Jenisiz 2:1-25
2 Soh Gaad mi finish mek di hevnz* ahn di ert an evriting weh deh eena di hevnz ahn pahn di ert.
2 Ahn bifoa di sevent day staat, Gaad mi finish wid aala di werk weh ih mi-di du. An afta ih finish aala ih werk, ih mi res pahn di sevent day.
3 Ahn soh Gaad mi bles di sevent day an ih mi seh dat da day hoali, bikaaz pahn da day hihn res afta ih mi mek evriting akaadn tu ih perpos.
4 Dis da di hischri a di hevnz ahn di ert, di taim wen Gaad mi mek dehn ahn pahn di day wen Jehoava* Gaad mi mek di ert ahn di hevnz.
5 No kaina plaants mi-di groa pahn di ert bikaaz Jehoava Gaad neva mek ih rayn ahn no hyoomanz mi deh fi werk pahn di lan.
6 Gaad mi mek sohn smaal lee jrap a waata weh nobadi ku si goh op fahn di ert, ahn den ih mi mek dehn kohn dong laik fag fi wet di grong.
7 Ahn Jehoava Gaad mi yooz di dos fahn di grong fi mek di badi a wahn man. Ahn hihn mi bloa eena di man noaz, ahn di man* mi kohn tu laif.*
8 Den Jehoava Gaad mi mek wahn gyaadn pahn di ees said da Eedn, an ih mi put di man weh ih mi mek fi liv rait deh.
9 Den Jehoava Gaad mi mek aal kaina chree groa eena di gyaadn. Dehn mi luk priti ahn dehn mi bayr froot weh mi gud fi eet. An ih mi mek di chree a laif ahn di chree weh mek yu noa weh gud ahn weh bad groa eena di midl a di gyaadn.
10 Now dehn mi ga wahn riva da Eedn. Dis riva mi floa chroo di gyaadn fi provaid waata far it, ahn fahn deh ih mi divaid op intu foa ada riva.
11 Di naym a di fers riva da Paishon, ahn da riva goh aal di way rong di lan a Havila, wehpaat dehn ga goal.
12 Di lan mi ga goal weh da-mi gud kwaliti. Ih mi aalso ga oniks stoan ahn chree sap weh mi smel nais.
13 Di naym a di sekant riva da Gaihon, ahn da riva goh aal rong di lan a Kush.
14 Di naym a di terd riva da Hidikel,* ahn da riva goh tuwaadz di ees a Asiriya. Ahn di naym a di foat riva da Yoofraytis.
15 Jehoava Gaad mi put di man eena di gyaadn da Eedn fi mek ih liv deh, fi mek ih werk pahn di lan, ahn fi mek ih tek kayr a it.
16 Den Jehoava Gaad mi gi di man dis koman: “Yu ku eet az moch az yu waahn fahn eni a di chree dehn weh deh eena di gyaadn.
17 Bot yu noh fi eet fahn di chree weh mek yu noa weh gud ahn weh bad, bikaaz di day yu eet fan it, fi shoar yu wahn ded.”
18 Den Jehoava Gaad seh: “Ih noh gud fi mek di man stay bai ihself. Soh Ah wahn mek wahn paadna far ahn weh ku help ahn.”
19 Jehoava Gaad mi mek aal kaina animal weh ku flai an aal kaina wail animal owta di dos fahn di grong. Den hihn mi staat fi bring di animal dehn tu di man soh dat ih ku giv eech wan a dehn wahn naym. Ahn wateva di man mi kaal dehn, da soh dehn mi naym.
20 Soh di man mi naym aala di animal dehn weh wail, weh taym, ahn weh ku flai. Bot joorin da taim, di man neva ga no paadna weh ku help ahn.
21 Soh Jehoava Gaad put di man eena wahn deep sleep, ahn wail di man mi-di sleep, ih tek owt wan a ih ribz fahn di man said ahn den ih mek di skin kloaz op bak.
22 Ahn Jehoava mi mek wahn wuman fahn di rib weh ih mi tek owt fahn di man said, ahn hihn mi kehr shee tu di man.
23 Den di man mi seh:
“Fainali! Fi shee boanz kohn fahn mai boanz,Ahn fi shee flesh kohn fahn mai flesh.
Ah wahn kaal dis wan Wuman,Bikaaz Gaad mi yooz di man badi fi mek di wuman.”
24 Dat da wai wahn man wahn lef ih ma an ih pa an ih wahn stay wid ih waif, ahn dehn wahn bee wan.*
25 Ahn di man an ih waif neva wayr kloaz, bot dehn neva feel shaym.
Futnoat
^ Dis di rifaa tu di yoonivers weh inklood aala di staar dehn, di planet dehn, ahn di galaksi dehn.
^ Dis da di fers taim Gaad persnal naym, יהוה (YHWH), apyaa eena di Baibl. Dis naym mek hihn difrent fahn aala di ada gaad dehn. Si Apendiks A4.
^ Er “soal.” Di Heebroo werd da ne’phesh weh meen “wahn kreecha weh di breed.” Si di Glasari, “Soal.”
^ Er “di man mi ton intu wahn livin persn.”
^ Er “Taigris.”
^ Er “dehn wahn bee laik wan persn.”
