Jaymz 2:1-26
2 Mi bradaz, unu noh di fala di fayt a wi wandaful Laad Jeezas Krais, ahn yet, shoa fayvritizm saym taim, noh chroo?
2 Seh too man kohn da unu meetin, wan di wayr goal ring ahn fansi kloaz, ahn di ada wan poa ahn di wayr doti kloaz.
3 Bot unu aana di wan weh di wayr fansi kloaz ahn tel ahn, “Si wahn gud seet ya fi yu,” ahn den tel di poa man, “Yoo stay stan op” er, “Sidong deh pahn di floa bai mi fut.”
4 If da soh unu di goh aan, den unu di chreet wan beta dan di ada, an unu di joj peepl eena wahn wikid way, noh chroo?
5 Lisn, mi dyaa bradaz, Gaad pik peepl weh poa eena dis werl fi bee rich eena fayt ahn fi inherit di Kingdom weh hihn pramis tu peepl weh lov hihn.
6 Bot unu disrispek dehndeh saym poa peepl. Tel mi, da noh di rich peepl di persikyoot unu ahn haal unu da koat?
7 Da noh dehn di insolt di wandaful naym a di Wan weh unu bilangz tu?
8 Now, if unu di obay di raiyal laa eena di skripcha weh seh: “Yu fi lov yu nayba jos laik how yu lov yuself,” den unu di du gud.
9 Bot if unu kantinyu fi shoa fayvritizm, unu di sin, ahn di laa mek it playn fi si dat unu gilti kaaz unu brok di laa.
10 Sombadi mait di fala di hoal Laa, bot if dehn brok jos wan a dehn laa, den dehn brok di hoal Laa.
11 Kaaz di saym Gaad weh seh, “Yu noh fi komit adolchri,” aalso seh, “Yu noh fi merda.” Soh den, eevn if unu noh komit adolchri bot unu merda sombadi, den unu stil brok di Laa.
12 Kip aan di taak ahn bihayv laik peepl weh wahn geh joj akaadn tu di laa weh gi peepl freedom.
13 Enibadi weh noh praktis mersi wahn geh joj widowt mersi. Mersi aalwayz beta dan jojment.
14 Mi bradaz, if sombadi seh ih ga fayt bot ih noh du gud tingz, weh gud dat wahn du? Ih fayt kyaahn sayv ahn, noh chroo?
15 If wahn brada er wahn sista noh ga kloaz fi wayr,* an ih noh ga nof food fi di day,
16 ahn wan a unu tel ahn: “Ah wish yu di bes. Ah hoap yu kip waam ahn yu eet gud,” bot unu noh giv ahn weh ih need fi ih badi, weh gud dat wahn du?
17 Saym way soh, wi fayt ded if wi noh shoa it bai di gud tingz weh wi du.
18 Wat if sombadi seh: “Yoo ga fayt, an Ai du gud tingz. How yoo ku proov dat yu ga fayt if yu noh du notn? Ai wahn proov dat Ai ga fayt wen Ah du gud tingz.”
19 Unu bileev dat onli wan Gaad deh? Dat gud. Bot di deemon dehn bileev dat tu, ahn dehn chrimbl.
20 Yoo da wahn foolish man! Yu waahn mek Ah shoa yu dat wahn persn fayt noh wert notn if ih noh shoa it bai di tingz weh ih du?
21 Mek Ah aks unu dis: Da wen Gaad mi aksep Aybraham az wahn raichos man? Da afta ih mi aafa op ih son Aizak pahn di alta, noh chroo?
22 Yu kuda mi si fi hihn fayt eena di tingz weh ih mi du, ahn da di tingz weh ih du shoa dat ih fayt mi kompleet.
23 Ahn weh rait dong eena di skripcha kohn chroo: “Aybraham mi shoa fayt eena Jehoava, ahn bikaaz a dat, Gaad mi aksep ahn az wahn raichos man,” ahn dehn mi kaal ahn Jehoava fren.
24 Soh yu si, Gaad aksep sombadi az raichos bikaaz a weh ih du ahn noh jos bikaaz a ih fayt.
25 Gaad mi eevn aksep Rayhab, wahn prastichoot, az wahn raichos persn sayka weh shee mi welkom di mesinja dehn ahn sen dehn owt pahn wahn nada road.
26 Soh jos laik how di badi widowt spirit* ded, rait soh, wi fayt ded if wi noh shoa it bai di gud tingz weh wi du.
