Jashwa 9:1-27
9 An aala di king dehn oava di Hitait, di Amorait, di Kaynanait, di Perizait, di Haivait, ahn di Jebyusait dehn weh mi liv pahn di wes said a di Jaadn eena di mongtin dehn, eena di Shefeela, lang di hoal koas a di Grayt See, ahn fronta Lebanon hyaa bowt weh mi hapm.
2 Rait away, dehn disaid fi jain op tugeda fi fait gens Jashwa ahn di Izrelait dehn.
3 Di peepl weh mi liv da Gibiyon mi aalso hyaa dat Jashwa mi dischrai Jeriko an Ayai.
4 Bot dehn mi smaat, soh dehn tek sohn food ahn put it eena sohn oal fegi krokos bag ahn load it op pahn dehn dongki.
5 Dehn fiks op sohn oal leda bag weh mi bos ahn pach sohn oal sandalz fi wayr, ahn dehn put aan oal kloaz weh mi wayr owt. Aal di bred weh dehn mi kehr wid dehn mi stayl.
6 Dehn gaahn da Jashwa wehpaat ih mi-di kyamp da Gilgal ahn tel hihn ahn di Izrelait dehn: “Wi kohn fahn wahn faar plays. Pleez mek wahn kovenant* wid wi soh dat wee ku ga pees.”
7 Bot di Izrelait dehn tel di Haivait dehn: “Cho! Unu mosi liv rait rong ya, soh how wee fi mek wahn kovenant wid unu?”
8 Dehn ansa Jashwa ahn seh: “Wee da yu servant.”*
Ahn Jashwa aks dehn: “Da hoo unu, ahn da weh unu kohn fram?”
9 Dehn ansa seh: “Wee kohn fahn wahn lan weh deh faar fahn ya owta rispek fi di naym a yu Gaad Jehoava, bikaaz hihn faymos. Ahn wi hyaa bowt aal weh ih du da Eejip
10 ahn bowt aal weh ih du tu di too Amorait king dehn weh mi deh pahn di ada said* a di Jaadn Riva. Ih mi kil Saihon di king a Heshbon, an Og di king a Bayshan, hoo mi liv da Ashtarot.
11 Di oalda man dehn weh tek di leed* lang wid di res a wi peepl tel wi, ‘Kehr food wid unu fi di jerni ahn goh meet dehn. Tel dehn: “Wee wahn bee unu servant, soh pleez mek wahn agreement wid wi soh dat wi ku ga pees.”’
12 Dis bred weh wi bring wid wi mi stil hat di day wen wi lef fahn hoam fi kohn ya kohn meet wid unu. Ahn now luk pahn how stayl ih stayl.
13 Ahn dehnya leda bag mi nyoo wen wi ful dehn, bot now dehn bos. Ahn wi kloaz ahn sandalz wayr owt bikaaz a how faar wi chravl.”
14 Den di Izrelait man dehn tek som a dehn food fi chek it, bot dehn neva aks Jehoava weh dehn shuda du.
15 Jashwa mek pees wid dehn ahn mek wahn agreement wid dehn dat dehn noh wahn kil dehn, an aala di cheef a di asembli swayr tu dehn fi kip da pramis.
16 Chree dayz afta dehn mek wahn kovenant wid dehn, aala di Izrelait fain owt dat dehn neva liv faar, dehn mi liv eena di saym ayrya laik dehn.
17 Den di Izrelait dehn lef fahn weh dehn mi kyamp ahn gaahn da di siti wehpaat dehnya peepl liv. Pahn di terd day dehn mi reech da Gibiyon, Kefaira, Biyerot, ahn Kiriyat-jeeyarim.
18 Bot di Izrelait dehn neva atak dehn bikaaz di cheef dehn mi swayr eena di naym a Izrel Gaad Jehoava dat dehn noh wahn kil dehn. Soh aala di Izrelait dehn staat tu grombl gens di cheef dehn.
19 Den aala di cheef dehn tel di hoal asembli a peepl: “Laik how wi mi swayr tu dehn eena di naym a Jehoava di Gaad a Izrel, wi kyaahn du dehn notn.
20 Wi wahn du weh wi mi swayr fi du ahn wi noh wahn kil dehn, soh dat Gaad noh wahn beks wid wi.”
21 Ahn den di cheef dehn seh: “Mek dehn liv, bot mek dehn chap wud ahn bak waata fi di hoal asembli a peepl.” Dat da weh di cheef dehn mi disaid fi du wid dehn.
22 Den Jashwa hayl dehn an aks dehn: “Wai unu chrik wi ahn seh dat unu kohn fahn faar faar, wen reeli unu da fahn rait rong ya?
23 Fahn now aan, unu deh anda wahn kers,* an unu wahn aalwayz bee slayv weh bak waata ahn chap wud fi Gaad hows.”
24 Dehn ansa Jashwa ahn seh: “Wi du dis bikaaz wi mi frayd. Dehn tel wi playn ahn schrayt dat yu Gaad Jehoava mi koman Moaziz fi giv unu aala di lan ahn fi kil owt evribadi weh liv deh.
25 Ahn now wi laif deh eena fi yoo han. Soh yoo disaid weh fi du wid wi, akaadn tu weh yoo tink gud ahn rait, ahn wee wahn aksep it.”
26 Soh dat da weh ih du. Ih sayv dehn fahn di Izrelait dehn, ahn dehn neva kil dehn.
27 Bot Jashwa mek dehn chap wud ahn bak waata fahn den aan fi di hoal asembli a peepl ahn fi Jehoava alta eniway weh Hihn disaid ih fi deh, ahn dat da how dehn deh op tu tudeh.
Futnoat
^ Si di Glasari, “Kovenant.”
^ Er “slayv.”
^ Dis di rifaa tu di ees said.
^ Er “Di eldaz.” Si di Glasari, “Elda.”
^ Si di Glasari, “Kers.”
