Jenisiz 50:1-26
50 Den Joazef hog ih pa an ih staat tu baal an ih kis ahn.
2 Afta dat Joazef tel som a ih dakta dehn weh da-mi ih servant dehn fi pripyaa* ih pa badi. Soh dat da weh dehn mi du.
3 Dehn mi tek 40 dayz fi pripyaa Izrel badi bikaaz dat da di amonk a taim weh dehn naamali tek fi du dat. Ahn di Ijipshan dehn mi krai far ahn fi 70 dayz.
4 Wen dehn mi stap krai fi Jaykob, Joazef gaahn taak tu Fayro* ofishal dehn an ih tel dehn: “Pleez tel Fayro dis:
5 ‘Wen mi pa mi-di ded, ih mi mek Ah swayr tu ahn, an ih tel mi: “Wen Ah ded, beri mi eena di kayv weh Ah don pripyaa fi miself da Kaynan.” Pleez mek Ah goh beri mi pa, an afta dat, Ah wahn kohn bak.’”
6 Den Fayro tel ahn: “Goh beri yu pa jos laik weh yu mi swayr tu ahn.”
7 Soh Joazef gaahn beri ih pa, an aala Fayro servant dehn gaahn lang wid ahn. Aala di man dehn weh mi tek di leed eena Fayro koat an aala di man dehn weh mi tek di leed da Eejip gaahn lang wid Joazef.
8 An evribadi weh mi liv wid Joazef ahn wid ih pa gaahn tu. Bot dehn mi lef aala dehn lee pikni ahn dehn animalz da Goashen.
9 Ahn sohn ada peepl gaahn lang wid ahn tu. Som a dehn mi-di raid eena sohn chariyat ahn som a dehn mi-di raid haas. Soh wahn big groop a peepl gaahn wid Joazef.
10 Dehn mi reech da wahn ayrya weh mi naym Aytad wehpaat peepl beet grayn ahn weh mi deh kloas tu di Jaadn Riva. Da rait deh dehn mi baal haad, ahn Joazef mi baal fi ih pa fi sevn dayz.
11 Di peepl fahn Kaynan mi si dehn di baal da Aytad, di plays wehpaat dehn beet grayn. Ahn dehn mi seh: “Di Ijipshan dehn di baal wahn lat!” Dat da wai di plays naym Aybl-mizrayim.* Da plays deh eena wahn ayrya weh deh kloas tu di Jaadn Riva.
12 Soh Jaykob son dehn mi du egzakli weh hihn mi tel dehn fi du.
13 Ih son dehn mi kehr ih badi da Kaynan, ahn dehn mi beri ahn eena wahn kayv weh mi deh eena wahn feel da Makpeela. Da feel mi deh kloas tu Mamri, an Aybraham mi bai da feel soh dat ih kuda mi beri ih waif. Hihn mi bai it fahn Eefron hoo da-mi wan a Het disendant dehn.
14 Afta Joazef mi beri ih pa, hihn an ih breda dehn an evribadi els weh gaahn wid ahn fi beri ih pa gaahn bak da Eejip.
15 Now dat dehn pa don ded, Joazef breda dehn seh: “Maybi Joazef hayt wi an ih mait waahn tek rivenj sayka aala di bad tingz weh wi mi du tu ahn.”
16 Soh dehn sen wahn mesij tu Joazef weh seh: “Dis da weh yu pa mi tel wi bifoa ih ded:
17 ‘Dis da weh yu fi tel Joazef: “Mi son, weh yu breda dehn mi du tu yu mi rang, bot Ah beg yu fi pleez fergiv dehn fi aala di bad tingz weh dehn mi du tu yu.”’ Soh, Joazef, pleez fergiv wi fi aala di bad tingz weh wi mi du tu yu, bikaaz wee wership di saym Gaad weh yu pa mi wership.” Ahn Joazef baal wen ih breda dehn tel ahn dat.
18 Den Joazef breda dehn gaahn si ahn, an dehn neel dong fronta ahn an seh: “Wee da yu slayv, yu ku du wateva yu waahn du tu wi!”
19 Den Joazef tel dehn: “Noh frayd. Ai da noh Gaad, Ai kyaahn joj unu.
20 Eevn doa unu mi meen fi hert mi, Gaad alow tingz fi hapm dis way soh dat evriting ton owt gud ahn soh dat lata peepl ku geh sayv. Ahn dat da weh hihn di du tudeh.
21 Soh noh frayd, Ah wahn kip di sen food fi unu ahn fi unu pikni.” Soh hihn mi komfert dehn an ih mi taak tu dehn eena wahn kain way fi mek dehn feel kaam.
22 Joazef an ih pa hoal famili mi stay da Eejip, ahn Joazef mi liv fi 110 yaaz.
23 Ahn hihn mi geh fi noa Eefrayim granson dehn ahn Maykir son dehn, ahn Maykir da Manaaseh son. Ahn fi dehn pikni da-mi laik Joazef pikni.*
24 Soh Joazef tel ih breda dehn: “Ah wahn soon ded, bot Gaad wahn help unu. Hihn wahn mek unu kom owta dis lan, an ih wahn kehr unu da di lan weh ih mi pramis fi giv tu Aybraham, Aizak, ahn Jaykob.”
25 Afta dat, Joazef tel Izrel son dehn: “Wen Gaad help unu ahn kehr unu owt fahn dis lan, unu haftu kehr mi boanz wid unu.” Hihn mi mek dehn swayr fi du dat.
26 Ahn Joazef mi ded da Eejip wen ih mi 110 yaaz oal. Soh di dakta dehn mi pripyaa* ih badi ahn put ahn eena wahn kaafin.
Futnoat
^ Dis meenz dat dehn mi yooz tingz laik ail weh smel nais pahn di badi soh dat ih noh ratn faas.
^ Si di Glasari, “Fayro.”
^ Dis naym meenz “Di Taim Wen di Ijipshan Dehn Mi-Di Baal Da Wahn Fyooneral.”
^ Lit., “Dehn mi baan pahn Joazef nee.” Dis ekspreshan meen dat ih mi chreet dehn speshal laik if dehn da-mi ih oan pikni.
^ Dis meenz dat dehn mi yooz tingz laik ail weh smel nais pahn di badi soh dat ih noh ratn faas.
