Jashwa 6:1-27
6 Now Jeriko mi lak rait op bikaaz a di Izrelait dehn. Nobadi mi-di kom een ahn nobadi mi-di goh owt.
2 Jehoava tel Jashwa: “Ah di gi yu vikchri oava Jeriko an ih king an ih maiti soalja dehn.
3 Unu hoal aami fi maach rong di siti wan taim eech day fi siks dayz.
4 Mek sevn prees wid sevn ram haan waak fronta di Aak.* Bot pahn di sevent day, unu fi maach rong di siti sevn taimz ahn di prees dehn fi bloa dehn haan.
5 Den di prees dehn wahn bloa wahn lang noat pahn di haan. Az soon az unu hyaa dat, aala di soalja dehn fi hala laik dehn deh da waar. Den di siti waal wahn jrap dong flat pahn di grong ahn di soalja dehn mos goh schrayt eena di siti.”
6 Soh Non son Jashwa mi kaal di prees dehn tugeda ahn tel dehn: “Pik op di aak a di kovenant ahn mek sevn prees waak fronta Jehoava Aak wid sevn ram haan.”
7 Den ih tel di soalja dehn: “Kip aan di maach rong di siti, ahn som a di soalja dehn fi goh heda Jehoava Aak.”
8 Di sevn prees dehn weh mi-di kehr di sevn ram haan fronta Jehoava gaahn hed ahn bloa dehn haan. Ahn di prees dehn weh mi-di bak di aak a Jehoava kovenant mi-di fala dehn, jos laik weh Jashwa tel dehn fi du.
9 Ahn som a di soalja dehn gaahn heda di prees dehn weh mi-di bloa dehn haan ahn di ada soalja dehn fala di Aak wail di prees dehn kantinyu bloa dehn haan.
10 Jashwa mi koman di peepl: “Unu fi bee kwaiyet soh dat nobadi hyaa unu til di day wen Ah tel unu fi hala, den unu fi hala.”
11 Den ih mek dehn kehr Jehoava Aak wan taim rong di siti, an afta dat dehn gaahn bak da dehn kyamp fi spen di nait.
12 Di neks maanin Jashwa get op erli, ahn di prees dehn mi bak Jehoava Aak,
13 ahn sevn prees wid sevn ram haan mi waak heda Jehoava Aak ahn dehn mi-di bloa dehn haan. Som a di soalja dehn mi-di waak heda dehn ahn som a di soalja dehn mi-di fala Jehoava Aak wail di prees dehn mi-di bloa di haan.
14 Pahn di sekant day dehn maach rong di siti wan taim, an afta dat dehn gaahn bak da di kyamp. Dehn mi du dat fi siks dayz schrayt.
15 Dehn get op erli pahn di sevent day, jos wen di son mi-di kom op, ahn dehn maach rong di siti jos laik dehn mi du bifoa, bot dis taim dehn maach rong it sevn taimz. Da mi onli pahn da day dehn maach rong di siti sevn taimz.
16 Ahn pahn di sevent taim di prees dehn bloa dehn haan ahn Jashwa tel di soalja dehn: “Hala owt haad, kaaz Jehoava don gi unu di siti!
17 Unu fi dischrai di siti an evriting eena it; aala it da fi Jehoava. Bot noh kil di prastichoot Rayhab er enibadi weh deh wid ahn eena ih hows, bikaaz shee haid di too spai weh wee mi sen deh.
18 Bot stay faar fahn eniting weh unu sopoas tu dischrai, kaaz direkli unu wahn en op di waahnt it ahn tek it fi unuself ahn ton Izrel intu sohnting weh fi geh dischrai tu.
19 Bot aal di silva ahn goal an evriting weh mek owta kapa an aiyan hoali tu Jehoava. Dehndeh shuda goh eena Jehoava chrezhri.”
20 Az soon az di peepl dehn hyaa di haan dehn bloa, dehn hala owt haad ahn di waal jrap dong flat. Afta dat eech a dehn gaan ahn kyapcha di siti.
21 Dehn kil evribadi eena di siti wid di soad. Dehn kil man ahn wuman, yong an oal, ahn dehn kil aala dehn bul, sheep, ahn dongki.
22 Dis da weh Jashwa tel di too man weh gaahn spai owt di siti: “Goh eena di prastichoot hows ahn kehr shee ahn fi shee famili owt jos laik weh yu mi pramis fi du far ahn.”
23 Soh di yong man dehn weh mi spai owt di ayrya gaan een ahn kehr Rayhab, ih pa, ih ma, ih breda dehn, ahn di res a ih faamli owta di siti ahn mek shoar dehn reech sayf da wahn plays owtsaida di kyamp a Izrel.
24 Dehn bon dong di siti an evriting een deh. Bot dehn kehr di silva, di goal, an evriting weh mek owta kapa an aiyan ahn put it eena di chrezhri da Jehoava hows.
25 Jashwa onli mi sayv Rayhab di prastichoot ahn fi shee pa faamli an evribadi els weh mi deh lang wid ahn, ahn shee stil di liv da Izrel kaaz shee mi haid di man dehn weh Jashwa sen fi spai owt Jeriko.
26 Rong da taim Jashwa mek wahn anonksment:* “Jehoava wahn kers* di man weh chrai bil bak di siti a Jeriko. Ih fersbaan pikni wahn ded wen ih lay dong di fongdayshan, an ih yongis pikni wahn ded wen ih put op di siti gayt dehn.”
27 Soh Jehoava mi deh wid Jashwa, ahn peepl fahn aal oava geh fi noa bowt hihn.
Futnoat
^ Si di Glasari, “Aak a di kovenant.”
^ Dis ku aalso bee “mek di peepl swayr.”
^ Si di Glasari, “Kers.”
