
^ Dis da wahn nada naym fi di Ded See.
