Jashwa 5:1-15
5 Az soon az aala di Amorait king dehn fahn di wes said a di Jaadn* an aala di Kaynanait king dehn kloas tu di see mi hyaa dat Jehoava jrai op di Jaadn Riva fi mek di Izrelait dehn ku kraas it, dehn mi geh soh fraitn dat dehn mi feel week, ahn non a dehn neva ga no korij sayka di Izrelait dehn.
2 Den Jehoava tel Jashwa: “Mek sohn naif owta stoan ahn serkomsaiz* aala di Izrelait man.”
3 Soh den Jashwa mek sohn naif owta stoan ahn dehn serkomsaiz di Izrelait man dehn da Gibiyat-haaralot.
4 Dis da wai Jashwa serkomsaiz dehn: Wen di peepl mi lef Eejip, aala di man dehn weh mi oal inof fi serv eena di aami mi ded lang di way eena di wildanes.*
5 Evribadi weh mi lef Eejip mi serkomsaiz, bot aal dehndeh wan weh mi baan eena di wildanes wen dehn mi-di chravl afta dehn lef Eejip neva serkomsaiz.
6 Wen di Izrelait dehn mi lef Eejip, di man dehn weh mi oal inof fi serv eena di aami neva obay Jehoava. Soh di Izrelait dehn mi chravl chroo di wildanes fi 40 yaaz til aala dehndeh man mi ded owt. Jehoava swayr tu dehn dat hihn neva mi wahn mek dehn si di lan weh soh gud dat da laik ih ful op wid milk ahn honi. Dis da weh Jehoava mi swayr tu dehn ansestaz fi gi wi.
7 Soh dehn son tek fi dehn plays. Dehnya da di wan weh Jashwa serkomsaiz bikaaz dehn neva geh serkomsaiz wail dehn mi-di chravl.
8 Wen dehn mi finish serkomsaiz aala dehn, dehn mi stay deh eena di kyamp til dehn heel op.
9 Den Jehoava tel Jashwa: “Tudeh Ah wahn tek weh di shaym weh Eejip kaaz unu fi feel.” Soh dehn kaal da plays Gilgal* op tu tudeh.
10 Di Izrelait dehn kantinyu fi kyamp da Gilgal ahn selibrayt di Paasoava eena di eevnin pahn di 14th day a di mont, eena di wildanes rong Jeriko.
11 Pahn di day afta di Paasoava dehn staat eet bred widowt ees ahn roas grayn fahn weh di lan projoos.
12 Ahn nohmoh mana mi apyaa pahn di day wen dehn mi eet fahn weh di lan projoos. Di Izrelait dehn neva ga nohmoh mana afta dat, bot eena da yaa dehn staat tu eet weh di lan a Kaynan mi projoos.
13 Wen Jashwa mi deh kloas tu Jeriko, ih luk op an ih si wahn man di stan op fronta ahn wid wahn soad eena ih han. Jashwa waak op tu ahn an aks ahn: “Yoo deh pahn fi wee said er pahn wi enimi dehn said?”
14 Den di man tel ahn: “No, Ai da di prins* a Jehoava aami.” Rait away Jashwa jrap dong wid ih fays tu di grong ahn seh tu ahn: “Weh mi laad ga fi tel ih servant?”
15 Di prins a Jehoava aami ansa Jashwa: “Tek aaf yu sandalz, kaaz di grong weh yu di stan op pan da hoali grong.” Rait away Jashwa du it.
Futnoat
^ Lit., “di said a di Jaadn tuwaadz di see.”
^ Si di Glasari, “Serkomsizhan.”
^ Si di Glasari, “Wildanes.”
^ Dis naym meenz “Roal; Roal It Weh.”
^ Er “cheef.”
