Jenisiz 43:1-34
43 Now di famin mi stan reeli bad da Kaynan.
2 Soh wen aal di food weh dehn mi bring fahn Eejip mi don, dehn pa mi tel dehn: “Goh bak ahn bai sohn food fi wi.”
3 Den Jooda tel ih pa: “Di man mi waan wi dat wi noh fi goh bak ahn si ahn if wi breda noh deh wid wi.
4 If yu sen wi breda wid wi, den wi gwehn bak ahn bai food fi yu.
5 Bot if yu noh sen ahn wid wi, wi noh gwehn bak, bikaaz di man seh wi kyaahn goh bak goh si ahn if wi noh kehr wi breda wid wi.”
6 Den Izrel aks dehn: “How unu ku du dis tu mi? Wai unu tel ahn dat unu ga wahn nada breda?”
7 Den dehn tel ahn: “Di man mi aks wi bowt wi famili, an ih seh: ‘Unu pa stil alaiv? Unu ga wahn nada breda?’ ahn wi mi tel ahn di chroot. How wee mi fi noa dat hihn mi wahn seh, ‘Bring unu breda ya’?”
8 Den Jooda beg ih pa Izrel, an ih tel ahn: “Pleez sen di bwai wid mi, ahn mek wi goh da Eejip soh dat wee ahn wi pikni noh ded sayka di famin.
9 Ah pramis Ah wahn kip ahn sayf. Ai wahn bee rispansabl far ahn, an if Ah noh bring ahn bak tu yu, Ai wahn bee gilti fi di res a mi laif.
10 Bot if wi neva di ways taim, wi kuda mi don gaan ahn kom bak too taimz bai now.”
11 Soh Izrel tel ih son dehn: “If wi noh ga no ada chois, den du dis: Tek som a di bes tingz weh groa pahn di lan, ahn put dehn eena unu sak, ahn kehr dehn fi di man az wahn gif. Yu fi kehr sohn balsam,* sohn honi, sohn daak chree sap weh smel nais,* sohn chree baak,* sohn pistaashyo not,* ahn sohn almon.
12 Kehr dobl di amonk a moni wid unu. Ahn kehr bak di moni weh unu mi fain eena unu sak,* bikaaz maybi dat da-mi wahn mistayk.
13 Ahn kehr unu breda wid unu ahn goh bak da di man.
14 Ah pray dat Gaad mek di man ga mersi pahn unu soh dat ih ku let goh unu ada breda ahn noh kip Benjamin. Bot if Ah fi looz mi pikni dehn, den Ah wahn looz dehn!”
15 Soh dehn mi get di tingz weh dehn mi wahn kehr az wahn gif fi di man. Ahn dehn mi kehr dobl di amonk a moni, ahn dehn mi kehr Benjamin wid dehn tu. Den dehn gaahn bak da Eejip ahn dehn stan op fronta Joazef agen.
16 Wen Joazef mi si Benjamin wid dehn, rait away hihn tel di man weh mi in chaaj a ih hows: “Kehr dehnya man da di hows. Den kil sohn animal ahn pripyaa sohn food fi wi, bikaaz dehn wahn eet wid mi rong 12 aklak.”
17 Rait away di man mi du weh Joazef tel ahn fi du, an ih kehr dehn da Joazef hows.
18 Bot di man dehn mi geh frayd wen dehn gaahn da Joazef hows, ahn dehn seh: “Dehn bring wi ya bikaaz a di moni weh wi mi fain eena wi sak. Now dehn wahn atak wi, ahn dehn wahn mek wi bee dehn slayv, ahn dehn wahn tek wi dongki dehn!”
19 Soh wen dehn reech fronta di hows, dehn gaahn taak tu di man weh mi in chaaj a Joazef hows.
20 Ahn dehn tel ahn: “Ekskyooz wi, mi laad, wi mi kohn bai food di laas taim.
21 Bot wen wi mi reech da di plays wehpaat wi mi wahn sleep, wi oapm wi sak dehn an eech wan a wi mi fain wi ful amonk a moni eena wi sak a grayn. Ahn soh wi kohn fi giv it bak tu yu,
22 bikaaz wi noh noa hoo put bak di moni eena wi sak. Ahn wi bring moa moni fi bai food.”
23 Den di man tel dehn: “Ih aarait, noh bee frayd. Ah noa dat unu mi pay fi di food. Unu Gaad an unu pa Gaad da di wan weh mi put bak di moni eena unu sak.” Afta dat hihn bring Simiyan tu dehn.
24 Den di man kehr dehn eena Joazef hows, an ih gi dehn waata fi wash dehn fut an ih gi dehn food fi dehn dongki.
25 Den dehn mi hyaa dat Joazef mi wahn kohn eet wid dehn rong 12 aklak. Soh dehn mi get di gif redi weh dehn mi bring far ahn.
26 Wen Joazef gaan eena di hows, dehn kehr dehn gif een deh far ahn, an dehn mi bow dong tu ahn wid dehn fays loa tu di grong.
27 Afta dat, Joazef aks dehn how dehn mi-di du, ahn den ih aks dehn: “How unu pa di du? Ih stil alaiv?”
28 Den dehn tel ahn: “Yes, mi laad, wi pa di du gud.” Den dehn bow dong agen fronta ahn wid dehn fays loa tu di grong.
29 Wen Joazef mi si ih breda Benjamin, hoo mi ga di saym ma laik hihn, ih aks dehn: “Dis da unu yongis breda weh unu tel mi bowt?” Den hihn mi tel Benjamin: “Ah hoap dat Gaad bles yu, mi son.”
30 Afta Joazef mi si ih breda, ih mi waahn krai. An afta wahn wail, ih kudn hoal it een nohmoh. Soh ih lef fahn deh, an ih gaan eena wahn neks room an ih staat tu baal.
31 Afta ih kaam dong, ih wash ih fays an ih gaahn bak owtsaid. Den ih seh: “Serv wi di food.”
32 Joazef mi eet da wahn taybl bai ihself, an ih breda dehn mi eet da wahn nada taybl, ahn di Ijipshan dehn weh mi dehdeh mi eet da wahn difrent taybl. Di Ijipshan peepl neva eet wid di Heebroo peepl, bikaaz dat da sohnting weh Ijipshan dehn mi luk dong pan.
33 Soh dehn mi put Joazef breda dehn fi sidong fronta ahn akaadn tu dehn ayj, fahn di oaldis wan weh ga di rait az di fersbaan tu di yongis wan. Joazef breda dehn mi-di wach pahn wan anada bikaaz dehn mi sopraiz, ahn dehn mi-di wanda weh mi-di hapm.
34 Ahn Joazef mi kip di sen food fan ih taybl tu fi dehn taybl. Ahn hihn mi gi Benjamin faiv taimz moa food dan weh ih mi gi di res a ih breda dehn. Soh dehn mi kantinyu eet ahn jrink wid Joazef til dehn mi ful.
Futnoat
^ Dis da wahn ail weh ga wahn nais smel weh kohn fahn sertn plaants ahn chreez.
^ Lit., “sohn Labdanom.”
^ Dehn yooz di sap weh kohn fahn dis chree baak fi mek perfyoom.
^ Wahn kaina not weh tays lee bit sweet.
^ Lit., “eena di mowt a unu bag.”
