Jaymz 3:1-18
3 Mi bradaz, noh aala unu shuda bee teechaz, bikaaz Gaad wahn gi wi wahn heviya* jojment dan evribadi els.
2 Aala wi mek mistayk* lata taim. If enibadi noh mek no mistayk eena weh ih seh, den ih perfek, an ih ku kanchroal ih hoal badi.
3 Wen wi put wahn braidl eena wahn haas mowt, ih noh onli wahn obay wi, bot wi wahn kanchroal ih hoal badi.
4 Luk pahn di ship dehn: Eevn doa dehn soh big, ahn schrang breez jraiv dehn bowt, wahn man ku kanchroal wahn ship wid wahn smaal lee roda fi kehr it eniway wehpaat ih waahn goh.
5 Saym way soh, di tong da wahn smaal paat a di badi, bot ih onli bregin. Tink bowt how wan lee spaak ku staat wahn big bush faiya!
6 Di tong da wahn faiya tu. Owta aala di paats a di badi, di tong ful op a wikidnis, bikaaz ih ku mek di hoal badi doti. Ih ku set wahn persn laif pahn faiya, ahn da faiya kohn fahn Gehena.*
7 Peepl taym evri kaina wail animal, berd, reptail, an animal weh liv eena di see.
8 Bot nobadi kyaahn taym di tong. Ih eevl ahn nobadi kyaahn kanchroal it. Ih ful op a paizn weh ku kil wi.
9 Wi prayz Jehoava, di Faada, wid wi tong, ahn den wi ton rong ahn yooz it fi kers peepl weh Gaad mek fi bee laik hihn.
10 Blesin ahn kers kom owta di saym mowt.
Mi bradaz, dat shudn hapm soh.
11 Fresh* waata ahn saalt waata noh kom owta di saym spring, noh chroo?
12 Mi bradaz, wahn fig chree kyaahn bayr aliv, ahn wahn grayp vain kyaahn bayr fig, noh chroo? Ahn wahn saalt waata spring kyaahn gi yu fresh waata needa.
13 Enibadi deh monks unu weh waiz ahn ga andastandin? Mek dehn bihayv eena wahn way weh shoa dat dehn ga wahn jentl haat weh kohn fahn wizdom.
14 Bot if eena unu haat unu jelos an unu laik kwaaril,* den unu noh fi boas bowt unu wizdom. Kaaz den dat wuda bee wahn lai.
15 Dat da noh wizdom weh kohn fahn hevn, bot ih kohn fahn di werl, fahn peepl weh liv akaadn tu weh dehn sinful badi waahn, ahn fahn di deemonz.
16 Eniway wehpaat jelosi ahn kwaarilin* deh, kanfyoozhan an aal kaina eevl ting wahn dehdeh tu.
17 Bot di fers ting wi need fi noa bowt di wizdom weh kohn fahn hevn da dis: ih kleen ahn pyoar. Den ih lov pees, ih noh waahn ih oan way aal di taim, ih redi fi obay, ih ful a mersi, an ih du lata gud. Ih chreet evribadi di saym way, an ih aalwayz sinsyaa.
18 Pahn tap a dat, peepl hoo aalwayz get lang gud wid adaz wahn di spred pees, ahn dis mek dehn du tingz weh raichos.
Futnoat
^ Er “schranga.”
^ Er “wi stombl.”
^ Si di Glasari, “Gehena.”
^ Lit., “Sweet.”
^ Dis ku aalso bee “unu onli kansaan bowt unuself.”
^ Dis ku aalso bee “selfish kansaan.”
