Jenisiz 13:1-18
13 Den Aybram, ih waif, ahn Lat lef fahn Eejip ahn dehn kehr evriting weh dehn mi gat wid dehn, ahn dehn gaahn da di Negeb.
2 Aybram mi ga lata animal ahn silva ahn goal.
3 Hihn mi moov ih kyamp fahn wan plays tu di neks wail ih mi-di chravl fahn di Negeb tu Betel. Hihn mi du dis til ih mi reech di saym plays wehpaat ih mi kyamp bifoa, bitween Betel an Ayai.
4 Ahn da rait deh ih mi bil wahn alta an ih mi kaal pahn Jehoava naym.
5 Lat, hoo mi-di chravl lang wid Aybram, mi aalso ga wahn lata sheep, kyatl, ahn tent.
6 Soh Aybram ahn Lat kudn stay tugeda da di saym plays nohmoh bikaaz dehn mi ga tu moch animalz.
7 Sayka dat, Aybram servant dehn ahn Lat servant dehn staat tu kwaaril wid eech ada. Rong da taim deh, di Kaynanait ahn di Perizait dehn mi-di liv eena di lan.
8 Soh Aybram tel Lat: “Pleez, noh mek wi kwaaril wid wan anada. Ahn noh mek yu servant dehn kwaaril wid mai servant dehn bikaaz wee da faamli.
9 Yoo ku chooz eniway wehpaat yu waahn liv. Pleez mek wi goh wi oan way. If yoo goh da di lef, den Ai gwehn da di rait, bot if yoo goh da di rait, den Ai gwehn da di lef.”
10 Soh Lat mi luk rong ahn hihn mi si di hoal lan a di Jaadn, az faar az Zoawar. Hihn mi si dat di lan mi ga lata waata jos laik di gyaadn weh Jehoava mi mek, ahn jos laik di lan a Eejip. Dat da how di lan a di Jaadn mi deh bifoa Jehoava dischrai Sadam ahn Gomoara.
11 Soh Lat mi chooz di hoal ayrya a di Jaadn weh mi deh tuwaadz di ees, ahn den hihn mi moov deh lang wid evriting weh ih mi gat. Soh Lat an Aybram gaan dehn oan way.
12 Aybram mi liv da Kaynan, bot Lat mi liv kloas tu di siti dehn a di dischrik a di Jaadn.* Ahn den fainali, Lat set op ih tent kloas tu Sadam.
13 Bot di peepl weh mi liv da Sadam mi wikid, ahn dehn mi-di sin gens Jehoava.
14 Afta Lat gaan ih oan way, Jehoava mi tel Aybram: “Fahn rait deh weh yu di stan op, pleez luk tu di naat, sowt, ees, ahn wes,
15 bikaaz Ah wahn gi yu aala di lan weh yu si, an ih wahn bilangz tu yoo ahn yu disendant dehn fareva.
16 An Ah wahn mek yu disendant dehn bee plenti laik di dos weh deh pahn di ert. Jos laik how nobadi ku konk di dos weh deh pahn di grong, da rait soh nobadi wahn ku konk yu disendant dehn.
17 Soh get op ahn chravl chroo aala dis lan kaaz dis da di lan weh Ah wahn gi yu.”
18 Soh Aybram mi kantinyu fi liv eena tent. Laytaraan, hihn gaahn liv kloas tu Mamri weh da wahn ayrya eena Hebron weh ga lata big chree. Da rait deh hihn mi bil wahn alta tu Jehoava.
Futnoat
^ Dat da di ayrya weh inklood di loawa paat a di Jaadn vali ahn weh goh az faar az Zoawar.
