Jaymz 4:1-17
4 Da weh di kaaz aala dis kwaarilin ahn fait monks unu? Da unu sinful dizaiyaz weh di fait fi kanchroal unu, noh chroo?
2 Unu waahn lata ting, bot unu kyaahn geh weh unu waahn. Unu merda an unu waahn tingz weh ada peepl gat, bot eevn soh, unu kyaahn get dehn. Unu fait, ahn da laik unu deh da waar wid wan anada. Unu noh ga notn bikaaz unu noh aks fi notn.
3 Eevn wen unu aks, unu noh geh notn bikaaz unu di aks fi di rang reezn; unu onli di aks soh dat unu ku satisfai weh unu sinful badi waahn.
4 Unu peepl weh noh faytful tu Gaad, unu noh noa dat if unu da fren wid di werl den unu da Gaad enimi? Soh den, enibadi weh waahn bee fren wid di werl di mek ihself wahn enimi a Gaad.
5 Er unu tink dat da fi notn di skripcha seh: “Wahn jelos spirit deh eena wi haat weh aalwayz waahn weh ada peepl gat”?
6 Bot di lata kainis weh Gaad shoa grayta dan da jelos spirit. Soh di skripcha seh: “Gaad deh gens peepl weh prowd, bot ih shoa grayt kainis* tu peepl weh hombl.”
7 Soh den, put unuself anda di atariti a Gaad. Stan op gens di Devl, an ih wahn ron fahn yu.
8 Kohn kloas tu Gaad, ahn hihn wahn kohn kloas tu unu. Unu sinaz, an unu weh dowt, kleen unuself an unu wikid haat.
9 Unu mos bee mizarabl ahn moan ahn baal. Unu noh fi laaf, unu fi krai. Unu noh fi bee hapi, unu fi bee sad.
10 Hombl unuself eena Jehoava sait, ahn hihn wahn aana unu.*
11 Unu noh fi taak gens wan anada, bradaz. Enibadi weh taak gens ih brada, er joj ih brada, di taak gens di laa ahn di joj di laa. Now if unu joj laa, unu noh di du weh di laa seh, unu di mek unuself di joj.
12 Onli wan persn deh weh mek laa ahn weh da Joj, ahn hihn da di onli wan weh ku sayv ahn weh ku dischrai. Bot da hoo unu soh fi di joj unu nayba?
13 Kom aan now, aala unu weh seh: “Tudeh er tumaaro wi gwehn da soch ahn soch a siti ahn wi wahn stay deh fi wahn yaa, ahn wi wahn du bizniz ahn mek moni.”
14 Bot unu noh noa weh wahn hapm eena unu laif tumaaro. Kaaz unu laif da laik wahn mis weh stay fi wahn lee wail ahn den disapyaa.
15 Soh insteda seh dat, unu shuda seh, “If Jehoava waahn, wi wahn liv ahn du dis er dat.”
16 Unu onli prowd a unuself, an unu bregin ahn boasi, ahn dat da wikidnis.
17 Soh if sombadi noa how fi du weh rait ahn stilyet ih noh du it, ih di sin.
